بايقاۋدا ونەگەلى 8 ۇمىتكەر ءتورت كەزەڭ بويىنشا سىنعا ءتۇستى. قاتىسۋشىلار بايقاۋدىڭ ءبىرىنشى كەزەڭىندە وزدەرىن بەينەروليك ارقىلى تانىستىرسا, ەكىنشى كەزەڭدە سالت-داستۇرگە قاتىستى, وتباسىلىق ومىرمەن بايلانىستى لوگيكالىق سۇراقتارعا جاۋاپ بەردى. بايقاۋدىڭ ءۇشىنشى كەزەڭىندە كەلىندەر ءوز ونەرلەرىن كورسەتتى. ءبىرى ءان سالىپ بي بيلەسە, ەندى ءبىرى دومبىرا تارتىپ, اقىندىق قىرىنان تانىلدى. سوڭعى كەزەڭ بويىنشا قازاقتىڭ ۇلتتىق تاعامدارىن ءپىسىرىپ, اسپازدىق ونەرلەرىن ورتاعا سالدى.
بايقاۋدا ەتنوگراف-عالىم, فولكلورشى, قازاقى دۇنيەتانىمعا بايلانىستى كوپتەگەن كىتاپتىڭ اۆتورى بولات بوپاي ۇلى, داريعا التاي, وتباسى جانە بالالار پسيحولوگى, تاجىريبەلى پسيحوتەراپەۆت ءساليما ساتىلعانقىزى, «اناعا قۇرمەت» مۇراجايىنىڭ باسشىسى ارشاگۇل تويباەۆا قازىلىق ەتتى.
«باقىتتى وتباسى» الەۋمەتتىك ورتالىعىنىڭ جەتەكشىسى تولقىن سامەتوۆا وسىنداي يگى ءىس-شارانىڭ كەڭ كولەمدە وتكىزىلىپ جاتقانىنا ريزاشىلىعىن ايتىپ, «جاھاندانۋ عاسىرىندا ۇمىتىلىپ بارا جاتقان سالت-داستۇرلەرىمىزدى جاڭا زامانمەن سايكەستەندىرىپ, تۇپكى ماعىناسىن جوعالتپاي, جاڭاشالاپ, جاڭا دەم بەرۋىمىز كەرەك. بۇگىنگى ءىس-شارا دا وسىنداي ماقساتپەن ۇيىمداستىرىلعان بولاتىن. ءبىزدىڭ ويىمىزشا, تاربيەلىك ءمانى بار ءىس-شارالار ەلىمىزدىڭ بارلىق وڭىرىندە ءجيى ءوتىپ تۇرسا يگى» دەپ اتاپ ءوتتى. سونىمەن بىرگە وسى شارانى وتكىزۋگە اتسالىسقان اۋدان باسشىلىعى مەن مەكتەپ-گيمنازيانىڭ ۇجىمىنا العىس ءبىلدىردى.
بايقاۋ قورىتىندىسى بويىنشا الماتى وبلىسىنان التىناي حودجاەۆا, اياۋجان سادۋاقاسوۆا, جامبىل اۋدانىنان قىمبات سلامباي, ماڭعىستاۋ وبلىسى اقتاۋ قالاسىنان ءنۇريا سانازاروۆا, قاراعاندى وبلىسىنان انارا احمەتوۆا, اقتوبە قالاسىنان فاريزا تولەباەۆا, قىزىلوردا وبلىسىنان پەريزات باكيروۆا, جاڭاقورعان اۋدانىنان راۋان قالمانوۆا «ىسكەر كەلىن», «يبالى كەلىن», «اقىن كەلىن», «تالىمگەر كەلىن», «قوناقجاي كەلىن», «اياۋلى كەلىن», «بەساسپاپ شەبەر كەلىن», «ونەرپاز كەلىن» نوميناتسيالارىندا جەڭىمپاز اتانىپ, الدى 7 بالا تاربيەلەپ وتىرعان انالار باعالى سىيلىقتارعا يە بولدى.
الماتى
