كوميتەت توراعاسى ءالي بەكتاەۆ وتىرىستى اشا كەلىپ, مەملەكەت باسشىسى قاسىم-جومارت توقاەۆتىڭ اۋىل شارۋاشىلىعىن دامىتۋعا زور ماڭىز بەرەتىنىن جانە دە مال باسىنىڭ ساۋلىعى مەن ونىمدىلىگى ۆەتەريناريا سالاسىن جەتىلدىرۋگە جانە جەرگىلىكتى جەردەگى مامانداردىڭ ءتيىمدى جۇمىسىنا بايلانىستى ەكەنىن اتاپ ءوتتى.
«ساپار ماقساتى – ۆەتەريناريا قىزمەتىن ودان ءارى دامىتۋعا, وتاندىق ۆەتەريناريانى عىلىمي جانە كادرلارمەن قامتاماسىز ەتۋ جانە ەلىمىزدىڭ مال ءوسىرۋ شارۋاشىلىعىنىڭ تۇراقتى ءال-اۋقاتى مەن مال شارۋاشىلىعى ونىمدەرىنىڭ قاۋىپسىزدىگىن قامتاماسىز ەتۋگە باعىتتالعان مەملەكەتتىڭ ساياساتىن تالقىلاۋ», دەدى ءالي بەكتاەۆ.
اۋىل شارۋاشىلىعى ءمينيسترىنىڭ ورىنباسارى رۇستەم قۇرمانوۆ ۆەتەريناريا جۇيەسىن رەفورمالاۋ اياسىندا قوردالانعان ماسەلەلەردى شەشۋگە توقتالدى. دەنساۋلىق ساقتاۋ ءمينيسترىنىڭ ورىنباسارى – باس مەملەكەتتىك سانيتارلىق دارىگەر ايجان ەسماعامبەتوۆا وبلىستاعى ەپيدەميولوگيالىق جاعدايدىڭ جاي-كۇيى تۋرالى پارلامەنتشىلەرگە باياندادى.
تالقىلاۋ بارىسىندا سەناتورلارعا سالادا مەملەكەتتىك قولداۋ كورسەتۋدىڭ, مال شارۋاشىلىعىن ۆەتەرينارلىق قولايلىقپەن قامتاماسىز ەتۋ بويىنشا عىلىمي سۇيەمەلدەۋدىڭ قالاي ىسكە اسىرىلاتىنى تۋرالى, سونداي-اق مالدىڭ ينۆازيالىق جانە جۇقپالى ەمەس اۋرۋلارىنا دياگنوستيكا جاساۋ, ولاردى الدىن الۋ جانە ەمدەۋ تاسىلدەرى مەن ادىستەرىن, تەوريالىق نەگىزدەرىن ازىرلەۋ مەن ولاردان كۇتىلەتىن ناتيجە مەن ستراتەگيا جايىندا ايتىلدى.
سەناتورلار قازاق ۇلتتىق اگرارلىق زەرتتەۋ ۋنيۆەرسيتەتىنىڭ وقىتۋشىلار قۇرامى جانە ستۋدەنتتەرىمەن كەزدەسۋ وتكىزىپ, ۆەتەريناريا سالاسىنداعى كادرلاردى دايارلاۋ ماسەلەلەرىن تالقىلادى.
دەپۋتاتتار قورىتىندىلاي كەلە, اۋىل شارۋاشىلىعىن دامىتۋداعى زاماناۋي ۆەتەريناريا عىلىمىنىڭ شەشۋشى ءرولى جانە ونسىز ەلىمىزدىڭ اۋىل شارۋاشىلىعى ونىمدەرىنىڭ قوماقتى بولىگىن ەكسپورتتاۋدى ۇلعايتۋ مۇمكىن ەمەستىگىن اتاپ ءوتتى. پارلامەنتشىلەر وسى ورايدا كادرلاردى دايارلاۋ, ەڭبەكاقىنى كوتەرۋ جانە كوپتەگەن ۇدەرىستەردى تسيفرلاندىرۋ بويىنشا جۇيەلى ءارى دايەكتى جۇمىس جاساۋ كەرەكتىگى تۋرالى ايتتى.
