ورتالىق سايلاۋ كوميسسياسىنىڭ مۇشەسى ءسابيلا مۇستافينا باقىت جاڭاباەۆتىڭ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەس پرەزيدەنتتىككە كانديداتتى تىركەۋ ءۇشىن كانديداتتىڭ جانە ونىڭ جۇبايىنىڭ اكتيۆتەرى مەن مىندەتتەمەلەرى تۋرالى دەكلاراتسيا تاپسىرعانى تۋرالى انىقتامانى جانە دەنساۋلىق جاي-كۇيى تۋرالى مەديتسينالىق قورىتىندى ۇسىنعانىن حابارلادى. اۋماقتىق سايلاۋ كوميسسيالارىنىڭ حاتتامالارىنا سايكەس كانديداتتى قولداۋ ءۇشىن 58 889 قول جينالعان. تەكسەرۋ ناتيجەلەرى بويىنشا 4 054 قول راس دەپ تانىلدى. بۇل سايلاۋشىلاردىڭ جالپى سانىنىڭ كەمىندە ءبىر پايىزىنا تەڭ. وسىلايشا, سايلاۋ تۋرالى كونستيتۋتسيالىق زاڭنىڭ 56-بابى 2-تارماعىنىڭ كانديداتتى قولداۋعا سايلاۋشىلاردىڭ قاجەتتى قولدار سانى تۋرالى تالابى ورىندالماعان. ورتالىق سايلاۋ كوميسسياسىنىڭ قاۋلىسىمەن باقىت جاڭاباەۆتى پرەزيدەنتتىككە كانديدات رەتىندە تىركەۋدەن باس تارتىلدى.
ورتالىق سايلاۋ كوميسسياسىنىڭ مۇشەسى شاۆقات وتەمىسوۆ نۇرجان التاەۆتى 2022 جىلعى 6 قازاندا «مۇقالماس» رەسپۋبليكالىق قوعامدىق بىرلەستىگى كانديدات رەتىندە ۇسىنعانىن حابارلادى. 11 قازانداعى استانا قالاسى بايقوڭىر اۋدانى سوتىنىڭ ۇيعارىمىمەن ن.التاەۆتى پرەزيدەنتتىككە كانديدات ەتىپ ۇسىنۋ تۋرالى «مۇقالماس» بىرلەستىگى حاتتاماسىنىڭ قولدانىلۋى توقتاتىلعانىنا بايلانىستى ورتالىق سايلاۋ كوميسسياسى 12 قازاندا كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەستىگىن بەلگىلەۋ ءراسىمىن توقتاتقان. 17 قازاندا سوت ءوز شەشىمىمەن جوعارىدا اتالعان حاتتامانى جارامسىز دەپ تانىدى. وسىلايشا, قازىرگى ۋاقىتتا ورتالىق سايلاۋ كوميسسياسىنىڭ قاراۋىندا ن.التاەۆتى پرەزيدەنتتىككە كانديدات ەتىپ ۇسىنۋ تۋرالى قولدانىستاعى قۇجات جوق. وسىنىڭ نەگىزىندە ورتالىق سايلاۋ كوميسسياسى ن.التاەۆتى ۇسىنۋ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 54-بابىندا بەلگىلەنگەن تالاپتارعا سايكەس كەلمەيتىنىن انىقتادى جانە ونى كانديدات رەتىندە تىركەۋدەن باس تارتتى.
ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا جۇماتاي اليەۆتىڭ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەس پرەزيدەنتتىككە كانديداتتى تىركەۋ ءۇشىن كانديداتتىڭ اكتيۆتەرى مەن مىندەتتەمەلەرى تۋرالى دەكلاراتسيا تاپسىرعانى تۋرالى انىقتامانى جانە دەنساۋلىق جاعدايى تۋرالى مەديتسينالىق قورىتىندى ۇسىنعانىن حابارلادى. بۇل رەتتە ۇسىنىلعان مەديتسينالىق قورىتىندى ورتالىق سايلاۋ كوميسسياسىنىڭ بىرلەسكەن نورماتيۆتىك قاۋلىسىمەن جانە دەنساۋلىق ساقتاۋ مينيسترلىگىنىڭ بۇيرىعىمەن بەكىتىلگەن بەلگىلەنگەن نىسانعا سايكەس كەلمەيتىنى انىقتالدى. اۋماقتىق سايلاۋ كوميسسيالارىنىڭ حاتتامالارىنا سايكەس كانديداتتى قولداۋ ءۇشىن 187 723 قول جينالعان. تەكسەرۋ ناتيجەسىندە 36 776 قول راس دەپ تانىلدى. بۇل سايلاۋشىلاردىڭ جالپى سانىنىڭ كەمىندە ءبىر پايىزىنا تەڭ. وسىلايشا سايلاۋ تۋرالى كونستيتۋتسيالىق زاڭنىڭ 56-بابى 2-تارماعىنىڭ كانديداتتى قولداۋعا سايلاۋشىلاردىڭ قاجەتتى قولدار سانى تۋرالى تالابى ورىندالمادى. ورتالىق سايلاۋ كوميسسياسىنىڭ قاۋلىسىمەن جۇماتاي اليەۆتى كانديدات رەتىندە تىركەۋدەن باس تارتىلدى.
