«ەگەمەن ەلىمىزدى وركەندەتۋ – ءبارىمىزدىڭ ورتاق ماقساتىمىز. بۇل جۇمىسقا ءتۇرلى سالا ماماندارى, سونىڭ ىشىندە ىسكەر ازاماتتار دا اتسالىسىپ ءجۇر. بيزنەس وكىلدەرى مەملەكەتتى دامىتۋ ىسىندە وتە ماڭىزدى ءرول اتقارادى. مەن كاسىپكەرلەرمەن كەزدەسكەندە بيزنەستىڭ الەۋمەتتىك جاۋاپكەرشىلىگى تۋرالى ءجيى ايتامىن. مۇنىڭ ايرىقشا ءمان-ماڭىزى بار», دەدى پرەزيدەنت.
بۇدان سوڭ, ول وتاندىق بيزنەسكە اتسالىسىپ جۇرگەن كاسىپكەرلەرگە مەملەكەت جان-جاقتى قولداۋ كورسەتەتىنىن اتاپ ءوتتى.
«اتىراۋ وڭىرىندە ەل ومىرىنە بەلسەنە ارالاسىپ جۇرگەن مەتسەنات ازاماتتارىمىز بارشىلىق. وسى ورايدا, جەرگىلىكتى كاسىپكەرلەرگە جانە ءوڭىر تۇرعىندارىنا شىنايى ريزاشىلىعىمدى بىلدىرگىم كەلەدى. اتىراۋلىقتار ەلوردامىزدىڭ 20 جىلدىعىنا تاماشا تارتۋ جاساعانىن بۇكىل ەل بىلەدى. ەسىلدىڭ ۇستىنە سالىنعان بەكىرە بالىعى ءتارىزدى كوپىر – استانانىڭ كوركىن اشا تۇسكەن بىرەگەي نىساننىڭ ءبىرى.
سول سياقتى تۇركىستانداعى « ۇلى دالا ەلى» ورتالىعى – اتىراۋ جۇرتىنىڭ سىيى. مۇنى مەملەكەت تە, حالقىمىز دا جوعارى باعالايدى. ارينە, باسقا ايماقتار دا ورتاق ىسكە ءوز ۇلەسىن قوسىپ كەلەدى. وسىنداي جاناشىرلىق پەن ىنتىماقتىڭ ارقاسىندا ەلدىگىمىز نىعايادى», دەدى مەملەكەت باسشىسى.
سونداي-اق ول كەلەشەكتە ايماقتاردان وسىنداي سىيلىقتار تالاپ ەتىلمەيتىنىن, ءاربىر وبلىس ءوز كۇشىمەن, ۇكىمەتتىڭ كومەگىمەن, ينۆەستورلاردىڭ قولداۋىمەن ءوز جۇمىستارىن وزدەرى اتقارۋى كەرەگىن ايتتى.
