قازاقستاندىق سپورتشى العاشقى كەزەڭدە دۇنيەجۇزىلىك رەيتينگتە 74-ورىندا تۇرعان شۆەتسيالىق ميكاەل يمەرمەن شەبەرلىك بايقاستى. بۋبليك ءبىرىنشى سەتتە ماتچتى برەيكپەن باستاعانىمەن, كەيىننەن قاتارىنان التى گەيمدە قارسىلاسىنا جول بەرىپ, 1:6 ەسەبىمەن جەڭىلىپ قالدى. ەكىنشى سەتتى جەرلەسىمىز ءساتتى باستاعانىمەن, باسەكە تاي-برەيككە دەيىن سوزىلدى. بۇل جولى قارسىلاسىنا قاراعاندا ءساتتى ويناعان قازاقستاندىق تەننيسشى باسىم بولدى – 7:6 (7:2). ال ءۇشىنشى, شەشۋشى پارتيادا شۆەتسيالىق ءبارىبىر ءوز دەگەنىنە جەتىپ, كەلەسى كەزەڭگە جولداما الدى – 6:4. ەكى تەننيسشى بۇعان دەيىن دەۆيس كۋبوگى اياسىندا ءبىر مارتە كەزدەسىپ, وندا جەرلەسىمىز ءۇش سەتتە – 3:6, 6:0, 6:0 ەسەبىمەن جەڭىسكە جەتكەن بولاتىن.
سونداي-اق بۇگىن جۇپتىق سىنداعى الەمنىڭ 12-راكەتكاسى قازاقستاندىق اننا دانيلينا WTA قورىتىندى تۋرنيرىندەگى العاشقى كەزدەسۋىن وتكىزەدى. برازيليالىق بەاتريس حادداد مايامەن بىرگە جۇپتاسىپ ونەر كورسەتەتىن جەرلەسىمىز العاشقى اينالىمدا گابريەلا دابروۆسكي (كانادا) مەن دجۋليانا ولموس (مەكسيكا) جۇبىمەن وينايدى. اتالعان دودا اقش-تىڭ فورت-ۋورت قالاسىندا 31 قازاندا باستالسا, 7 قاراشاعا دەيىن جالعاسادى.
