قازاقستان رەسپۋبليكاسىنىڭ ادىلەت ءمينيسترى قانات مۋسين اتاپ وتكەندەي, زاڭ جوباسىنىڭ ماقساتى ادام جانە ازامات قۇقىقتارىن جۇزەگە اسىرۋدىڭ كەپىلى رەتىندە ادام قۇقىقتارى جونىندەگى ۋاكىلدىڭ كونستيتۋتسيالىق مارتەبەسىن قامتاماسىز ەتۋ بولىگىندە قازاقستان رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەردى ىسكە اسىرۋ بولىپ تابىلادى.
«كونستيتۋتسيانىڭ جاڭا 83-1-بابىنىڭ نورمالارىمەن ۋاكىلدىڭ قىزمەتىنىڭ مىندەتتەرى, تاۋەلسىزدىگى مەن وكىلەتتىكتەرىن جۇزەگە اسىرۋ كەزىندە قانداي دا ءبىر وزگە مەملەكەتتىك ورگاندار مەن لاۋازىمدى ادامداردىڭ الدىندا ەسەپ بەرمەۋىنىڭ كەپىلدىكتەرى بەكىتىلدى. بۇدان بىلاي ادام قۇقىقتارى جونىندەگى ۋاكىلدىڭ قۇقىقتىق جاعدايى مەن ونىڭ قىزمەتىن ۇيىمداستىرۋ كونستيتۋتسيالىق زاڭمەن ايقىندالادى», دەدى قانات مۋسين.
زاڭ جوباسى ۋاكىل قىزمەتىنىڭ ماقساتتارى مەن مىندەتتەرىن, ونىڭ قۇقىقتىق مارتەبەسى مەن قۇزىرەتىن اشادى. ۋاكىلدىڭ, ونىڭ وڭىرلەردەگى وكىلدەرىنىڭ جانە ادام قۇقىقتارى جونىندەگى ۇلتتىق ورتالىقتىڭ قىزمەتىن ۇيىمداستىرۋعا قاتىستى ەرەجەلەر بار.
«قولدانىستاعى زاڭدا قاراستىرىلماعان نەگىزگى ەرەجەلەر بار. ءبىرىنشىسى – ۋاكىلدىڭ قۇزىرەتىن كۇشەيتۋ. زاڭ جوباسىندا كونستيتۋتسيا نورمالارىن ىسكە اسىرۋ ماقساتىندا ۋاكىلەتتى تۇلعانىڭ ادام مەن ازاماتتىڭ بەكىتىلگەن قۇقىقتارى مەن بوستاندىقتارىن قوزعايتىن نورماتيۆتىك قۇقىقتىق اكتىلەردىڭ كونستيتۋتسياعا سايكەستىگى تۋرالى ماسەلە بويىنشا كونستيتۋتسيالىق سوتقا جۇگىنۋ قۇقىعى كوزدەلگەن. سونداي-اق ولاردىڭ شاقىرۋى بويىنشا باسقا مەملەكەتتەردە ادام قۇقىقتارى مەن بوستاندىقتارىنىڭ ساقتالۋىنا باقىلاۋشى رەتىندە قاتىسۋ قۇقىعىن بەرۋ ۇسىنىلدى», دەپ ءتۇسىندىردى ق.مۋسين.
ۋاكىلدىڭ قۇزىرەتىن كۇشەيتۋ ماقساتىندا ونىڭ ارناۋلى الەۋمەتتىك قىزمەتتەر كورسەتەتىن ۇيىمدارعا, سونداي-اق قىلمىستىق-اتقارۋ جۇيەسى مەكەمەلەرىنە كەدەرگىسىز بارۋ قۇقىعى بەكىتىلگەن.
ەكىنشىدەن, ۋاكىلەتتى تۇلعانىڭ قىزمەتىن ۇيىمداستىرۋ تيىمدىلىگىن ارتتىرۋ بولىگىندە زاڭ جوباسىندا ادام قۇقىقتارى جونىندەگى ۇلتتىق ورتالىق باسشىسىنىڭ ورىنباسارى لاۋازىمىن, سونداي-اق ۇلتتىق ورتالىقتىڭ قوسىمشا فۋنكتسيالارىن ەنگىزۋ ۇسىنىلادى.
