بۇل تۋرالى پرەمەر-ءمينستردىڭ ءباسپاسوز قىزمەتى اقپارات تاراتتى.
وقۋ-اعارتۋ مينيسترلىگى حالىقتىڭ الەۋمەتتىك وسال توپتارىنان شىققان بالالارعا مەملەكەتتىك تاپسىرىس شەڭبەرىندە جەكەمەنشىك مەكتەپتەردە وقۋ كەزىندە جاپپاي وقىتۋ قورىنان كومەك الۋعا مۇمكىندىك بەرۋدى ۇسىندى. بۇل قاراجات بالالاردى مەكتەپ فورماسىمەن, تاماقپەن قامتاماسىز ەتۋ سياقتى جۇمىستارعا جۇمسالماق. قازىرگى ۋاقىتتا بۇل نورما مەملەكەتتىك مەكتەپتەردە عانا قولدانىلادى. پرەمەر-مينيستر بۇل ۇسىنىستى قولدادى.
سونداي-اق قيىن جاعدايعا تاپ بولعان جانە مەملەكەتتىك تاپسىرىس الاتىن بالاباقشالارعا بارۋعا مۇمكىندىگى جوق وتباسىلاردان شىققان بالالار ءۇشىن تاماقتانۋعا اقى تولەۋ تەتىگىن ىسكە اسىرۋ ماسەلەسى قارالدى. بۇل شارانى 2023 جىلدىڭ باسىندا ىسكە قوسىلاتىن «وتباسىنىڭ تسيفرلىق كارتاسى» سەرۆيسى ارقىلى جۇزەگە اسىرۋ ۇسىنىلدى. الداعى ۋاقىتتا ازىق-ت ۇلىك شىعىندارىن تولەۋ ءۇشىن داعدارىس جاعدايىنداعى وتباسىلاردان شىققان بالالار انىقتالادى.
ءاليحان سمايىلوۆ مەملەكەتتىك ورگانداردىڭ قاجەتتى اقپاراتتىق جۇيەلەرىن ينتەگراتسيالاۋدى اياقتاۋدى جانە وسى باستامانى قارجىلاندىرۋ تەتىگىن پىسىقتاۋدى تاپسىردى. بۇل رەتتە ول قاراجاتتى ماقساتسىز پايدالانۋدى بولدىرماۋ ءۇشىن ولاردىڭ ءتيىمدى يگەرىلۋىن باقىلاۋدى قامتاماسىز ەتۋ قاجەتتىگىنە نازار اۋداردى.
«پرەزيدەنتتىڭ تاپسىرماسى بويىنشا ءبىز ءبىلىم بەرۋگە قوماقتى قاراجات بولەمىز جانە جاڭا باستامالاردى ىسكە اسىرۋعا قوسىمشا اقشا بولۋگە دايىنبىز, بىراق ساپا مەن ءتيىستى باقىلاۋدى قامتاماسىز ەتۋ قاجەت», دەدى ءاليحان سمايىلوۆ.
سونىمەن قاتار كەڭەسكە قاتىسۋشىلار ورتالىقتاندىرىلعان دەڭگەيدە بالاباقشالارعا بىرىڭعاي كەزەكتى ىسكە قوسۋ ماسەلەسىن تالقىلادى, بۇل بيۋدجەت قاراجاتىن ۇنەمدەۋگە جانە ورىنداردى ءبولۋ كەزىندە سىبايلاس جەمقورلىقتى بولدىرماۋعا مۇمكىندىك بەرەدى. اتاپ ايتقاندا, ەكىنشى دەڭگەيدەگى بانكتەر قوسىمشالارى مەن Egov ارقىلى كەزەككە تۇرۋ جانە ءتيىستى جولداما الۋ قاراستىرىلعان.
ءاليحان سمايىلوۆ بۇل باستامانى قولداپ, جاڭا جۇيەدە ۇيىمداستىرۋشىلىق ءتارتىپتى, ونىڭ ىشىندە قوسارلانعان كەزەكتى بولدىرماۋدى, بالالاردىڭ دەرەكتەرىن تەكسەرۋدى جانە تولىق قامتاماسىز ەتۋدىڭ ماڭىزدىلىعىن اتاپ ءوتتى.
سونداي-اق كەڭەستە مەكتەپتەردە اعىلشىن ءتىلىن وقىتۋدىڭ ساپاسىن جاقسارتۋدىڭ جاڭا تاسىلدەرى, مۇعالىمدەردىڭ بىلىكتىلىگىن ارتتىرۋ, ءبىلىم بەرۋ ۇيىمدارىن ساپالى ينتەرنەتپەن قامتاماسىز ەتۋ, پەداگوگ-اسسيستەنتتەردىڭ ارنايى شتاتتارىن ەنگىزە وتىرىپ, ەرەكشە ءبىلىم بەرۋ قاجەتتىلىكتەرى بار بالالار ءۇشىن بالاباقشالاردىڭ قولجەتىمدىلىگىن كەڭەيتۋ, مەكتەپ پەداگوگتەرىن جاپپاي وقىتۋ قورى بويىنشا تولەمدەردى بەلگىلەۋ بولىگىندە كاسىبي قۇزىرەتىنە جاتپايتىن فۋنكتسيالاردان بوساتۋ, كوللەدجدەردىڭ تەحنيكالىق بازاسىن جاڭارتۋ, تاربيەشىلەردىڭ مارتەبەسىن جانە جالاقىسىن كوتەرۋ ماسەلەلەرى, سونداي-اق باسقا دا بىرقاتار باستاما قارالدى.
