«وڭىرلەردەگى مەكتەپتەردى دامىتۋ كەرەك. سوندىقتان وقۋ اعارتۋ مينيسترلىگى اكىمدىكتەرمەن بىرلەسىپ, ايماقتارداعى مەكتەپتەردىڭ قىزمەتىنە تالداۋ جۇرگىزۋى كەرەك. سونداي-اق مەكتەپتى دامىتۋ باعدارلاماسىن ازىرلەۋگە قاجەتتى ادىستەمە دايىنداۋعا ءتيىس», دەدى پرەزيدەنت ءوڭىر جۇرتشىلىعىمەن كەزدەسۋ بارىسىندا.
قاسىم-جومارت توقاەۆ ءوز سوزىندە جاقىندا ءبىلىم بەرۋدى دامىتۋدىڭ 2022-2026 جىلدارعا ارنالعان تۇجىرىمداماسى بەكىتىلەتىنىن تىلگە تيەك ەتتى.
«جاقىندا بەكىتىلەتىن تۇجىرىمدامانى ىسكە اسىرۋ ءۇشىن قۇزىرلى ورگاندار ءتيىستى شارالاردى ۋاقىتىلى قابىلداۋى كەرەك. وڭىرگە قاجەتتى كاسىبي كادرلاردى دايارلاۋ ىسىنە باسا نازار اۋدارعان ءجون. مەملەكەت جىل سايىن ءبىلىم گرانتىنىڭ سانىن كوبەيتىپ جاتىر. بيىل جوعارى وقۋ ورىندارىنا 73 مىڭ گرانت بەرىلدى. بۇعان قوسا مەن باتىس وبلىستارىنىڭ تۇلەكتەرى ءۇشىن قوسىمشا 10 مىڭ گرانت ءبولۋدى تاپسىردىم. سونىڭ 6 مىڭى ماڭعىستاۋعا بەرىلدى. بىراق بۇل گرانتتىڭ تورتتەن ءبىرى عانا يگەرىلگەن. بۇل – تۇسىنىكسىز جاعداي. ونىڭ ۇستىنە وبلىستا بىلىكتى ماماندارعا دەگەن سۇرانىس وتە جوعارى ەكەنى بەلگىلى. اشىعىن ايتساق, جوعارى وقۋ ورىندارى جانە قۇزىرلى مينيسترلىك كاسىبي باعدار بەرۋ جۇمىستارىن ويداعىداي اتقارماي وتىر», دەدى ەل پرەزيدەنتى.
ونىڭ ايتۋىنشا, تۇلەكتەرگە جانە اتا-انالارعا قوسىمشا گرانت بولىنگەنى تۋرالى تولىق اقپارات جەتپەي جاتادى. وسى رەتتە مەملەكەت باسشىسى عىلىم جانە جوعارى ءبىلىم مينيسترلىگىنە ارنايى ءبىلىم بەرۋ گرانتتارى تۋرالى اقپاراتتىق-ءتۇسىندىرۋ جۇمىستارىن ءتيىستى دەڭگەيدە جۇرگىزۋدى تاپسىردى.
«ايماقتا جاستاردىڭ گرانتپەن ءبىلىم الۋى, مامان تاپشىلىعى, تۇپتەپ كەلگەندە وبلىستىڭ دامۋى – ءبارى ءوزارا تىعىز بايلانىستى ماسەلە. سوندىقتان وبلىس اكىمى بۇل ماسەلەنى مۇقيات قاراستىرۋى كەرەك», دەپ تۇيىندەدى قاسىم-جومارت كەمەل ۇلى.
