قازىر مەكتەپ باعدارلاماسىمەن شەكتەلۋگە استە بولمايتىنىن الەمدىك تاجىريبە كورسەتىپ وتىر. ءبىلىم بەرۋ ۇدەرىسىندە عىلىمنىڭ سوڭعى جاڭالىقتارىن كەڭىنەن پايدالانۋ, سول ارقىلى جاس زياتكەرلەردىڭ ىنتاسىن وياتۋ وزىق ويلى پەداگوگتەرگە زور جاۋاپكەرشىلىك جۇكتەيدى. ەلىمىزدە مۇعالىمدەر مەن وقۋشىلارعا ارنالعان «قىزىقتى عىلىم» جوباسىنىڭ اۋقىمى كەڭەيىپ كەلەدى. سونىڭ ءبىرى الماتى قالاسىنداعى «ورلەۋ» بىلىكتىلىكتى ارتتىرۋ ۇلتتىق ورتالىعىندا جالعاسىن تاپتى.
الماتى قالاسىنىڭ بىلىكتى مۇعالىمدەرىن ءبىر الاڭدا جيناعان ارناۋلى سەميناردا 134 جىلدىق تاريحى بار, گەوگرافيا, جاراتىلىستانۋ عىلىمدارىنان باستاپ, عارىشتى يگەرۋگە دەيىنگى سالالاردا كوپجىلدىق حالىقارالىق عىلىمي-زەرتتەۋلەر مەن فوتو-بەينە دەرەكتەردىڭ باي قورىن قالىپتاستىرعان National Geographic جۋرنالىنىڭ رەسۋرستارىن ءتيىمدى قولدانۋ ادىستەرى تانىستىرىلدى. تىڭ باستامانىڭ تيىمدىلىگىن قاتىسقان مۇعالىمدەر دە اتاپ كورسەتۋدە. الماتى قالاسىنداعى №41 جالپى ورتا مەكتەبىنىڭ بيولوگيا پانىنەن ساباق بەرەتىن زاۋرە وسكەنباي سەمينار بارىسىندا مول ماعلۇمات الا وتىرىپ, بالالاردى جاراتىلىستانۋ عىلىمىنا قىزىقتىرۋدىڭ تىڭ تەتىكتەرىن يگەرگەنىن ايتادى.
«گەوگرافيا مەن بيولوگيا ءپانى مۇعالىمدەرىنە ارنايى وتكىزىلگەن سەمينار بارىسىندا ءبىزدىڭ سالامىزعا تىكەلەي قاتىسى بار, الەمدىك دەڭگەيدەگى National Geographic جۋرنالىنىڭ عىلىمي-تانىمدىق ونلاين رەسۋرستارىمەن تانىسىپ, ولاردى ساباق بارىسىندا قالاي ءتيىمدى قولدانۋعا بولاتىنىن بىلدىك. بيولوگيا ءپانى بويىنشا وقۋشىلاردى وليمپياداعا قالاي دايىنداۋ قاجەتتىگى جونىندە باعىت-باعدار الدىم. ءوز باسىم, ءپان مۇعالىمى رەتىندە جۋرنالدى ساباقتا قولدانۋ ارقىلى وقۋشىنىڭ عىلىمعا دەگەن كوزقاراسىن وزگەرتىپ, قىزىقتىرۋعا بولاتىنىنا كوز جەتكىزدىم», دەيدى ز.وسكەنباي.
جۋرنال اۆتورلارى مەكتەپ مۇعالىمدەرىنە ارنايى تاقىرىپتىق سەمينارلار وتكىزۋ ارقىلى الەمدىك عىلىمي-رەسۋرستاردى ساباق بارىسىندا قالاي قولدانىپ, وقۋشىلاردى قالاي قىزىقتىرۋعا بولاتىنىن, بۇل باعىتتاعى تاجىريبەنى تالاپكەرلەردىڭ عىلىمي جوبالارىنا دۇرىس پايدالانۋ تەتىكتەرىن جان-جاقتى ءتۇسىندىرىپ كەلەدى. ويتكەنى بۇل رەسۋرستارداعى ەڭبەكتەردىڭ ءبارى عىلىمي تۇرعىدان راستالىپ, دالەلدەنگەن, اۆتورلىق قۇقىعى قورعالعان زياتكەرلىك مەنشىك نىسانى. ال عىلىمنىڭ الىپپەسى وزىڭە دەيىنگىلەردىڭ ەڭبەگىن وقىپ-ءبىلىپ, كەرەگىڭە جاراتۋدان باستالاتىنى بەلگىلى.
– عىلىمي ساۋاتتى ادام عىلىمدى «شەكسىز شەكارا» رەتىندە تانيدى. جاھاندىق ەكونوميكاعا نەگىزىنەن عىلىم مەن تەحنولوگيانىڭ جەتىستىكتەرى اسەر ەتەتىنىن مويىندايدى. دالەلدى ناسيحاتتان, دەرەكتى كوركەم ادەبيەتتەن, ماعىنانى بوس سوزدەن, ءبىلىمدى پىكىردەن اجىراتا الادى. ساباق بارىسىندا جۋرنالدىڭ ماتەريالدارىن ءماتىن تۇرىندە ياكي بەينە تۇرىندە پايدالانا وتىرىپ ۇستازدار تالاپكەرلەردىڭ قىزىعۋشىلىعىن ارتتىرا الادى. مۇعالىمدەردى جۋرنالىمىزدىڭ ءبىلىم سالاسىنداعى تەگىن ونلاين پلاتفورماسىمەن تانىستىرا وتىرىپ, ماتەريالداردى ساباق بارىسىندا قالاي قولدانۋعا بولاتىنى جايلى باعدار بەردىك. الداعى ۋاقىتتا وقۋشىلار اۋديتورياسىن قامتۋدى دا كوزدەپ وتىرمىز, – دەيدى «National Geographic» جۋرنالىنىڭ وكىلى قانات نۇرالى ۇلى.
مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىرىلىپ جاتقان «وقۋعا قۇشتار مەكتەپ» باستاماسىن قولداۋ ماقساتىندا جۇزەگە اسىرىلعان جوبانى «شەۆرون» كومپانياسىنىڭ قولداۋىمەن «Kazmedia Holding» جۇزەگە اسىرۋدا. الىپ كومپانيانىڭ اتسالىسۋىمەن جىل سوڭىنا دەيىن باتىس قازاقستان وبلىسىنىڭ جانە استانا, الماتى قالالارىنىڭ مەكتەپتەرىنە جۋرنال توپتامالارى تەگىن تاپسىرىلادى.
«گەوگرافيا, بيولوگيا, فيزيكا, حيميا, جاراتىلىستانۋ پاندەرىنىڭ مۇعالىمدەرى ءۇشىن بۇل جوبانىڭ مۇمكىندىكتەرى مول. ولار تەك وقۋ قۇرالدارىنداعى ماعلۇماتتارمەن شەكتەلمەي, تانىمدىق ىزدەنىستەردەن تۋعان ماقالالار مەن زەرتتەۋ جۇمىستارىن قالاعان تىلىندە پايدالانا الادى. كەيبىر اۋديتوريادا جاساۋعا بولمايتىن لابوراتوريالىق جۇمىستاردى ۆيرتۋالدى ىسكە اسىرۋدىڭ وڭتايلى جولدارىن دا ماماندار كورسەتىپ بەرىپ وتىر. الەمدە قانداي وزگەرىستەر بولىپ جاتىر, ول جاڭالىقتاردى ءوز پانىنە مۇعالىمدەر قالاي ەنگىزە الادى, سونىڭ ءبارى كەزدەسۋ بارىسىندا قامتىلدى», دەيدى «ورلەۋ» باۇو» اق فيليالى الماتى قالاسى بويىنشا كاسىبي دامۋ ينستيتۋتى ديرەكتورىنىڭ ورىنباسارى قايسار نۇرلىباەۆ.
جۋرنالدىڭ ءتۇرلى ءتۇستى بوياۋعا قانىق تاڭعاجايىپ فوتوسۋرەتتەرى مەن قىزىقتى ماقالالارى وقىرماندارعا ۇيدەن شىقپاي-اق, اپتاپ ىستىق افريكادان, سولتۇستىكتەگى مۇز باسقان اركتيكاعا دەيىن قايتالانباس ساپار سىيلايدى. ادامزات وركەنيەتىنىڭ وزەكتى ماسەلەلەرىنەن باستاپ كونە تاريحىنا دەيىن بارلاپ, تۇمسا تابيعات, گەوگرافيا, ارحەولوگيا, تاريح, بيولوگيا, استرونوميا سەكىلدى عىلىم سالالارىن كەڭىنەن قامتىعان باسىلىم ەل مۇعالىمدەرىن ساباق بەرۋدەگى زاماناۋي رەسۋرستارمەن تانىستىرۋ ءىسىن جالعاستىرا بەرمەك.
الماتى
