وتەماقى تولەۋدىڭ شارتتارىن, ءتارتىبى مەن مەرزىمىن ءار بانك ءوز بەتىنشە انىقتايدى. سوندىقتان بۇل اقپاراتتاردى ءبىلۋ ءۇشىن سالىمشىلار دەپوزيت اشىلعان بانككە تىكەلەي حابارلاسۋى قاجەت. ءتيىستى اقپارات ەكىنشى دەڭگەيلى بانكتەردىڭ رەسمي سايتتارىندا دا بار.
ء«بىز سالىمشىلاردى وتەماقى الۋ مۇمكىندىگىن پايدالانۋعا شاقىرامىز. ەگەر سىزدە 2022 جىلدىڭ 23 اقپانىنا دەيىن دەپوزيت اشىلعان بولسا, ءسىزدىڭ بۇل سىيلىقاقىنى الۋعا قۇقىعىڭىز بار. وتەماقى سالىمىنىڭ ەڭ جوعارى سوماسى 20 ملن تەڭگە بولعانىمەن, ستاتيستيكا كورسەتكەندەي, وتەماقى تولەۋگە نەگىزىنەن 1 ملن تەڭگەگە دەيىنگى دەپوزيتتەر جاتادى», دەدى قازاقستاننىڭ دەپوزيتتەرگە كەپىلدىك بەرۋ قورىنىڭ توراعاسى ءادىل وتەمباەۆ.
تولەمدەردى بانكتەر 2023 جىلدىڭ 23 اقپانىنان كەيىن ەرەجەلەردە بەلگىلەنگەن مەرزىمدەردە جۇرگىزەدى. جيناق, مەرزىمدى, مەرزىمسىز, سونداي-اق ءبىلىم بەرۋ جيناقتاۋ سالىمدارى جانە تۇرعىن ءۇي قۇرىلىس جيناقتارى جۇيەسىندەگى جيناقتار مەن سالىمدار وتەۋگە جاتادى.
قازاقستاننىڭ دەپوزيتتەرگە كەپىلدىك بەرۋ قورىنىڭ اقپاراتىنا سايكەس 2022 جىلدىڭ 1 قىركۇيەگىندەگى جاعداي بويىنشا 5 ملن-نان استام سالىمشىنىڭ سالىمدارى وتەماقىعا جاتادى. ولاردىڭ ىشىندە سالىمشىلاردىڭ 97 پايىزىندا 5 ملن تەڭگەگە دەيىن دەپوزيت بولسا, سونىڭ باسىم بولىگىندە (86 پايىزى) 1 ملن تەڭگەگە دەيىن سالىم بار ەكەن.
