ازيا چەمپيوناتىنىڭ العاشقى اپتاسىندا قايرات ءساتجانوۆ جاتتىقتىراتىن قازاقستان ۇلتتىق قۇراماسىنىڭ بەس وكىلى شارشى الاڭعا كوتەرىلىپ, سونىڭ تورتەۋى جارىستى ءارى قاراي جالعاستىرۋعا مۇمكىندىك الدى. وكىنىشكە قاراي, 63,5 كيلو سالماقتا جۇدىرىقتاسقان ءساناتالى تولتاەۆ بىرىنشىلىكتى ەكىنشى كەزەڭنەن اياقتاۋعا ءماجبۇر بولدى.
ال جارىستىڭ ءتورتىنشى كۇنىندە ءۇش بوكسشىمىز ەكىنشى اينالىمداعى جەكپە-جەكتەرىن وتكىزىپ, بارلىعى دا جانكۇيەرلەردى جەڭىسىمەن قۋانتتى. اتاپ ايتار بولساق, بىلتىر 67 كيلو سالماقتا ەل چەمپيونى اتانعان جامبىلدىق جامپوز دۋلات بەكباۋوۆ ازيا چەمپيوناتىنداعى العاشقى كەزدەسۋىن تۇرىكمەنستاندىق ساپارمۋرات وداەۆپەن وتكىزىپ, قارسىلاسىن ايقىن باسىمدىقپەن تىزە بۇكتىردى – 5:0. بيىلعى جاستار اراسىنداعى ازيا بىرىنشىلىگىنىڭ كۇمىس جۇلدەگەرى اتانعان وداەۆ ءۇش راۋندتا دا جەرلەسىمىزگە ەش قارسىلىق كورسەتە المادى. وليمپيادا, الەم جانە ازيا بىرىنشىلىكتەرىنىڭ چەمپيوندارى مەن جۇلدەگەرلەرىن تاربيەلەپ شىعارعان تاجىريبەلى جاتتىقتىرۋشى نۇرلان اقۇرپەكوۆتەن ءتالىم الاتىن د.بەكباۋوۆ كەشەگى شيرەك فينالدىق سايىستا قىرعىزستاندىق جاقسىلىق تالايبەكوۆپەن كۇش سىناستى.
سونداي-اق كۇندىزگى سەسسيادا 71 كيلو سالماق دارەجەسىندە ونەر كورسەتكەن قازاقستان ۇلتتىق قۇراماسىنىڭ كاپيتانى, جامبىل وبلىسىنىڭ تاعى ءبىر وكىلى اسلانبەك شىمبەرگەنوۆ تە ارتىق كۇش جۇمساماي شيرەك فينالعا جولداما الدى. 2018 جىلعى ازيا ويىندارىنىڭ كۇمىس جۇلدەگەرى, قازاقستاننىڭ ەكى دۇركىن چەمپيونى دەگەن دارداي اتاعى بار اسلانبەك سارى قۇرلىق دوداسىنىڭ 1/8 فينالىندا فيليپپيندىك پيانار مارجوندى ەكىنشى راۋندتا ەسىنەن تاندىردى. ءبىرىنشى راۋندتا جەرلەسىمىز بەلسەندى بولعانىمەن, بەس تورەشىنىڭ ۇشەۋى عانا جەڭىستى شىمبەرگەنوۆكە بەردى. ەكىنشى ءۇش مينۋتتىقتا ىسكە كىرىسكەن قازاقستاندىق بوكسشى قارسىلاسىن ءبىرىنشى نوكداۋنعا جىبەرىپ, كەيىننەن اۋىر سوققىسىمەن نوكاۋتقا ءتۇسىردى. فيليپپيندىك بوكسشىنىڭ جارىستى ءارى قاراي جالعاستىرا المايتىنى بەلگىلى بولعان سوڭ, تورەشى جەكپە-جەكتى توقتاتىپ, جەڭىستى وتانداسىمىزعا بەردى. اسلانبەك كەلەسى كەزدەسۋىن بۇگىن ۇندىستاندىق ساچينمەن وتكىزەدى.
