كەڭەستە وبلىس اكىمى دارحان ساتىبالدى وڭىردەگى اعىمداعى احۋال, نەگىزگى ەكونوميكالىق كورسەتكىشتەر مەن ينۆەستيتسيالىق جوبالاردى ىسكە اسىرۋ بارىسى تۋرالى باياندادى. سونىمەن قاتار يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ, مادەنيەت جانە سپورت ءمينيسترى داۋرەن اباەۆ, ءبىرىنشى ەنەرگەتيكا ۆيتسە-ءمينيسترى مۇرات جۇرەبەكوۆ, اۋىل شارۋاشىلىعى ۆيتسە-ءمينيسترى جەڭىس وسەرباي جانە وقۋ-اعارتۋ ۆيتسە-ءمينيسترى عاني بەيسەمباەۆ بايانداما جاسادى.
بايانداماشىلاردى تىڭداپ بولعاننان كەيىن پرەمەر-مينيستر بيىل وبلىستى دامىتۋعا رەسپۋبليكالىق بيۋدجەتتە 367 ملرد تەڭگەدەن استام قاراجات قاراستىرىلعانىن اتاپ ءوتتى. بيۋدجەتتى ناقتىلاۋ كەزىندە تاعى 100 ملرد تەڭگە ءبولىندى.
«بۇل قاراجات ينجەنەرلىك ينفراقۇرىلىمدى دامىتۋعا, الەۋمەتتىك ماسەلەلەردى شەشۋگە جانە ءوڭىردىڭ اگروونەركاسىپ كەشەنىن قولداۋعا باعىتتالعان. جىل سوڭىنا دەيىن از ۋاقىت قالدى, سوندىقتان جوسپارلانعان ناتيجەلەرگە قول جەتكىزۋ ءۇشىن بيۋدجەت قاراجاتىن ماقساتتى جانە ءتيىمدى پايدالانۋدى قامتاماسىز ەتۋ قاجەت», دەدى ءاليحان سمايىلوۆ.
سونىمەن قاتار ۇكىمەت باسشىسى قوجا احمەت ياساۋي كەسەنەسىنىڭ ساقتالۋىن قامتاماسىز ەتۋ قاجەتتىگىنە نازار اۋداردى. پرەمەر-مينيستر قازىرگى ۋاقىتتا كەسەنە اينالاسىندا قارقىندى قۇرىلىس ءجۇرىپ جاتقانىن, وعان كەلۋشىلەر سانى دا ەداۋىر ارتقانىن اتاپ ءوتتى. وسىعان بايلانىستى اكىمدىك يۋنەسكو مەن باسقا دا حالىقارالىق ۇيىمداردىڭ ۇسىنىمدارىن قاتاڭ ساقتاۋى كەرەك.
ەكونوميكالىق ماسەلەلەرگە توقتالعان ءاليحان سمايىلوۆ ازاماتتاردىڭ ءال-اۋقاتىن ارتتىرۋ ءۇشىن ءبىرىنشى كەزەكتە ءوڭىردىڭ دامۋىنا سەرپىن بەرەتىن جاڭا ينۆەستيتسيالىق جوبالاردى ىسكە قوسۋ جونىندە شارالار قابىلداۋ قاجەت ەكەنىن اتاپ ءوتتى. ماسەلەن, بيىل وبلىستا 33 ملرد تەڭگەگە 29 جوبانى ىسكە اسىرۋ جوسپارلانعان. بۇدان بولەك 1,9 ترلن تەڭگەگە تاعى 74 جوبا تالقىلانىپ جاتىر.
«جاڭا ينۆەستيتسيالىق جوبالاردى ىسكە اسىرۋ ارقىلى جاڭا جۇمىس ورىندارىن اشۋ كەرەك. وبلىس اكىمدىگى جوسپارلانعان جوبالاردىڭ بارلىعىن مەرزىمىندە ءارى ساپالى ىسكە قوسۋدى قامتاماسىز ەتۋى قاجەت», دەدى ءاليحان سمايىلوۆ.
سونىمەن قاتار پرەمەر-مينيستر ازىق-ت ۇلىك تاپشىلىعىنا جانە باعانىڭ نەگىزسىز وسۋىنە جول بەرمەۋ ءۇشىن بارلىق قولدا بار نارىقتىق مەحانيزمدەردى ءتيىمدى پايدالانۋ, وبلىستىڭ ينفراقۇرىلىمى مەن اگروونەركاسىپ كەشەنىن دامىتۋ بويىنشا كەشەندى جۇمىس جۇرگىزۋ, سونداي-اق «جايلى مەكتەپ» ۇلتتىق جوباسى بويىنشا وڭىردەگى وقۋشى ورىندارىنىڭ سانىن ۇلعايتۋ جونىندە شارالار قابىلداۋ قاجەتتىگىن اتاپ كورسەتتى.
«مەملەكەت باسشىسىنىڭ تاپسىرماسى بويىنشا سىبايلاس جەمقورلاردان الىنعان قاراجات ەندى مەكتەپتەر مەن ولارعا قوسىمشا قۇرىلىستار سالۋعا باعىتتالاتىن بولادى. بۇگىنگى تاڭدا رەسپۋبليكا بويىنشا 100 ملرد تەڭگە تۋرالى ءسوز بولىپ وتىر. قاراجات ءبولۋ قاراشا ايىندا باستالادى», دەدى پرەمەر-مينيستر.
