«جاقسىلىق اريفمەتيكاسى» وقۋ ورتالىعىندا جاسوسپىرىمدەر باسەكەگە قابىلەتتى, ساپالى ءبىلىم الادى.
ونىڭ اشىلۋ سالتاناتىنا استانا اكىمىنىڭ ورىنباسارى ەسەت بايكەن, ەلوردالىق باسقارمالاردىڭ باسشىلارى جانە سارىارقا اۋدانى اكىمدىگىنىڭ وكىلدەرى قاتىستى.
ەسەت بايكەن مۇنداي مەكەمەلەردىڭ سانىن كوبەيتۋ قاجەت ەكەنىن اتاپ ءوتتى.
ء«بىزدىڭ قالامىزدا 200 مىڭ بالا وقيتىن 150-دەن استام قوسىمشا ءبىلىم بەرۋ ورتالىعى بار. الايدا, ەلوردانىڭ كەيبىر اۋداندارىندا ولار ءالى دە جەتىسپەيدى. اتاپ ايتقاندا, جاڭا ورتالىق ورنالاسقان سارىارقا اۋدانىنىڭ تۇرعىندارىنان بۇرىن بالالارعا ارنالعان دەمالىس مەكەمەلەرىنىڭ جەتىسپەۋشىلىگى تۋرالى كوپتەگەن وتىنىشتەر كەلىپ تۇسكەن. مۇنداي ورتالىقتاردىڭ اشىلۋى قاجىرلى ەڭبەك پەن شىدامدىلىقتى قاجەت ەتەدى. بۇل ماسەلەنى تەك ءوز كاسىبىن جاقسى كورەتىن جانقيار ادامدار عانا قابىلداي الادى. ەلوردادا وسىنداي ورتالىقتاردىڭ اشىلۋى جالپى ءبىلىم بەرۋ جۇيەسى سالاسىندا وتە ءتيىمدى», دەپ تولىقتىردى اكىمنىڭ ورىنباسارى.
جاڭا ورتالىقتىڭ ديرەكتورى ۇلجان مىرزاعاليەۆا مەكەمەنىڭ اشىلۋىنا جانە ونىڭ جۇمىسىن جانداندىرۋعا ۇلكەن قولداۋ كورسەتكەن استانا اكىمدىگىنە العىسىن ءبىلدىردى.
«جاڭا ورتالىقتىڭ ماقساتى-كوپبالالى جانە از قامتىلعان وتباسىلاردان شىققان بالالاردى تەگىن جانە 50 پايىزدىق جەڭىلدىكپەن وقىتۋ. مۇندا 300-گە دەيىن ادام وقي الادى. ورتالىقتىڭ باعدارلاماسىندا 10 ءپان بار. قالا اكىمدىگىنىڭ قولداۋىمەن ءبىز جۇمىسقا قاجەتتى قىزمەتكەرلەر سانىن قابىلدادىق. سونىمەن قاتار, بىزگە جاڭا ورتالىق ءۇشىن عيماراتتى قولايلى باعامەن جالعا الۋعا مۇمكىندىك بەرىلدى», دەيدى ۇلجان مىرزاعاليەۆا.
اشىق وقۋ ورتالىعىنىڭ سىيىمدىلىعى-350-400 ورىن. ءبىلىم بەرۋ نىسانى «جاقسىلىق اريفمەتيكاسى» قوعامدىق قورى مەن استانا قالاسى اكىمدىگىنىڭ قولداۋىمەن اشىلدى. توعىزقۇمالاق, روبوتوتەحنيكا, مەنتالدىق اريفمەتيكا, ۆوكال ۇيىرمەلەرى بار. ءسىز سونداي-اق, لوگوپەد مامانىنىڭ قىزمەتتەرىن پايدالانا الاسىز.
