دەسە دە كەيىنگى ءۇش الەم چەمپيوناتىنىڭ فينالىندا ونەر كورسەتكەن جەرلەستەرىمىز ليۆەرپۋلدەگى دودادا دا باس جۇلدە ءۇشىن تالاسىپ كوردى. بىراق فينالعا شىققان ەكى جەرلەسىمىزگە دە الەم چەمپيوناتىنىڭ جۇلدەسى بۇيىرمادى. ماسەلەن, ەرلەر اراسىنداعى ەركىن جاتتىعۋ باعدارلاماسىنىڭ ىرىكتەۋ كەزەڭىندە 14,733 ۇپاي جيناپ, ءۇشىنشى ورىنمەن فينالدىق سايىسقا جولداما العان ميلاد كاريمي باس جۇلدە ءۇشىن وتكەن سايىستا ءوز مۇمكىندىگىن تولىق پايدالانا الماي, سوڭعى ورىندا قالىپ قويدى. ول ءتىپتى ىرىكتەۋدەگى جەتىستىگىن دە قايتالاي الماي, 12,100 ۇپايمەن 8-ساتىدان كورىندى.
ەركىن جاتتىعۋ باعدارلاماسىندا جەرگىلىكتى سپورتشى دجارنني رەگيني-موراننىڭ باعى جاندى. 2014 جىلعى جاستار اراسىنداعى وليمپيادا جەڭىمپازى اتانعان ول الەم چەمپيوناتىنىڭ فينالىندا 14,533 ۇپاي جيناپ, التىننان القا تاقتى. ءبىر ايتا كەتەرلىگى, رەگيني-موراننىڭ بۇل التىنى ۇلىبريتانيا قۇراماسىنىڭ وسى الەم چەمپيوناتىنداعى العاشقى التىنى بولدى. ال كۇمىس جۇلدە توكيو وليمپياداسىنىڭ ەكى باعدارلاماسىندا (كوپسايىس پەن ماڭدايشا) توپ جارعان جاپونيالىق دايكي حاسيموتوعا (14,500 ۇپاي) بۇيىرسا, قولا مەدال تاعى ءبىر جاپونيالىق دوي ريوسۋكەكەنىڭ (14,266 ۇپاي) ەنشىسىندە كەتتى.
ال فينالدىق سايىستا باق سىناعان تاعى ءبىر قازاقستاندىق ناريمان قۇربانوۆ ات سناريادى باعدارلاماسىندا جۇلدەگە سىنىق سۇيەم قالعاندا ءسۇرىنىپ, الەم چەمپيوناتىن ءتورتىنشى ورىنمەن اياقتادى. جەرلەسىمىز ىرىكتەۋ سايىستارىندا 15,033 ۇپاي جيناپ, فينالعا ءۇشىنشى ورىنمەن جولداما العان بولاتىن. ال سەنبى كۇنى وتكىزىلگەن فينالدا قۇربانوۆ تا ىرىكتەۋ سايىسىنداعى جەتىستىگىن قايتالاي الماي, 14,533 ۇپايمەن ءتورتىنشى ساتىدا قالىپ قويدى. ەڭ وكىنىشتىسى, وسى باعدارلامادا قولا جۇلدەگەر اتانعان 38 جاستاعى ارمەنيالىق ارۋتيۋن مەردينيان جەرلەسىمىزدەن نەبارى 0,200 ۇپايعا وزىپ, ءۇشىنشى ورىنعا تابان تىرەدى.
ات جاتتىعۋىندا 15,300 ۇپاي جيناعان يرلانديالىق سپورتشى ريس ماك كلەناگاننىڭ اتى وزدى. ول 2019 جىلى گەرمانيانىڭ شتۋتگارت قالاسىندا ۇيىمداستىرىلعان الەم چەمپيوناتىندا قولا جۇلدەگەر اتانعان بولاتىن. يوردانيالىق احماد ءابۋ ءال-سۋد 14,866 ۇپايمەن ەكىنشى ورىننان كورىنىپ, ءوز ەلىنە الەم چەمپيوناتىنىڭ العاشقى مەدالىن سىيلادى.
بيىلعى ازيا چەمپيوناتى مەن 2019 جىلعى جازعى ۋنيۆەرسيادا ويىندارىنىڭ كۇمىس جۇلدەگەرى, ءبىرتالاي الەم كۋبوگى كەزەڭىندە ولجا سالعان ناريمان قۇربانوۆ وسىمەن ءۇشىنشى مارتە الەم چەمپيوناتىندا فينالدا ونەر كورسەتتى. 2018 جىلعى دوحاداعى جاھاندىق دودادا ات جاتتىعۋىندا بەسىنشى ورىننان كورىنسە, 2021 جىلى جاپونيانىڭ كيتاكيۋسيۋ قالاسىندا وتكەن الەم بىرىنشىلىگىندە ستيۆەن نەدوروسيك (اقش), ۆەن حاو (قىتاي) جانە كادزۋما كايانى (جاپونيا) العا وزدىرعان قۇربانوۆ ءتورتىنشى ورىندى قاناعات تۇتتى.
قۇربانوۆتىڭ بۇل جەتىستىگى قازاقستاندىق گيمناستتاردىڭ 1997 جىلدان بەرگى الەم چەمپيوناتتارىنداعى ەڭ ۇزدىك كورسەتكىشى بولىپ تۇر. سول جىلى لوزاننادا ۇيىمداستىرىلعان باسەكەدە سەرگەي فەدورچەنكو اعاش اتتان سەكىرۋدەن چەمپيون اتانعان. بۇل – قازاقستان قۇراماسىنىڭ الەم چەمپيوناتتارىنىڭ تاريحىندا سپورتتىق گيمناستيكادان العان العاشقى التىنى جانە ازىرگە دەيىنگى جالعىز جۇلدەسى بولىپ تۇر.
