توعىز جولدىڭ تورابىنداعى قازاقستان

سۋ جولى

سۋ جولى تۋرالى ايتقاندا اقتاۋ جانە قۇرىق پورتتارى بىردەن ويعا ورالادى. بۇ­گىندە قوس پورتتىڭ وتكىزۋ قابىلەتى 21,2 ملن توننانى قۇرايدى. ولار ارقىلى كاس­پي ماڭى پورتتارىنىڭ بارلىعىمەن قاتىناس ورناتىلعان.

ترانسكاسپي حالىقارالىق كولىك باعىتى. اتالعان باعىت ارقىلى جۇك تە­مىر جول كولىگىمەن اقتاۋ/قۇرىق پورت­­تا­رىنا دەيىن جەتكىزىلەدى. ودان ءارى باكۋ پورتىنا دەيىن تاسىمالداناتىن قۇرعاق جۇك كەمەلەرىنە نەمەسە پا­روم­دارعا تيە­لەدى. بۇدان ءارى جۇك تەمىر جولمەن ازەربايجان, گرۋزيا جانە تۇر­كيا ار­قى­لى مەرسين پورتىنا دەيىن جەت­كى­زى­لەدى.

سولتۇستىك-وڭتۇستىك حالىقارالىق كولىك ءدالىزى. ءبىزدىڭ ەل اتالعان ءدالىزدىڭ قازاق­ستان – تۇرىكمەنستان – يران تەمىر­جول باعىتىن, سونداي-اق اقتاۋ/قۇرىق – انزالي/اميراباد پورتتارى (يران) باعىتىن پايدالانىپ وتىر. ءارى قاراي يراننىڭ تەڭىز پورتتارى ارقىلى جۇك كە­مەلەرگە تيەلەدى. ەگەر جۇك ۆاگوندا نە­مەسە اۆتوكولىكپەن جەتكىزىلسە, كون­تەينەر­لەرگە قايتا تيەۋ جۇرگىزىلەدى.

يندۋستريا جانە ينفراقۇرىلىمدىق دامۋ مينيسترلىگىنىڭ حابارلاۋىنشا, 2020 جىلى اقتاۋ جانە تۇرىكمەنباشى پورتتارى اراسىندا كونتەينەرلىك جەلى ىسكە قوسىلدى.

رەسەي فەدەراتسياسى باعىتىندا اق­تاۋ پورتى ارقىلى ماحاچكالا پورتىنا مۇناي تيەۋ جۇزەگە اسىرىلىپ جاتىر. سونىمەن قاتار ەرتىس وزەنى ارقىلى پاۆ­لو­دار – ومبى باعىتىندا وزەن تاسىمالى جولعا قويىلعان.

اۋە جولى

قازىرگى تاڭدا قازاقستاننان حالىق­ارالىق باعىتتاعى ۇشۋلار 28 ەلگە 111 باعىتپەن اپتاسىنا 488 رەيس جيى­لى­گىمەن ورىندالادى. ءبىزدىڭ ەلدەن كەلە­سى­دەي مەملەكەتتەرگە اۋە جولى ارقى­لى قاتىناۋعا بولادى: تۇركيا, ءباا, وزبەكستان, گرۋزيا, تاجىكستان, رەسەي, قىر­­عىزستان, بەلارۋس, گەرمانيا, مى­سىر, وڭتۇستىك كورەيا, نيدەرلاند, پول­شا, ارمەنيا, مالديۆ, ۆەتنام, تايلاند, ازەربايجان, ساۋد ارابياسى, كۋۆەيت, ءۇندىستان, قاتار, ۇلىبريتانيا, موڭعوليا, يران, يتاليا, چەرنوگوريا, قىتاي.

اۆتوموبيل جولى

قازاقستاننان حالىقارالىق باعىتقا جەتى كولىك ءدالىزى ارقىلى قاتىناۋعا بولادى.

