«بۇگىن مەملەكەت باسشىسى 16 ناۋرىزدا ەل حالقىنا ارنالعان جولداۋىندا ايتىلعان ساياسي باستامالارىن جۇزەگە اسىرۋعا باعىتتالعان التى زاڭعا قول قويدى. وزدەرىڭىزگە ءمالىم, قاسىم-جومارت توقاەۆ پرەزيدەنت بولىپ سايلانعالى بەرى ساياسي قايتا قۇرۋلاردى كەزەڭ-كەزەڭىمەن دايەكتى تۇردە جۇزەگە اسىرىپ كەلەدى. وسى جىلدار ىشىندە ساياسي رەفورمالاردىڭ ءتورت پاكەتى ىسكە اسىرىلىپ, ونىڭ اياسىندا ساياسي پروتسەستىڭ باسەكەلەستىگى مەن ترانسپارەنتتىلىگىن ارتتىرۋعا باعىتتالعان 13 زاڭ قابىلداندى», دەپ جازدى ەرلان قارين ءوزىنىڭ Telegram ارناسىندا.
مەملەكەتتىك كەڭەسشىنىڭ ايتۋىنشا, ساياسي رەفورمالاردىڭ تاعى ءبىر پاكەتىن مەملەكەت باسشىسى ناۋرىز ايىنداعى جولداۋىندا ۇسىندى ونى ماۋسىمداعى كونستيتۋتسيالىق رەفەرەندۋم ارقىلى جۇزەگە اسىردى.
«كونستيتۋتسيالىق رەفورما – قولدانىستاعى زاڭناماعا وزگەرىستەر مەن تولىقتىرۋلار ەنگىزۋدى تالاپ ەتكەنى انىق. ۇكىمەت كونستيتۋتسيالىق وزگەرىستەردى كورسەتەتىن ءتيىستى زاڭ جوبالارىن ازىرلەپ, قىركۇيەكتە پارلامەنتتىڭ قاراۋىنا جىبەرىلدى. بۇل زاڭدار الدىمەن ماجىلىستە مۇقيات جانە جان-جاقتى قارالىپ, ماقۇلداندى, سودان كەيىن سەناتقا جىبەرىلدى. بۇگىنگى تاڭدا پرەزيدەنت اتالعان زاڭدارعا قول قويدى. التى زاڭنىڭ قابىلدانۋى پرەزيدەنتتىڭ وكىلەتتىكتەرىن بيلىكتىڭ باسقا ينستيتۋتتارىنا قايتا بولۋگە, بيلىكتىڭ وكىلدى تارماعىن قايتا فورماتتاۋعا, سايلاۋ جۇيەسىن جەتىلدىرۋگە, قۇقىق قورعاۋ ينستيتۋتتارىن نىعايتۋعا, سونداي-اق مەملەكەتتىك باسقارۋ جۇيەسىن جاڭعىرتۋعا اكەلمەك», دەدى مەملەكەتتىك كەڭەسشى.
بۇدان بۇرىن مەملەكەت باسشىسى بيىل ماۋسىم ايىندا وتكەن كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋمنان كەيىن قابىلدانعان بىرقاتار ماڭىزدى زاڭعا جاريا تۇردە قول قويعانىن حابارلاعان ەدىك.
