«مەكتەپ سالۋ – وزەكتى ماسەلە. ەلوردا تۇرعىندارىنىڭ جىل سايىن ارتىپ كەلە جاتقانى ەسكەرىلىپ, وقۋ ورىندارى ورنالاساتىن جەر ۋچاسكەلەرىنىڭ دە سانىن كوبەيتتىك. قازىرگى ۋاقىتتا مەكتەپ سالىناتىن 102 جەر ۋچاسكەسىن بەلگىلەدىك. جەر ۋچاسكەلەرى الەۋمەتتىك نىسانداردىڭ قاجەتتىلىكتەرىنە وراي قالانىڭ بارلىق اۋدانىندا ورنالاسقان. ماسەلەن ەلوردا تۇرعىندارى كوبىرەك شوعىرلانعان جانە قارقىندى دامىپ كەلە جاتقان ەسىل اۋدانىندا مەكتەپ سالىناتىن – 49 ۋچاسكە, الماتى اۋدانىندا – 29 ۋچاسكە جانە ت.ب.
مەكتەپ پەن وزگە دە ماڭىزدى الەۋمەتتىك نىساندار سالۋ ءۇشىن جەر ۋچاسكەلەرىنىڭ سانى جىل سايىن ارتادى. ءار اۋداندا (شاعىن اۋدانداردا) وقۋ ورىندارى بولۋى ءۇشىن ەگجەي-تەگجەيلى جوسپارلاۋ جوباسىنا (ەتج) ارنايى باعىت بەكىتىلدى», دەپ جازدى اكىم Instagram پاراقشاسىندا.
ونىڭ ايتۋىنشا, «جايلى مەكتەپ» ۇلتتىق جوباسى اياسىندا 23 اسا ءىرى مەكتەپتىڭ جوباسى جاسالدى. بۇل 23 مەكتەپ 2 اۋىسىمدا 84 مىڭنان استام وقۋشىنى قامتۋعا مۇمكىندىك بەرەدى.
- «جايلى مەكتەپ» جوباسى اياسىندا ءبىلىم وشاقتارىنىڭ قۇرىلىسىن كەلەسى جىلى باستايمىز. وسىلايشا, ءبىز اۋقىمدى مەكتەپتەر سالۋدى جالعاستىرامىز. وسىعان دەيىن استانادا 6 ءىرى مەكتەپ اشتىق, ولاردىڭ ارقايسىسى 4 مىڭ وقۋشى ورنىنا ەسەپتەلگەن. قالانى ارالاۋ بارىسىندا بىرقاتار مەكتەپتىڭ قۇرىلىس بارىسىمەن تانىستىم. مىسالعا بۇل مەكتەپتەر ۇلى دالا داڭعىلىندا, ۇلى دالا مەن ساۋران داڭعىلىنىڭ قيىلىسىندا, 187-كوشەدە جانە قاراساي باتىر كوشەسىندە ورنالاسقان. اتالعان مەكتەپتەردى بيىلعى وقۋ جىلىندا اشۋدى جوسپارلاپ وتىرمىز, - دەلىنگەن جازبادا.
