استانادا وسى جىلدىڭ 27 تامىزى مەن 30 قازانى ارالىعىندا اپتا سايىن وڭىرلىك كاسىپكەرلەردىڭ اۋىل شارۋاشىلىعى جارمەڭكەلەرى وتكىزىلدى. وسى ۋاقىت ىشىندە 15 وبلىستىڭ فەرمەرلەرى ەلورداعا 5500 توننادان استام ءونىم اكەلدى. بۇل ەت, كوكونىستەر, جەمىستەر, ۇن, ماكارون, بال, بالىق, كونديتەرلىك ونىمدەر, ءسۇت ونىمدەرى جانە باسقالار. ماۋسىم ايىنان باستاپ ءار دەمالىس كۇندەرى ەلوردا تۇرعىندارىنىڭ ازىق-ت ۇلىكتى نارىقتىق باعادان تومەن باعامەن ساتىپ الۋ مۇمكىندىگى بولدى. بۇگىن ءداستۇرلى جارمەڭكەنى ەلوردالىق كاسىپكەرلەر جالعاستىردى.
قالا تۇرعىنى ايكەرىم جۇماعۇلوۆا جارمەڭكەگە ءار دەمالىس سايىن كەلەتىنىن ايتتى.
«دەمالىس كۇندەردىڭ جارمەڭكەسى ءبىزدىڭ قالامىزدا ۇنەمى ءوتىپ تۇراتىنىنا قۋانىشتىمىز. ءبىز مۇندا كەلىپ ءسۇت ساتىپ الۋعا داعدىلانعانبىز. ماي مەن كىلەگەي دە وتە ءدامدى. كادىمگى دۇكەندەردە ولار مۇنداي ءدامدى ەمەس جانە باعاسى دا قىمباتىراق. ءسۇت ونىمدەرىنىڭ جارامدىلىق مەرزىمى قىسقا بولعاندىقتان, ءبىز قاجەتتى ءونىمدى تەك ءبىر اپتاعا الامىز. قالادا ءومىر ءسۇرىپ, اۋىلدىڭ مايى مەن كىلەگەيىمەن تاماقتانعان قانداي جاقسى. جارمەڭكەلەر جالعاسا بەرسىن», دەيدى استانالىق ايەل قولىنداعى كىلەگەي مەن ءسۇت سالىنعان پاكەتتى كورسەتىپ.
ءداستۇرلى اۋىل شارۋاشىلىعى جارمەڭكەسىندە تاۋار وندىرۋشىلەردىڭ, كاسىپكەرلەردىڭ جانە استانانىڭ كوتەرمە ساتۋشىلارىنىڭ قاتىسۋىمەن ازىق-ت ۇلىك تاۋارلارىنىڭ الۋان ءتۇرى ۇسىنىلعان. مۇندا كوكونىستەر, جەمىستەر, ەت جانە ءسۇت ونىمدەرى, بالىق, بال جانە باسقالارى ارزان باعامەن ساتىلادى.
ايتا كەتەيىك, جارمەڭكە اپتا سايىن سەنبى جانە جەكسەنبى كۇندەرى «استانا-ارەنا» ستاديونىنىڭ تۇراق ايماعىندا وتەدى.
