قاراعاندى وبلىسى ءىىد ۇيىمداسقان قىلمىسقا قارسى كۇرەس دەپارتامەنتىنە ادۆوكاتتاردىڭ ءبىرىنىڭ زاڭسىز ارەكەتى تۋرالى اقپارات كەلىپ تۇسكەن.
ءتارتىپ ساقشىلارىنىڭ ايتۋىنشا, ادۆوكات اسا اۋىر قىلمىستىق ءىس بويىنشا جابىرلەنۋشى تاراپتىڭ مۇددەسىن قورعاعان. ال قىلمىس جاساعان ايىپتالۋشى توپ سوتتا جالعان جاۋاپ بەرۋى ءۇشىن قورعاۋشىعا قوماقتى قاراجات بەرگەن. قورعاۋشى ايىپتالۋشى تاراپىنىڭ بۇل ۇسىنىسىنا كونىپ, ارادا دەلدالدىق قىزمەت اتقارعان.
«22 قازاندا 6,5 ميلليون تەڭگە جانە 2,9 مىڭ دوللار كولەمىندەگى قاراجات اۋدارىلعاننان كەيىن ۇيىمداسقان قىلمىسقا قارسى كۇرەس باسقارماسى 36 جاستاعى ادۆوكاتتى ۇستادى. ونىڭ كولىگىن ءتىنتۋ كەزىندە پوليتسەيلەر تاعى 3100 دوللار تاركىلەدى», دەدى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
اتالعان فاكتى بويىنشا قر قىلمىستىق كودەكسىنىڭ 422-بابىنىڭ 4-بولىگىمەن «اسا اۋىر قىلمىس جاسادى دەپ ايىپتاۋمەن بايلانىستى جالعان ايعاقتار بەرۋگە ماجبۇرلەۋ نەمەسە پارا الۋ» بويىنشا قىلمىستىق ءىس قوزعالدى.
