تۋا بىتكەن اۋرۋ انوماليالارىنىڭ سەبەبىن انىقتاۋ, زەرتتەۋ بۇگىندە وتە وزەكتى ماسەلە. وسىعان بايلانىستى پرەناتالدىق ۋلترادىبىستىق دياگنوستيكا بويىنشا ەلدىڭ جەتەكشى ماماندارىنان ساراپتاما توبى قۇرىلىپ, ەلىمىزدە العاش رەت پرەناتالدىق مەديتسينا قىزمەتىنىڭ جۇمىسىن رەگلامەنتتەيتىن نورماتيۆتىك قۇجاتتار – «قازاقستان رەسپۋبليكاسىندا پرەناتالدىق ۋلترادىبىستىق سكرينينگ جۇرگىزۋدى ۇيىمداستىرۋ ستاندارتى» جانە «قازاقستان رەسپۋبليكاسىندا 2022-2025 جىلدارعا ارنالعان پرەناتالدىق ۋلترادىبىستىق دياگنوستيكانى ودان ءارى جەتىلدىرۋ جونىندەگى جول كارتاسى» ازىرلەندى.
بۇگىندە حالىقارالىق ستاندارتتارعا سايكەس پرەناتالدىق ۋلترادىبىستىق دياگنوستيكانىڭ 150 دارىگەرى سەرتيفيكاتتالسا, باعدارلامالار شەڭبەرىندە دەنساۋلىق ساقتاۋ مينيسترلىگىنىڭ باس گەنەتيگى, پروفەسسور گۇلشارا جۇسىپقىزى ءابىلدينوۆا جانە دەنساۋلىق ساقتاۋ مينيسترلىگى پرەناتالدىق دياگنوستيكانىڭ ۋدز بويىنشا باس مامانى, مەديتسينا عىلىمدارىنىڭ دوكتورى جانار قۋانىشبايقىزى ەلىمىزدىڭ ۋلترادىبىستىق دياگنوستيكا دارىگەرلەرى مەن مەديتسينالىق گەنەتيكتەرىنىڭ كاسىپتىك دايارلىعىن ارتتىرۋ بويىنشا وقىتۋ جۇرگىزدى. دەنساۋلىق ساقتاۋ مينيسترلىگى جۇكتىلىكتىڭ 9-اپتاسىنان باستاپ ءينۆازيۆتى ەمەس پرەناتالدىق دنك تەست ءادىسىن كلينيكالىق پراكتيكاعا ەنگىزۋدى جوسپارلاۋدا. بۇل زەرتتەۋ جۇكتىلىكتىڭ باسىندا ۇرىقتىڭ حروموسومالىق اۋىتقۋلارىن جوعارى سەزىمتالدىقپەن انىقتاۋعا مۇمكىندىك بەرەتىن بىرەگەي زاماناۋي ادىستەردىڭ ءبىرى جانە ايەل ءۇشىن دە, ۇرىق ءۇشىن دە قاۋىپسىز بولماق.
سونىمەن قاتار جۇكتى ايەلدەردى سكرينينگپەن بارىنشا قامتۋ ءۇشىن ىرگەلەس اۋماقتاعى جۇكتى ايەلدەر سانىنا سايكەس قاجەتتىلىكتى, اۋدانداردا كولىك ينفراقۇرىلىمىن دامىتۋ تۇرعىسىنان قولجەتىمدىلىكتى, ۋلترادىبىستىق پرەناتالدىق دياگنوستيكا سالاسىنداعى حالىقارالىق ستاندارتتار بويىنشا جابدىقتار مەن سەرتيفيكاتسيالانعان مامانداردىڭ جەتكىلىكتى سانىمەن قامتاماسىز ەتۋدى ەسكەرە وتىرىپ, وڭىرلەندىرۋدى جۇرگىزۋ جوسپارلانۋدا. بۇگىندە وڭىرلەردە پرەناتالدىق ناتيجەلەردى جاقسارتۋ ءۇشىن ساراپتامالىق دەڭگەيدەگى مەديتسينالىق قىزمەتتەر كورسەتۋ ماقساتىندا «ۇرىقتى قورعاۋ ورتالىقتارى» ۇيىمداستىرىلعان. جۇكتىلىك كەزىندە سكرينينگتىك زەرتتەۋلەردى ۋاقتىلى جۇرگىزۋ, پرەناتالدىق مەديتسينانىڭ سوڭعى جەتىستىكتەرىنە نەگىزدەلگەن زاماناۋي جانە ءتيىمدى مەديتسينالىق تەحنولوگيالاردى ەنگىزۋ بويىنشا تۋا بىتكەن پاتولوگياداعى قاۋىپ توبىن ءبولىپ كورسەتۋگە جانە ۇرىقتىڭ دامۋ اۋىتقۋلارىنىڭ ۇلكەن سپەكترىن دياگنوستيكالاۋعا مۇمكىندىك
بەرەدى.
بۇل ستراتەگيالىق وڭ شەشىمدەر الداعى ۋاقىتتا ەلىمىزدە تۋا بىتكەن اقاۋى مەن تۇقىم قۋالاۋشى اۋرۋلارى بار بالا سانىن بولدىرماۋعا زور سەپتىگىن تيگىزسە يگى.
