«2026 جىلعا دەيىن ءبىلىم بەرۋدى دامىتۋ تۇجىرىمداماسى ازىرلەندى. تۇجىرىمداما ستراتەگيالىق جانە باعدارلامالىق قۇجاتتاردا انىقتالعان نەگىزگى باسىمدىقتاردى قاراستىرادى. ءبىز ءارتۇرلى حالىقارالىق زەرتتەۋلەر مەن تالداۋلاردىڭ ناتيجەلەرىن ەسكەرە وتىرىپ, ساراپشىلارمەن جانە پەداگوگيكالىق قوعاممەن تالقىلاۋلار وتكىزدىك, ءتيىستى ۇسىنىستار ازىرلەدىك. قۇزىرەتىنە سايكەس التى باعىت, 109 ءىس-شارا قاراستىرىلعان», دەدى اسحات ايماعامبەتوۆ.
ول مينيسترلىك ءبىلىم بەرۋ تۇجىرىمداماسى شەڭبەرىندە كوزدەلگەن مىندەتتەر مەن باستامالاردى ىسكە اسىرۋ ءۇشىن ساپالى شارالار قابىلدايتىنىن اتاپ ءوتتى.
سونداي-اق ۆەدومستۆو باسشىسى بالالاردىڭ ەرتە دامۋىنا بايلانىستى ماسەلەگە پىكىر ءبىلدىردى.
ء«بىلىم بەرۋدىڭ ماڭىزدى دەڭگەيى - بالاباقشالار. زەرتتەۋلەرگە سايكەس, بالاباقشالار بالالاردىڭ ينتەللەكتۋالدى, ەموتسيونالدى, الەۋمەتتىك, پسيحولوگيالىق دامۋىنا اسەر ەتەدى. وسىعان بايلانىستى بالاباقشالاردا بالالاردى دامىتۋدىڭ جاڭا مودەلى ەنگىزىلۋدە, وقىتۋ باعدارلامالارى مەن ادىستەرى وزگەرۋدە. بۇل مەكتەپكە دەيىنگى تاربيە مەن وقىتۋ سالاسىنداعى ەڭ ۇلكەن وزگەرىس دەپ ايتۋعا بولادى. ەگەر بۇرىن باعدارلاما تىم اكادەميالىق بولسا جانە 3-4 جاستاعى بالالار 20 مينۋتتان ساباق السا, ەندى حالىقارالىق تاجىريبەنى ەسكەرە وتىرىپ, وقۋ پروتسەسى ويىن ارقىلى وتەدى», دەپ ءتۇسىندىردى ۆەدومستۆو باسشىسى.
ءمينيستردىڭ ايتۋىنشا, بالانىڭ تۇتاس دامۋى ءۇشىن بارلىق جاعداي قاراستىرىلاتىن بولادى.
