قازىر قازاق دالاسىندا سەكەننىڭ «كوڭىل تولقىنى» كۇيى وينامايتىن كۇن كەمدە-كەم شىعار. اتاقتى تۋىندىسىن كۇيشى 24 جاسىندا جازىپتى. ودان كەيىن «اق جاۋىن», «ارۋانا», «وكىنىش» سىندى بىرنەشە كۇي توپتاماسى جارىق كوردى. وسى جولعى كەشىن « ۇلى دالا» اتتى تۋىندىسىمەن اشقان كۇيشى «اقجايلاۋ», «ەركە قۇسىم», «جازعى قار», «اسىل انا» كۇيلەرى مەن باسقا دا شىعارمالارىن كۇمبىرلەتتى. اۆتور شىعارمالارىن ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترىمەن بىرگە ورىندادى. قازاق وركەسترىنىڭ باس ديريجەرى – قازاقستاننىڭ ەڭبەك سىڭىرگەن قايراتكەرى, «پاراسات» وردەنىنىڭ يەگەرى, پروفەسسور ايتقالي جايىموۆ.
«بۇل كەشىمدى رەسپۋبليكا كۇنىنە ارنايمىن» دەگەن اۆتوردىڭ «كۇلتەگىن», «كوك ءبورى», «دارابوز» اتتى كۇيلەرى ءبىر توبە. سونىمەن قاتار كەش قوناقتارى ءۇشىن «قۇرمەت» وردەنىنىڭ يەگەرى جانار ءجۇسىپوۆا «تولەگەتاي بابا» كۇيىن تارتسا, قازاقستاننىڭ ەڭبەك سىڭىرگەن قايراتكەرى بيبىگۇل قيىلىمحان «اسىل انا» ءانىن سالدى. قازاقستاننىڭ ەڭبەك سىڭىرگەن قايراتكەرى قايىرجان بەردىبايدىڭ ورىنداۋىندا ابايدىڭ ولەڭىنە جازىلعان «مەن ءبىر جۇمباق اداممىن», گۇلميرا سارينانىڭ ورىنداۋىندا «قوڭىر جەل» جانە وزگە دە تۋىندىلار شىرقالدى.
سەكەن تۇرىسبەكتىڭ كۇيلەرى كەزىندە جاپونيا مەن قىتايدا, فرانتسيا مەن يتاليادا حالىقتىڭ ەرەكشە ىقىلاسىنا بولەنگەنى بەلگىلى. كۇيشىنىڭ بىرنەشە شىعارماسىن قازاق كوركەم فيلمدەرىنەن تىڭداۋعا بولادى, سونىڭ ىشىندە «باتىر بايان» ءفيلمىنىڭ مۋزىكاسى سەكەن كۇيلەرىمەن سۇيەمەلدەنگەن.
