مادەنيەت جانە سپورت ءمينيسترى داۋرەن اباەۆ ارحيۆ ءىسى سالاسىندا جۇزەگە اساتىن بىرقاتار جوبا تۋرالى ايتىپ, وزەكتى ماسەلەلەرگە دە توقتالدى.
ء«بىز – تارلان تاريحىن تاسقا جازعان, ۇلت شەجىرەسىنە ۇقىپتى, رۋحاني دىڭگەگى بەرىك حالىقتىڭ ۇرپاعىمىز. كوشپەلى عۇمىر كەشكەن اتا-بابا جولىن زەردەلەۋدە كەز كەلگەن تاريحي جادىگەر ءبىز ءۇشىن باعا جەتپەس بايلىق, قۇندى قازىنا. كەيدە ارحيۆتىك قۇجاتتاعى جالعىز جازبا تۇتاس ۇلتتىڭ تاعدىرىن شەشىپ كەتۋى مۇمكىن. سوندىقتان, بۇگىنگى باسقوسۋمىزدىڭ ءمانى وسى تۇرعىدان ايرىقشا», دەپ اتاپ ءوتتى داۋرەن اباەۆ.
مينيستر كەشەندى جوسپار اياسىندا سالاعا قاتىستى نورماتيۆتىك قۇقىقتىق بازانى جەتىلدىرۋ, مەملەكەتتىك ارحيۆتەردىڭ ماتەريالدىق-تەحنيكالىق جاعدايىن نىعايتۋ, ۇلتتىق ارحيۆ قورلارىن تولىقتىرۋ بويىنشا جۇمىستاردى جۇرگىزۋ قاجەت ەكەنىن ايتتى. سونداي-اق سالا ماماندارىنا حالىقارالىق ىنتىماقتاستىقتى كەڭەيتە وتىرىپ ەل تاريحىنا قاتىستى ارحيۆتىك قۇجاتتاردى عىلىمي اينالىمعا ەنگىزۋ جۇمىستارىن جانداندىرۋدى تاپسىردى.
«ارحيۆشىلەردەن قۇرالعان عىلىمي ەكسپەديتسيا مۇشەلەرى بۇگىندە 7000-نان استام قۇجات, ونىڭ ىشىندە 445 فوتوقۇجات, 206 كىتاپ پەن سيرەك قولجازبالاردى ساتىپ الدى. اكەلىنگەن قۇجاتتار مەن ماتەريالداردىڭ حرونولوگيالىق كەزەڭى 918-1990 جىلدار ارالىعىن قامتيدى. قۇجاتتار تسيفرلاندىرىلدى جانە ولاردىڭ نەگىزگى بولىگى قازاقستان رەسپۋبليكاسىنىڭ ۇلتتىق ارحيۆىنە مەملەكەتتىك ساقتاۋعا قابىلداندى. بۇل جۇمىستىڭ ماڭىزدىلىعى جوعارى», دەدى مينيستر داۋرەن اباەۆ.
ەلىمىزدىڭ مەملەكەتتىك ارحيۆتەرى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قىزمەتى اياسىندا قوسىمشا جۇمىستار جۇرگىزدى. قازىرگى تاڭدا اتالعان تاقىرىپ بويىنشا قۇپياسىزداندىرۋعا جاتاتىن قۇجاتتار ءتىزىمى دايىندالدى. الداعى ۋاقىتتا مەملەكەتتىك كوميسسيا قىزمەتىنىڭ قورىتىندىسى بويىنشا كوپشىلىكتىڭ يگىلىگىنە اينالاتىن عىلىمي ەڭبەكتەر مەن قۇجاتتاردىڭ جيناقتارى شىعارىلاتىن بولادى. بۇل تۋرالى مينيستر كونفەرەنتسيا بارىسىندا ايتتى. ءارى وسكەلەڭ ۇرپاقتى ارحيۆ سالاسىنىڭ جۇمىسىمەن جاقىنىراق تانىستىرۋدىڭ ماڭىزىنا توقتالدى.
«كەلەسى جىلى «جاس ءارحيۆشى» رەسپۋبليكالىق عىلىمي جۇمىستار كونكۋرسى ۇيىمداستىرىلادى. وتىنىمدەر 4 نوميناتسيا بويىنشا قابىلدانادى: «قازاقستان تاريحى», «ارحيۆ قۇجاتتارىنداعى ولكە تاريحى», «تۇلعا تاريحى», «وتباسى تاريحى». كونكۋرستىڭ باستى تالابى – ارحيۆ قۇجاتتارى نەگىزىندە عىلىمي جۇمىستار دايىنداۋ. ودان بولەك, ارحيۆ قىزمەتكەرلەرىن ىنتالاندىرۋ ماقساتىندا «ۇزدىك ادىستەمەلىك دايىنداۋ», «قازاقستاننىڭ ۇزدىك ءارحيۆى» جالپى رەسپۋبليكالىق كونكۋرستارى وتەدى», دەدى مينيستر داۋرەن اباەۆ.
ايتا كەتەيىك, بيىل مينيسترلىكتىڭ باستاماسىمەن «ارحيۆ جانە بولاشاق ۇرپاق» اتتى رەسپۋبليكالىق جوباسى ۇيىمداستىرىلدى. ونىڭ اياسىندا بارلىق مەملەكەتتىك ارحيۆتەردىڭ ەسىگى مەكتەپ, كوللەدج, جوو ستۋدەنتتەرى ءۇشىن اشىق بولدى, ءبىر كۇندە 11 مىڭ وقۋشى مەن ستۋدەنتتى قامتيتىن 552 ءىس-شارا ءوتتى.
ودان بولەك, بيىل سالا ماماندارى قۇجاتتاردى انىقتاۋ بويىنشا گەرمانيا, پولشا, چەحيا, تۇركيا, فرانتسيا, ماجارستان, ءۇندىستان, يران, كاتار سياقتى جالپى سانى 14 ەلدە عىلىمي ەكسپەديتسيالار جۇرگىزدى.
«ارحيۆ قوعام ومىرىندە ۇلكەن ءرول اتقارادى. ەلدەگى ارحيۆ ماتەريالدارىنىڭ قاتپارلارى نەعۇرلىم كولەمدى بولسا, ەل حالقىنىڭ ءوزى تۋرالى ەستە ساقتاۋ قابىلەتى سوعۇرلىم تەرەڭ ءارى سەنىمدى بولادى. ارحيۆتەردىڭ جوعالۋى ءىشىنارا امنەزياعا ۇقساس – كوپتەگەن ماڭىزدى ەستەلىكتەر جويىلسا, جادىدا وقيعالاردىڭ جەكەلەنگەن ۇزىكتەرى, ب ۇلىڭعىر بەينەلەر ساقتالادى. سوندىقتان سىزدەردىڭ اتقارىپ جاتقان جۇمىستارىڭىز وتە ماڭىزدى», دەدى داۋرەن اباەۆ.
