«اقتوبە قالاسىنداعى سايلاۋالدى شتابىنا سايلاۋشىلار ساۋالدارى مەن ۇسىنىستارىن بەلسەندى جولداۋدا. بۇل قۋانتارلىق جاعداي. سونداي-اق حالىقارالىق سايلاۋ بايقاۋشىلارى جولداعان سۇراقتارمەن دە جۇمىس جۇرگىزىلۋدە. جالپى, ەل وڭىرلەرىندە 20 شتاب جۇمىس ىستەيدى, 2 مىڭعا جۋىق ەرىكتى جۇمىلدىرىلعان. سايلاۋشىلارعا ىڭعايلى بولۋ ءۇشىن ۇلكەن اۋداندىق ورتالىقتاردا دا شتابتار اشىلعان», دەپ مالىمدەدى ق.ابدەن.
ەسكە سالساق, قاراقات ابدەن بۇعان دەيىن اقمولا وبلىسى, قاراعاندى, استانا, ەكىباستۇز, سەمەي, پاۆلودار, تالعار, ەسىك قالالارىنىڭ تۇرعىندارىمەن سايلاۋالدى كەزدەسۋلەرىن وتكىزدى. باسقوسۋلار بارىسىندا كوبىنە الەۋمەتتىك سالا, ءبىلىم بەرۋ مەن بالا تاربيەسى جايلى وزەكتى سۇراقتار كوتەرىلدى.
«بالالار قاۋىپسىزدىگى باستى نازاردا بولۋى كەرەك. بالالاردىڭ جاعدايىن جاساۋ ءۇشىن كۇندىز-ءتۇنى جۇمىس ىستەيتىن اتا-انالار بار. بىراق ولار كوپ جاعدايدا بالالارىن قالدىرىپ كەتەتىن جەر تابا الماي قينالادى. سوندىقتان تاۋلىك بويى جۇمىس ىستەيتىن بالاباقشالار اشۋ كەرەك. تاۋلىك بويى جۇمىس ىستەيتىن بالاباقشالاردى مەملەكەتتىك بالاباقشالاردىڭ نەگىزىندە اشىپ, جۇمىس ۋاقىتىن ۇزارتۋ ارقىلى ىسكە قوسۋعا بولادى. بۇل شەشىمنىڭ بىردەن-ءبىر ارتىقشىلىعى – ماسەلە شەشىمى ۇلكەن قاراجات جۇمساۋدى قاجەت ەتپەيدى», دەيدى ق.ابدەن.
