سۋرەتتى تۇسىرگەن - ۆالەري بۋگاەۆ
كەرەكۋلىك داۋلەت شابانباي – ازيا چەمپيوناتىنىڭ ءتورت دۇركىن (2008, 2009, 2011, 2014 جىلدار) قولا جانە ازيا ويىندارىنىڭ كۇمىس جۇلدەگەرى. بيىل قىركۇيەك ايىندا دوپينگكە قارسى تەكسەرىستەر جاريا ەتىلىپ, لوندون وليمپياداسىنداعى گرۋزيا جانە وزبەكستان سپورتشىلارىنىڭ ناتيجەلەرى جويىلعانى سەبەپتى جەرلەسىمىز وليمپيادانىڭ قولا جۇلدەگەرى اتاندى.
سپورتشى ۇلكەن سپورتتاعى مانسابىن اياقتاعان سوڭ باپكەر رەتىندە قىزمەتكە كىرىسپەك.
- باستى ماقساتىم – جاستارعا تاجىريبەمدى, ەڭبەكسۇيگىشتىك قاسيەتتەردى جەتكىزە ءبىلۋ. ەڭبەكسۇيگىش ادام جولىنداعى قيىندىقتىڭ بارلىعىن جەڭەدى. قازاقستان سپورتىنىڭ تۋى بيىكتە جەلبىرەي بەرسىن, – دەدى داۋلەت شابانباي.
ابىلقايىر سقاقوۆ وليمپيادا جۇلدەگەرىنىڭ وتاندىق سپورتتى دامىتۋداعى ەڭبەگىن جوعارى باعالاپ, پاۆلودار قالاسىنان ءبىر بولمەلى پاتەردىڭ كىلتىن تابىستادى.
«وبلىس تۇرعىندارى ءسىزدىڭ جەتىستىگىڭىزبەن ماقتانادى. وسكەلەڭ ۇرپاق ءۇشىن ۇلگىسىز. جيعان تاجىريبەڭىز بەن شەبەرلىگىڭىزدى جاس سپورتشىلارعا دارىتا ءبىلۋىڭىز كەرەك», دەدى اكىم.
ايتىپ وتەيىك, بۇل - جازعى وليمپيادا ويىندارىنان پاۆلودارلىق سپورتشىلار يەلەنگەن تۇڭعىش جۇلدە.
