پرەزيدەنت قاسىم-جومارت توقاەۆ جاريالاعان بۇل جولعى راقىمشىلىق – تەك قاڭتار وقيعاسىنا قاتىسۋشىلارعا قاتىستى ءبىر رەتتىك اكت. بۇل راقىمشىلىقتىڭ باستى ماقساتى – جازادان بوساتۋ نەمەسە ونىڭ مەرزىمىن قىسقارتۋ. ءوز كىناسىن مويىنداعان جانە ىستەگەن ىسىنە تولىق وكىنگەن ازاماتتار تاعىلعان ايىپتاردان تولىق بوساتىلادى. بۇل ەڭ الدىمەن كوپشىلىكتىڭ ىقپالىمەن بۇقاراعا ىلەسىپ كەتكەن, بىراق الدىن الا تەرىس نيەتى بولماعان ازاماتتارعا قاتىستى. جاپپاي تارتىپسىزدىكتەردى ۇيىمداستىرۋشىلار, بيلىكتى اسىرا پايدالانىپ, ازاپتاۋعا جۇگىنگەن ادامدار, قايتالاپ قىلمىس جاساعاندار, زورلاۋشىلار, تەرروريستەر مەن ەكسترەميستەر راقىمشىلىققا جاتپايدى. سوندىقتان اۋىر قىلمىسكەرلەر وسى زاڭ ارقىلى بوستاندىققا شىعادى دەگەن پىكىر شىندىققا جاناسپايدى.
پارلامەنتتەگى زاڭ شىعارۋ ۇدەرىسىنە قاتىستى بارلىق ءراسىمدى ەسكەرگەندە «راقىمشىلىق جاساۋ تۋرالى» زاڭ ايتارلىقتاي قىسقا مەرزىمدە قابىلداندى. مۇنى پارلامەنت دەپۋتاتتارى تاراپىنان قاڭتار ماسەلەسىنە ەرەكشە نازار سالىپ, ماڭىز بەرگەنى رەتىندە قابىلداۋعا بولادى. زاڭدى قابىلداۋدىڭ الدىندا ازاماتتاردىڭ قاڭتار وقيعاسى كەزىندەگى جاپپاي تارتىپسىزدىكتەرگە جانە باسقا دا زاڭسىز ارەكەتتەرگە قاتىسۋى بويىنشا قوزعالعان ىستەردى تەرگەۋ جۇرگىزىلگەنىن دە ەسكەرگەن ءجون. جان-جاقتى تەرگەۋسىز زاڭ جوباسىن ازىرلەۋگە كىرىسۋ, ارينە, ەرتەرەك بولار ەدى.
راقىمشىلىققا جاتاتىن ءاربىر ءىستى سوت جەكە قاراستىرادى. پروكۋرور مەن سوت راقىمشىلىق تۋرالى زاڭدى قولدانۋدىڭ زاڭدىلىعىن قامتاماسىز ەتەدى. ءاربىر ازاماتتىڭ جاعدايىن جەكە قاراستىرۋ بولۋى مۇمكىن قاتەلىكتەردىڭ الدىن الىپ, ءاربىر جەكە ازامات بويىنشا بارىنشا ادىلەتتى شەشىم شىعارۋعا جول اشادى.
قاڭتار وقيعاسى كەزىندە جاناشىرلىق نيەتپەن نەمەسە قاراپايىم قىزىعۋشىلىقپەن الاڭعا شىعىپ, قالىڭ توپتىڭ ىقپالىمەن كەلەڭسىزدىكتەرگە ۇشىراعان ازاماتتارىمىز از ەمەس. بۇل زاڭ ءدال وسىنداي كۇيگە تۇسكەن ازاماتتارعا قاتىستى ادىلدىكتى ورناتۋعا مۇمكىندىك بەرەدى. كەرىسىنشە, كىناسى انىقتالعان جاپپاي تارتىپسىزدىكتەردى ۇيىمداستىرۋشىلارعا, بيلىكتى اسىرا پايدالانعان ادامدارعا, بىرنەشە قايتارا قىلمىس جاساعاندارعا قاتىستى راقىمشىلىقتىڭ شەكتەلۋى بۇل تەتىكتى اسىرا قولدانۋعا جول بەرمەيدى.
مەملەكەت باسشىسى راقىمشىلىق تۋرالى زاڭنىڭ قابىلداناتىنىن جاريالاعاننان كەيىن ادامدار راقىمشىلىققا ىلىنگەندەردىڭ تۋىستارى مەن جاقىندارىنا قاتىستى قانداي دا ءبىر كەلەڭسىز جاعداي تۋىنداي ما دەپ ساۋال قويا باستادى. وسى جەردە ايتا كەتەتىن ءبىر جايت, قولدانىستاعى زاڭناماعا سايكەس راقىمشىلىققا ىلىنگەندەردىڭ جاقىن تۋىستارى ەشقانداي جاۋاپكەرشىلىككە تارتىلمايدى. ولاردىڭ تۋىستارى مەن جاقىندارىنا قاتىستى قانداي دا ءبىر زاڭدىق شەكتەۋلەردىڭ بولۋى زاڭدىق تۇرعىدا مۇمكىن ەمەس. وسىلايشا, قۇقىق بۇزۋشىلارعا راقىمشىلىق جاساۋ ولاردىڭ بالالارىنىڭ بولاشاقتا مەملەكەتتىك نەمەسە اسكەري قىزمەتكە ورنالاسۋىنا ەش كەدەرگى بولا المايدى, باسقا ازاماتتىق قۇقىقتارىنا دا ەش قيانات جاسالمايدى.
جاننا كارىموۆا,
قازاقستان ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى
