بۇعان دەيىن جازعانىمىزداي, بوكستان ازيا چەمپيوناتى جوسپار بويىنشا 2023 جىلى وزبەكستان استاناسى – تاشكەنتتە وتكىزىلۋگە ءتيىس ەدى. الايدا بيىل قىتايدا وتەدى دەپ جوسپارلانعان جازعى ازيا ويىندارى كەلەسى جىلعا اۋىستىرىلعاندىقتان, ازيا بوكس كونفەدەراتسياسىنىڭ باسشىلىعى جارىس كۇنتىزبەسىنە وزگەرىس ەنگىزىپ, ازيا چەمپيوناتىن ءبىر جىل ەرتە وتكىزۋگە شەشىم قابىلداعان بولاتىن.
ازيا چەمپيوناتى باستالاردان ءبىر كۇن بۇرىن امماندا بوكسشىلاردىڭ جەرەبەسى تارتىلدى. ءبىر ايتا كەتەرلىگى, قايرات سəتجانوۆ جاتتىقتىراتىن قازاقستان ەرلەر قۇراماسىنىڭ جەتى بوكسشىسى ازيا بوكس كونفەدەراتسياسىنىڭ (ASBC) رەيتينگىندە ۇزدىكتەر قاتارىندا تۇرعاندىقتان, جارىستى شيرەك فينالدان باستايتىن بولدى. سونداي-اق ءتۋرنيردى ەكىنشى اينالىمنان باستايتىن ءۇش بوكسشىمىز كەشە العاشقى جەكپە-جەكتەرىن وتكىزدى.
سونىمەن, جەرەبە ناتيجەسىنە سۇيەنە وتىرىپ, بيىلعى ازيا چەمپيوناتىنداعى بوكسشىلارىمىزدىڭ العاشقى قارسىلاستارى كىمدەر جانە باس جۇلدە جولىندا كىمدەرمەن جۇدىرىقتاسۋى مۇمكىن ەكەنىن ساراپتاپ كورەيىك.
اسا جەڭىل سالماقتا (48 كيلو) جۇدىرىقتاساتىن وتانداسىمىز سانجار تاشكەنباي 4 قاراشا كۇنى العاشقى اينالىمدا وزبەكستاندىق اسىلبەك جاليلوۆپەن قولعاپ تۇيىستىرەدى. وزبەك بوكسشىسى بىلتىر 22 جاسقا دەيىنگىلەر اراسىنداعى ازيا چەمپيوناتىندا ونەر كورسەتىپ, باس جۇلدەنى جەڭىپ العان. ال 2021 جىلى پولشادا وتكەن جاستار اراسىنداعى الەم چەمپيوناتىندا توپ جارعان 19 جاستاعى جەرلەسىمىز بيىل العاش رەت ەرەسەكتەر اراسىنداعى ازيا چەمپيوناتىنا قاتىسىپ جاتىر. ونىڭ ازياداعى باستى قارسىلاسى – جاپونيالىق كادزۋما اراتاكە. س.تاشكەنبايدىڭ جولى رەيتينگتە ءبىرىنشى تۇرعان جاپون بوكسشىسىمەن تەك فينالدا عانا قيىسادى. جەرلەسىمىز كەلەسى اينالىمعا شىعىپ جاتسا, ازيانىڭ ەكىنشى ءنومىرلى بىلعارى قولعاپ شەبەرى قىرعىزستاندىق ميرلان تۇرىكباي ۇلىمەن كەزدەسەدى.
51 كيلو سالماقتاعى الەم چەمپيونى, توكيو وليمپياداسىنىڭ قولا جۇلدەگەرى ساكەن بيبوسىنوۆ العاشقى اينالىمدا بوس بولعانىمەن, جارىستى ەكىنشى كەزەڭنەن باستادى. ول كەشە شيرەك فينال جولداماسىن ۇندىستاندىق كۋمار سپارشپەن ساراپقا سالدى. بۇل سالماقتاعى ساكەننىڭ باستى قارسىلاسى – وزبەكستاندىق حاسانبوي دۋسماتوۆ تا جارىستى ەكىنشى كەزەڭنەن باستادى. جەرەبەگە سايكەس, ەكى بوكسشى ءبىر-بىرىمەن تەك فينالدا عانا كەزدەسەدى.