كەشكى سەسسيادا قازاقستان قۇراماسىنىڭ ءبىر وكىلى جۇدىرىقتاسىپ, جارىستىڭ ءتورتىنشى كۇنىن جەڭىسپەن تۇيىندەدى. بىلتىر عانا جاستار اراسىنداعى الەم چەمپيوناتىندا اتوي سالىپ, كەيىننەن ەل بىرىنشىلىگىندە دە مىقتىلىعىن دالەلدەگەن ەڭ جەڭىل سالماقتاعى (48 كيلو) سانجار تاشكەنباي ەرەسەكتەر دۋىنا ەركىن ارالاسىپ كەتتى. دارىندى جەرلەسىمىز ازيا چەمپيوناتىنداعى ءبىرىنشى كەزدەسۋىن 22 جاسقا دەيىنگىلەر اراسىنداعى بيىلعى ازيا چەمپيوناتىندا توپ جارعان وزبەكستاندىق اسىلبەك جاليلوۆپەن وتكىزىپ, شيرەك فينالعا شىقتى. قازاقستاندىق بوكس جانكۇيەرلەرى اسىعا كۇتكەن ايقاستا قازاق بوكسشىسىنىڭ مەرەيى ۇستەم بولدى – 5:0. ءبىرىنشى راۋندتان باستاپ جەكپە-جەك تىزگىنىن ءوز قولىنا العان سانجار سوڭعى سەكۋندتارعا دەيىن قارقىنىن ءبىر ساتكە دە باسەڭدەتكەن جوق. ناتيجەسىندە, بەس تورەشى دە جەڭىستى وتانداسىمىزعا بەردى. بۇل – وسى بىرىنشىلىكتەگى قازاق-وزبەك تەكەتىرەسىندەگى ەكىنشى ايقاس بولاتىن. قازىرشە ەسەپ – 1:1. س.تاشكەنباي كەشە شيرەك فينالدا قىرعىزستاندىق ميرلان تۇرىكباي ۇلىمەن جۇدىرىقتاستى.
ال قازاقستاندىق بوكسشىلاردان ءبىرىنشى بولىپ شيرەك فينال باسەكەلەرىن باستاپ بەرگەن 51 كيلو سالماقتاعى وتانداسىمىز ساكەن بيبوسىنوۆ ەكىنشى كەزدەسۋىن دە ءساتتى اياقتادى. ەكىنشى اينالىمدا ۇندىستاندىق كۋمار سپارشتان 4:1 ەسەبىمەن ايلاسىن اسىرعان ساكەن ¼ فينالدا مالايزيالىق كايۋم ءاريففيندى جارىس جولىنان ىعىستىردى. جىل باسىندا عانا 48 كيلو سالماق دارەجەسىندە جاستار اراسىنداعى ازيا چەمپيوناتىندا باق سىناعان كايۋم اريففين اراعا 10 اي سالىپ ەرەسەكتەر دوداسىندا جاڭا سالماقتا باق سىناۋعا بەل بۋعان ەكەن. ازىرشە جاس بوكسشىنىڭ جولى بولار ەمەس. وسىلايشا, بىلتىرعى الەم چەمپيوناتىندا توپ جارعان جەرلەسىمىز ازيا بىرىنشىلىگىنىڭ جارتىلاي فينالىنا جولداما الىپ, ەل قورجىنىنا كەم دەگەندە قولا جۇلدە سالىپ وتىر. ءبىر ايتا كەتەرلىگى, ول 2021 جىلى دۋبايدا ۇيىمداستىرىلعان سارى قۇرلىق بىرىنشىلىگىندە قولا جۇلدەگەر اتانعان بولاتىن. ساكەن بيبوسىنوۆتىڭ بيىلعى دوداداعى باستى ماقساتى – ازيا چەمپيونى اتانۋ.
