قورعانىس ۆەدومستۆوسىنىڭ باسشىسى قاتىسۋشىلاردى ۇلتتىق مەرەكە – رەسپۋبليكا كۇنىمەن قۇتتىقتادى. ول دەموكراتيالىق الەۋمەتتىك قۇقىقتىق مەملەكەت قۇرۋدى, تاۋەلسىز دامۋدى, ونىڭ اۋماعىنىڭ بولىنبەيتىندىگى مەن قول سۇعىلمايتىندىعىن جاريالاعان مەملەكەتتىك ەگەمەندىك تۋرالى دەكلاراتسيانى قابىلداۋدىڭ ماڭىزدى ەكەنىن اتاپ ءوتتى.
مەملەكەتتىلىكتى نىعايتۋعا, جاستاردى اسكەري-پاتريوتتىق تاربيەلەۋگە قارۋلى كۇشتەر مەن ءبىلىم بەرۋ مەكەمەلەرى دە ءوز ۇلەستەرىن قوسىپ كەلەدى. ەلىمىزدىڭ قورعانىس مينيسترلىگى مەن جوعارى وقۋ ورىندارىنىڭ بەلگىلەنگەن مەرزىمدە قىزمەت ەتكەن اسكەري قىزمەتشىلەرگە تەگىن جوعارى ءبىلىم الۋ مۇمكىندىگىن بەرۋ جونىندەگى بىرلەسكەن جوباسى دا اسكەري قىزمەتتىڭ بەدەلىن ارتتىرۋعا ىقپال ەتەتىن بولادى.
– اتالعان باستامانىڭ جاقسى جاعى جەتەرلىك. بۇل ستۋدەنتتىك ورتادا ءپاتريوتيزمدى نىعايتۋعا ىقپال ەتەرى انىق. بىرىنشىدەن, جوعارى وقۋ ورىندارىنا وزدەرىن جاقسى جاعىنان كورسەتىپ, مۇقيات ىرىكتەۋدەن وتكەندەر كەلەدى. ەكىنشىدەن, وقۋ ورىندارىنا باراتىندار – ارميا مەكتەبىنەن وتكەن جاستار. مىقتى, ءتوزىمدى, ءتارتىپتى بالالار ستۋدەنتتەرگە باتىلدىق پەن دەربەستىكتىڭ ۇلگىسى بولادى, – دەدى ۆەدومستۆو باسشىسى, گەنەرال-پولكوۆنيك رۋسلان جاقسىلىقوۆ.
ەلۋدەن استام جوعارى وقۋ ورنىنىڭ باسشىلارى قول قويعان كەلىسىمدە ىنتىماقتاستىق باعىتتارى, سونداي-اق مەرزىمدى اسكەري قىزمەت وتكەرگەن ادامدارعا تەگىن ءبىلىم الۋ ءۇشىن جىل سايىن بولىنەتىن ورىنداردىڭ سانى ايقىندالعان.
كەلىسىمدەر 2023 جىلدان باستاپ كۇشىنە ەنەدى. اسكەردە بورىشىن وتكەرگەن ازاماتتارعا ءبىلىم الۋ جەڭىلدىكتەرىن بەرۋ اسكەري قىزمەتكە دەگەن ىنتانى ارتتىرارى ءسوزسىز. ءىس-شارا قورعانىس مينيسترلىگىنىڭ ورتالىق ءانسامبلى دايىنداعان مەرەكەلىك كونتسەرتپەن اياقتالدى.