تاعى ءبىر ايتا كەتەرلىگى, كەزىندە ۇلتتىق قۇراما ساپىندا جۇدىرىقتاسىپ, حالىقارالىق جانە ەلىشىلىك جارىستاردا جۇلدەگەر اتانعان ازات ماحمەتوۆ بۇل كۇندەرى باحرەين قۇراماسىنىڭ نامىسىن قورعاپ ءجۇر. جەرەبە قورىتىندىسى بويىنشا, ەكى قازاق بوكسشىسىنىڭ جولى شيرەك فينالدا قيىسۋى مۇمكىن.
سونداي-اق 57 كيلوداعى الەم چەمپيوناتىنىڭ كۇمىس جۇلدەگەرى, جاستار اراسىنداعى ازيا چەمپيونى سەرىك تەمىرجانوۆ كەشە ەكىنشى اينالىمدا تۇرىكمەنستان وكىلى يحلاس گىلىچجانوۆپەن جۇدىرىقتاستى. سەرىكتىڭ فينالعا دەيىن القىنباي جەتۋىنە تولىق مۇمكىندىگى بار. ويتكەنى كىل مىقتىلار جەرەبەنىڭ ەكىنشى بولىگىندە توپتاسقان.
جاستار اراسىنداعى ازيا چەمپيونى, ەرەسەكتەر دوداسىنىڭ قولا جۇلدەگەرى ءساناتالى تولتاەۆ تا (63,5 كيلو) كەشە وزبەكستاندىق رۋسلان ابدۋللاەۆپەن كەزدەستى. ر.ابدۋللاەۆ – وزبەكستاندا تۋعان قانداسىمىز. ول بىلتىر ءوز سالماعىندا وزبەكستان چەمپيونى بولدى. سونداي-اق 22 جاسقا دەيىنگىلەر اراسىنداعى ازيا چەمپيوناتىندا توپ جارىپ, جارىستىڭ ەڭ ۇزدىك بوكسشىسى اتانعان. قازىرگى تاڭدا بوكس ماماندارى ابدۋللاەۆتىڭ بولاشاعىنا زور سەنىممەن قاراپ وتىر.
الەم چەمپيوناتىنىڭ ءۇش دۇركىن قولا جۇلدەگەرى ابىلايحان ءجۇسىپوۆ ۇلتتىق قۇرامادان كەتكەن سوڭ ونىڭ ورنىن 67 كيلودا جامبىل وبلىسىنىڭ وكىلى دۋلات بەكباۋوۆ باستى. بۇل بوكسشىنىڭ جەكە باپكەرى وليمپيادا چەمپيونى باقتيار ارتاەۆتىڭ ۇستازى – نۇرلان اقۇرپەكوۆ. بىلتىر ەل چەمپيونى اتانعان بەكباۋوۆ ەرتەڭ ازيا چەمپيوناتىنىڭ ەكىنشى اينالىمىندا جاستار اراسىنداعى ازيا بىرىنشىلىگىنىڭ كۇمىس جۇلدەگەرى تۇرىكمەنستاندىق ساپارمۋرات وداەۆپەن كەزدەسەدى. جەرلەسىمىزدى شيرەك فينالدا ازيانىڭ جانە وزبەكستاننىڭ ءبىرىنشى ءنومىرلى بوكسشىسى اسادحۋجا مۋيدينحۋجاەۆ كۇتىپ تۇر.
71 كيلودا ونەر كورسەتەتىن اسلانبەك شىمبەرگەنوۆ ەكىنشى اينالىمدا (4 قاراشا) فيليپپين وكىلى پيانار مارجونمەن قولعاپ تۇيىستىرەدى. شىمبەرگەنوۆ جارتىلاي فينالعا دەيىن وزبەكستان, موڭعوليا, ءۇندىستان جانە تايلاند بوكسشىلارىمەن جولىعۋى مۇمكىن.
ال قالعان جەتى سالماقتاعى بوكسشىلارىمىز جارىستى بىردەن شيرەك فينالدان, ياعني 6-7 قاراشا كۇندەرى باستايدى. اتاپ ايتقاندا, 54 كيلوداعى الەم چەمپيوناتىنىڭ كۇمىس جۇلدەگەرى ماحمۇد سابىرحان جارتىلاي فينال جولداماسىن چوجان فانۋۆات (تايلاند) نەمەسە گانبولد دورجنيامبۋمەن (موڭعوليا) ساراپقا سالادى.
60 كيلو سالماقتاعى ءساماتالى تولتاەۆ ¼ فينالدا ميرزوحيد يمامنازاروۆ (قىرعىزستان)/شۋكۋر وۆەزوۆ (تۇرىكمەنستان), نۇرقانات رايىس (75 كيلو) ساگىن ساتىبالدى ۇلى (قىرعىزستان)/كان چەي ۆەي (تايبەي), نۇربەك ورالباي (80 كيلو) انۆار ناسرەدينوۆ (كامبودجا)/جونگجوحو ۆيراپون (تايلاند) جۇبىنىڭ جەڭىمپازدارىمەن جۇدىرىقتاسادى. ءۇش بىلعارى قولعاپ شەبەرىمىزدىڭ دە جولدارى جارتىلاي فينالعا دەيىن اشىق. وزبەكستان, موڭعوليا سەكىلدى ەلدەردىڭ بوكسشىلارىمەن تەك فينالدا عانا جولىعادى.
86 كيلو سالماقتا جۇدىرىقتاساتىن ساعىندىق توعانبايعا تاجىكستاننىڭ تاجىريبەلى بوكسشى ناۆرۋز دجافوەۆ قارسىلاس اتاندى. ول – 2013 جىلى ءدال وسى اممان قالاسىندا وتكەن ازيا چەمپيوناتىنىڭ جارتىلاي فينالىندا جەرلەسىمىز جانىبەك الىمحان ۇلىمەن شارشى الاڭدا كەزدەسىپ, جەڭىلىپ قالعان بولاتىن. بۇل جولعى باسەكەدە دە قازاق بوكسشىنىڭ مەرەيى ۇستەم بولادى دەگەن ۇمىتتەمىز. س.توعانباي جارتىلاي فينالدا بىلتىر الەم چەمپيوناتىنىڭ ءبىرىنشى اينالىمىندا بەلگيالىق ۆيكتور سحەلسترەدەن نوكاۋتپەن ماسقارا بولىپ جەڭىلگەن وزبەكستاندىق شوحدجاحون ابدۋللاەۆپەن, فينالدا ازيا چەمپيوناتىنىڭ ەكى دۇركىن قولا جۇلدەگەرى, ازيانىڭ ءبىرىنشى ءنومىرلى بوكسشىسى قىرعىزستاندىق ەركىن ادىلبەك ۇلىمەن جۇدىرىقتاسۋى مۇمكىن.
اۋىر سالماقتا (92 كگ) جاستار اراسىنداعى وليمپيادا جەڭىمپازى, قازاقستان چەمپيونى ايبەك ورالباي شيرەك فينالدا ءۇندىستان وكىلى ناۆين كۋمارمەن قولعاپ تۇيىستىرەدى. ەرەسەكتەر دوداسىنا بىلتىر عانا اۋىسقان ۇندىستاندىق بىلعارى قولعاپ شەبەرى وسال قارسىلاس بولماۋى بەك مۇمكىن.
ازيانىڭ ءۇشىنشى ءنومىرلى بوكسشىسى رەتىندە تىركەلگەن ايبەك جارتىلاي فينالدا يراندىق تۋفان شاريف, فينالدا وزبەكستان قۇراماسىنىڭ نامىسىن قورعايتىن تاعى ءبىر قازاق بوكسشىسى – ماديار سايدراحيموۆپەن باس جۇلدەنى ساراپقا سالۋى ىقتيمال. ەكى بوكسشى بىلتىر سەربياداعى الەم چەمپيوناتىنىڭ شيرەك فينالىندا كەزدەسىپ, ماديار ۇپاي سانىمەن جەڭىسكە جەتكەن بولاتىن. بالكىم, بۇل جولى ايبەك ەسە قايتارىپ قالار.
اسا اۋىر سالماقتا (+92 كگ) توكيو وليمپياداسىنىڭ قولا جۇلدەگەرى, əلەم بىرىنشىلىگىنىڭ ءفيناليسى قامشىبەك قوڭقاباەۆ شيرەك فينالدا ۆيشاح موحانناد (پالەستينا) پەن دو حەن كيم (وڭتۇستىك كورەيا) جۇبىنىڭ جەڭىمپازىمەن جۇدىرىقتاسادى. ال فينالدا وزبەك لازيزبەك مۋللوجونوۆ نەمەسە ۇندىستاندىق نارەندەرمەن كەزدەسەدى.