ەندى جەرلەسىمىز فينالعا شىعۋ ءۇشىن سەربياداعى الەم چەمپيوناتىنىڭ 54 كيلو سالماقتاعى جەڭىمپازى – جاپونيالىق تومويا تسۋبويمەن جۇدىرىقتاسادى. ول شيرەك فينالدا تايۆاندىق پو ۆەي تۋدى جەڭدى. ەكى بوكسشى اراسىنداعى جەكپە-جەك 10 قاراشاعا جوسپارلانعان.
ءشامىل سافيۋللين جەتەكشىلىك ەتەتىن قازاقستان ايەلدەر قۇراماسىنىڭ ازيا چەمپيوناتىنداعى ونەرىنە توقتالار بولساق, ازىرشە قىزدارىمىزدىڭ دا قارقىنى قۋانتارلىق جاعدايدا. دەگەنمەن 12 سالماقتا بارعان قازاقستاندىق بوكسشىلاردىڭ ەكەۋى ازيا بىرىنشىلىگىن شيرەك فينالدان اياقتاۋعا ءماجبۇر بولدى.
ماسەلەن, 1/4 فينالدا ءبىرىنشى كەزدەسۋىن وتكىزگەن 63 كيلوعا دەيىن سالماقتاعى جەرلەسىمىز ايدا ابىكەەۆا جاپونيالىق كيتو مايدەن تورەشىلەردىڭ ارالاس شەشىمىمەن جەڭىلسە, 2016 جىلعى الەم چەمپيونى, 2017 جىلعى ازيا چەمپيوناتىنىڭ كۇمىس جۇلدەگەرى ۆالەنتينا حالزوۆا توكيو وليمپياداسىنىڭ قولا جۇلدەگەرى ۇندىستاندىق لوۆلينا بورگوحايننەن ايلاسىن اسىرا المادى. 75 كيلو سالماقتا وتكەن جەكپە-جەكتە دە جەرلەسىمىز تورەشىلەردىڭ ارالاس شەشىمىمەن ۇتىلىپ قالدى.
دەگەنمەن وزگە بوكسشىلارىمىز جانكۇيەرلەرىن جارقىن جەڭىستەرىمەن قۋانتا الدى. اتاپ ايتقاندا, ەكى دۇركىن الەم چەمپيونى, بىلتىرعى ازيا بىرىنشىلىگىنىڭ جەڭىمپازى نازىم قىزايباي العاشقى جەكپە-جەگىندە تايلاندتىق چۋتحامات راكساتپەن كەزدەسىپ, ءبىر ۇپاي باسىمدىعىمەن جەڭىسكە جەتتى. جەرلەسىمىز كەشەگى شيرەك فينال باسەكەسىندە موڭعوليالىق مۋنگۋنساران بالسانمەن كۇش سىناستى.
سونداي-اق قىزدار اراسىنداعى شيرەك فينالدىق جەكپە-جەكتەردە شارشى الاڭعا كوتەرىلگەن جازيرا وراقباەۆا (52 كيلو) كورەيا وكىلى كيم چاە ۆوندى تورەشىلەر شەشىمىمەن قاپى قالدىرسا, قىزدار اراسىنداعى ەڭ ولجالى بوكسشىمىز جاينا شەكەربەكوۆا (54 كيلو) جاپونيالىق حان ناريتۋدى 5:0 ەسەبىمەن تىزە بۇكتىردى. 57 كيلوداعى كارينا يبراگيموۆا دا تورەشىلەردىڭ ءبىراۋىز شەشىمىمەن تاعى ءبىر كورەيالىق يم اە دجيننەن باسىم ءتۇستى. ال ريو وليمپياداسىنىڭ قولا جۇلدەگەرى داريعا شاكىموۆا (70 كيلو) ۇندىستاندىق پۋدجەيدى بەت قاراتپاي ۇتتى – 5:0.
بوكستان ەرلەر جانە ايەلدەر اراسىنداعى ازيا بىرىنشىلىگى 12 قاراشادا مارەسىنە جەتەدى.