ءبىرىنشى ءدالىز: «باتىس ەۋروپا – باتىس قىتاي». ۇزىندىعى – 2 747 شا­قىرىم. بۇل ءدالىز قىتايدان قازاقستان, رەسەي جانە ودان ءارى ەۋروپاعا, سونداي-اق ورتالىق ازيا ەلدەرىنە, اتاپ ايتقاندا, وزبەك­ستانعا, قىرعىزستانعا جانە كەرى با­عىت­تاعى ترانزيتتىك اعىندى قامتا­ماسىز ەتەدى.

ەكىنشى ءدالىز: «الماتى – قاراعاندى – استانا – پەتروپاۆل – رەسەي شەكاراسى (قورعان)». ۇزىندىعى – 1 868 شا­قىرىم. ءدالىز قازاقستان, رەسەي جانە ودان ءارى ەۋروپا ارقىلى ورتالىق ازيا ەلدەرىمەن ترانزيتتىك اعىندى قام­تاماسىز ەتەدى.

ءۇشىنشى ءدالىز: «استانا – قوستاناي – رە­سەي شەكاراسى (چەليابى)». ۇزىن­دىعى – 860 شاقىرىم. اتالعان ءدالىز ارقىلى ورتالىق ازيا ەلدەرىنەن قازاق­ستان, رەسەي جانە ودان ءارى ەۋروپاعا قاتى­ناۋ­عا مۇمكىندىك بار.

ءتورتىنشى ءدالىز: «قىتاي شەكاراسى – مايقاپشاعاي – قالباتاۋ – سەمەي – پاۆلودار – رەسەي شەكاراسى (ومبى)». ۇزىن­دىعى – 1 116 شاقىرىم. بۇل ءدالىز شىعىس ءوڭىرىنىڭ نەگىزگى باعىتتارىنىڭ ءبىرى بولىپ سانالادى. ول ارقىلى ترانزيت قى­تايدان قازاقستان, رەسەي اۋماقتارى ارقى­لى ودان ءارى ەۋروپاعا باعىتتالادى.

بەسىنشى ءدالىز: «الماتى – تالدى­قورعان – وسكەمەن – شەمونايحا – رەسەي شەكاراسى (بارناۋل)». ۇزىن­دى­عى – 1 026 شاقىرىم. بۇل ورتالىق ازيا مەن قىتايدان قازاقستان ارقىلى رەسەيدىڭ شىعىس وڭىرلەرى مەن قيىر شىعىسقا ءترانزيتتى قامتاماسىز ەتەتىن ەڭ سۇرانىسقا يە باعىت بولىپ سانالادى.

التىنشى ءدالىز: «اقتوبە – قان­دىاعاش – ماقات – اتىراۋ – رەسەي شەكاراسى (استراحان)». ۇزىندىعى – 893 شاقىرىم. باتىس ءوڭىر ءۇشىن بۇل ءدالىز وزبەكستان مەن تۇرىكمەنستان ەلدە­رى­نىڭ قازاقستان, رەسەي اۋماعى ارقى­لى ەۋروپاعا ءترانزيتىن قامتاماسىز ەتەدى.

جەتىنشى ءدالىز: «اتىراۋ – ورال – رە­سەي شەكاراسى (ساراتوۆ)». ۇزىندىعى – 587 شا­قىرىم. باتىس ءوڭىرىنىڭ نەگىزگى با­عىت­تارىنىڭ ءبىرى. ول ارقىلى ترانزيت قا­زاقستانان رەسەي اۋماقتارىنا باعىت­تا­لادى.

تەمىر جول

بۇگىنگى تاڭدا ەلىمىزدە 5 حالىقارالىق تەمىر جول كولىك ءدالىزى بار. ولار:

1. سولتۇستىك ءدالىز
2. وڭتۇستىك ءدالىز
3. ورتاازيالىق ءدالىز
4. سولتۇستىك-وڭتۇستىك ءدالىزى
5. ترانسكاسپي حالىقارالىق كولىك با­عى­تى

اتالعان دالىزدەر قازاقستاندى ورتا­لىق ازيا, قىتاي, رەسەي فەدەرا­تسياسى, يران, ەۋروپا, تۇرىكمەنستان جانە تۇر­كيا ەلدەرىمەن بايلانىستىرادى.

ينفوگرافيكانى جاساعان امانگەلدى قياس, «EQ»