ەلوردادا حالىق سانىنىڭ كۇرت ارتۋى قۇرىلىس قارقىنىن كۇشەيتە تۇسەتىنى تۇسىنىكتى. مۇنداي جاعدايدا وقۋشى كوبەيىپ, وقۋ ورىندارىندا ورىن تاپشىلىعى بىردەن بايقالادى. ۇلتتىق ستاتيستيكا بيۋروسىنىڭ مالىمەتىنشە, استانا قالاسى بويىنشا تۇرعىندار سانى 2022 جىلدىڭ باسىندا 1 295 711 ادامدى, ال 2022 جىلدىڭ 1 قازانىندا 1 340 782 ادامدى قۇراعان.
«مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 23 ءىرى مەكتەپتىڭ جوباسىن جۇرگىزىپ جاتىرمىز. بۇل 23 مەكتەپ ەكى اۋىسىمدا 84 مىڭنان استام وقۋشىنى قامتۋعا مۇمكىندىك بەرەدى. اتالعان جوبا اياسىندا ءبىلىم وشاقتارىنىڭ قۇرىلىسىن كەلەسى جىلى باستايمىز. وسىلايشا, ءبىز اۋقىمدى مەكتەپتەر سالۋدى جالعاستىرامىز. بۇعان دەيىن استانادا 6 ءىرى مەكتەپ اشتىق, ونىڭ ارقايسىسى 4 مىڭ وقۋشى ورنىنا (6 مەكتەپتەگى وقۋشى ورىندارىنىڭ جالپى سانى – 2 اۋىسىمدا 24 مىڭ) ەسەپتەلگەن. قالانى ارالاۋ بارىسىندا بىرقاتار مەكتەپتىڭ قۇرىلىس بارىسىمەن تانىستىم. مىسالعا بۇل مەكتەپتەر ۇلى دالا داڭعىلىندا, ۇلى دالا مەن ساۋران داڭعىلىنىڭ قيىلىسىندا, قاراساي باتىر جانە 187 كوشەدە ورنالاسقان. وسى مەكتەپتەردى بيىلعى وقۋ جىلىندا اشۋدى جوسپارلاپ وتىرمىز», دەيدى التاي كولگىنوۆ.
قازىرگى ۋاقىتتا بەلگىلەنگەن مەكتەپ سالىناتىن 102 جەر ۋچاسكەسى الەۋمەتتىك نىسانداردىڭ قاجەتتىلىكتەرىنە وراي قالانىڭ بارلىق اۋدانىندا ورنالاسقان. ماسەلەن, ەلوردا تۇرعىندارى كوبىرەك شوعىرلانعان جانە قارقىندى دامىپ كەلە جاتقان ەسىل اۋدانىندا – 49, الماتى اۋدانىندا 29 ۋچاسكە بار. تاعى باسقا مەكتەپتەر مەن الەۋمەتتىك ماڭىزدى نىساندار سالۋ ءۇشىن دە جەر ۋچاسكەلەرىنىڭ سانى جىل سايىن ۇلعايتىلماق. سونداي-اق ءار اۋداندا (شاعىن اۋدانداردا) وقۋ ورىندارى بولۋى ءۇشىن ەگجەي-تەگجەيلى جوسپارلاۋ جوباسىنا (ەتج) ارنايى باعىت بەكىتىلگەن.
قالا اكىمىنىڭ ايتۋىنشا, ەلوردادا 2019 جىلدان باستاپ 93 مىڭ وقۋشى ورنىنا ارنالعان ەكى اۋىسىمدا 45 مەكتەپ سالىنعان.