ال ايەلدەر اراسىنداعى جەرەبەگە توقتالار بولساق, ازيا چەمپيوناتى باستالماي جاتىپ, ءشامىل سافيۋللين جاتتىقتىراتىن قىزدار قۇراماسى ەل قورجىنىنا ءۇش جۇلدە سالىپ ۇلگەردى. ياعني ءوز سالماقتارىندا بىرىنشىلىككە قاتىساتىن بوكسشىلاردىڭ سانى از بولعاندىقتان, ءمادينا نۇرشاەۆا (66 كيلو), گۇلسايا ەرجان (81 كيلو) جانە لəززات كۇنگەيباەۆا (+81 كيلو) جارىستى جارتىلاي فينالدان باستايدى. بۇل – اتالعان ءۇش بوكسشىمىز كەم دەگەندە قولا جۇلدەگە قول جەتكىزىپ وتىر دەگەن ءسوز. جوعارىدا اتى اتالعان بوكسشىلارىمىز قولدا تۇرعان قولاسىن از كۇندە التىنعا اينالدىرادى دەگەن ۇمىتتەمىز. ال ولاردىڭ العاشقى اينالىمداعى قارسىلاستارى كىمدەر؟
12 سالماقتا سىنعا تۇسەتىن قىزدارىمىزدىڭ سەگىزى ازيا چەمپيوناتىن شيرەك فينالدان, ۇشەۋى جارتىلاي فينالدان باستايتىن بولدى. تەك الەم چەمپيوناتىنىڭ ەكى دۇركىن جەڭىمپازى, بىلتىرعى ازيا بىرىنشىلىگىنىڭ التىن جۇلدە يەگەرى نازىم قىزايباي عانا 1/8 فينالدا سىنعا تۇسەدى. ول ەكىنشى كەزەڭدە تايلاند وكىلى راكسات چۋتاماتپەن جۇدىرىقتاسادى. ال شيرەك فينالدا شارشى الاڭعا كوتەرىلەتىن جەڭىل سالماقتاعى الۋا بالقىبەكوۆانىڭ (48 كيلو) قارسىلاسى كەيىنىرەك بەلگىلى بولاتىن بولسا, جازيرا وراقباەۆا (52 كيلو) كورەيالىق چاۆون كيممەن, جاينا شەكەربەكوۆا (54 كيلو) جاپونيالىق حانا ناريتامەن, كارينا يبراگيموۆا (57 كيلو) كورەيالىق يم اەجيمەن, ريمما ۆولوسەنكو (60 كيلو) موڭعوليالىق نومين-ەردەن تۋگسجارگالمەن, ايدا ابىكەەۆا (63 كيلو) جاپونيالىق ماي كيتومەن, داريعا شاكىموۆا (70 كيلو) ۇندىستاندىق پۋجامەن جانە ۆالەنتينا حالزوۆا (75 كيلو) تاعى ءبىر ۇندىستاندىق لوۆلينا بورگويانمەن كەزدەسەدى.
ال جارتىلاي فينالداعى ءمادينا نۇرشاەۆا كورەيالىق چوي حونگۋمەن, گۇلسايا ەرجان ۆەتنامدىق تي حونگ نگۋەنمەن جانە ءلاززات كۇنگەيباەۆا ۇندىستاندىق الفيا تاراننۋم اكراممەن فينالدىق جولدامانى ساراپقا سالادى.
وكىنىشكە قاراي, ازيا بىرىنشىلىگىندەگى بوكسشىلارىمىزدىڭ جەكپە-جەكتەرىن قازاقستاندىق جانكۇيەرلەر تەلەارنالاردان كورە المايتىن بولدى. «اتالعان جارىستى Qazsport تەلەارناسى كورەرمەن نازارىنا ۇسىنۋدى جوسپارلاعانىمەن, ازيا بوكس كونفەدەراتسياسى مەن جەرگىلىكتى ۇيىمداستىرۋشىلار تەلەۆيزيالىق ءتۇسىرىلىم جاسامايتىندىقتان, ازيا چەمپيوناتىن كورسەتە المايمىز», دەلىنگەن Qazsport تەلەارناسىنىڭ حابارلاماسىندا.
