پاۆلودار قالاسىنىڭ سولتۇستىك بولىگىندە جۇزەگە اسىپ جاتقان فەرمەرلىك بازار قۇرىلىسى باستاپقىدا كۇزدىڭ ەكىنشى ايىندا دايىن بولادى دەپ جوسپارلانعان. الايدا شەتەلدەن جەتكىزىلەتىن كەيبىر قۇرال-جابدىقتاردىڭ كەشىگۋىنەن تاپسىرۋ مەرزىمى شەگەرىلدى. ونىڭ ۇستىنە جوبانىڭ وزىندىك قۇنى دا باستاپقىدا 380 ملن تەڭگەگە باعالانسا, كەيىننەن وعان وبلىس بيۋدجەتىنەن جالپى سوماسى 839 ملن تەڭگە قاراجات ءبولىندى. بۇل جەردە ساتۋشىلار مەن ساتىپ الۋشىلار ءۇشىن قولايلى جاعدايلار قاراستىرىلادى ءارى تۇراقتاندىرۋ قورىنا قاجەت ساقتاۋ قويمالارىنىڭ ماسەلەسى شەشىلمەك.
– فەرمەرلىك بازاردى قالا جۇرتشىلىعى, اسىرەسە زەينەتكەرلەر كۇتىپ قالعانىن جاقسى تۇسىنەمىز. نەگىزى جوبا جوسپار بويىنشا بيىلعى جەلتوقسان ايىندا تاپسىرىلۋى كەرەك. ءبىز مەرزىمىنەن بۇرىن اياقتاعىمىز كەلدى. سايكەسىنشە قاراشا ايىندا تولىق ىسكە قوسىلادى دەپ جوسپارلاپ وتىرمىز. قۇرىلىس-مونتاجداۋ جۇمىستارى اياقتالىپ قالدى, ەندى اۋماقتى اباتتاندىرىپ, ىشكى ارلەۋ جۇمىستارى جالعاسۋدا. جاڭا بازاردا وندىرۋشىلەر ءوز ونىمدەرىن تىكەلەي ساۋدالايدى, ساۋدا ۇستەمەاقىسى دەگەن بولمايدى. نىسان دايىن بولعاندا ول جەرگە شامامەن 40-تان استام جەرگىلىكتى وندىرۋشىلەر جىبەرىلەدى. اپتا سايىن كادىمگىدەي جارمەڭكەلەر ۇيىمداستىرىلىپ, تۇرعىندار كوتەرگەنىنشە ازىق-ت ۇلىك ونىمدەرىن ساتىپ الا الادى, – دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى تالعات دوعالوۆ.
بازار تاڭەرتەڭنەن كەشكە دەيىن جۇمىس ىستەمەك. ەت ساۋداسى ءۇشىن مۇندا 16 ورىن بولىنسە, قالعانىندا باكالەيا جانە وزگە تاۋارلار ساتىلادى. نارىقتا تانىمال «رۋبيكوم» جانە «كرەندەل» سەكىلدى كومپانيالارمەن كەلىسسوز جۇرگىزىلىپ جاتقان كورىنەدى. قازىردىڭ وزىندە 15 ساتۋشى مۇندا ساۋدا-ساتتىق جۇرگىزۋگە نيەت تانىتقان.
– بازارداعى ساۋدا پاۆيلوندارىن جالداۋ قۇنى ارزان, شارشى مەترى ءۇشىن 2 مىڭ تەڭگە تولەيدى. فەرمەرلىك بازار اشىلعان سوڭ «كۆازار» ساۋدا ءۇيىنىڭ جانىندا سەنبى سايىن ۇيىمداستىرىلىپ كەلە جاتقان اۋىلشارۋاشىلىق ونىمدەرىنىڭ جارمەڭكەسى تولىعىمەن سوندا كوشەدى دەپ وتىرمىز. ساتۋشىلار جاڭا ورىنعا ورنالاسادى. ساتىپ الۋشىلار بازارعا ترامۆايمەن جانە اۆتوبۋسپەن جەتە الادى. جاڭادان مارشرۋتتار ۇيىمداستىرىلادى, – دەيدى «پاۆلودار» اكك» اق باسقارما توراعاسىنىڭ مىندەتىن اتقارۋشى بەك ورازعۇلوۆ.
بولاشاق بازاردا ساۋدا ورىندارىنان بولەك, اسحانا, كوشە ساۋداسىنا ارنالعان قالقاندار جانە جۇك كولىكتەرىنە ارنالعان ۇلكەن تۇراق اشىلادى. قاجەت بولسا, جالپى سانى 240 ساۋدا ورنى جاساقتالۋى دا مۇمكىن. مۇنداعى ءونىم ساقتايتىن توڭازىتقىشتاردىڭ اۋقىمدىلىعى دا تاڭعالدىرىپ وتىر, شامامەن 180 شارشى مەتر ءونىم ءبىر مەزەتتە سىيىپ كەتەدى ەكەن. ساۋدا ورنىنىڭ تازالىعى مەن لوگيستيكاسىنا 12 قىزمەتكەر جاۋاپ بەرەدى. ءار سەنبى سايىن مۇندا 7-8 مىڭ ادام كەلىپ ساۋدا جاسايدى دەپ بولجانۋدا.
پاۆلودار
