قازىرگى ۋاقىتتا ەل بويىنشا ماۋسىمدىق اۋرۋلار كەزەڭى ءجۇرىپ جاتىر.
29 قىركۇيەكتەن باستالعان جرۆي مەن تۇماۋدىڭ اعىمداعى ەپيدەميالىق ماۋسىمىندا استانا قالاسىنىڭ تۇرعىندارى اراسىندا جرۆي-دىڭ 7 مىڭعا جۋىق جاعدايى, ونىڭ ىشىندە 14 جاسقا دەيىنگى بالالار اراسىندا 4 مىڭنان استام جاعداي انىقتالعان.
«ادامداردىڭ كوپشىلىگى تۇماۋدى اسا اۋىر اۋرۋلاردىڭ قاتارىنا جاتقىزبايدى. الايدا تۇماۋ كەزىندە بالالار, قارت ادامدار, سونداي-اق جۇرەك پەن وكپەنىڭ سوزىلمالى اۋرۋلارى بار ادامدار ۇلكەن قاتەردە بولادى. تۇماۋ اسىرەسە جوعارى قاۋىپ توبىنداعى ادامداردا اۋىر اۋرۋدىڭ دامۋىنا جانە ولىمگە اكەلۋى مۇمكىن ەكەنىن ۇمىتپاۋىمىز كەرەك», دەدى بەرىك قايكەنوۆ.
ونىڭ ايتۋىنشا, ءبىر اي ىشىندە ەلوردادا جۇكتى ايەلدەر اراسىندا جرۆي مەن تۇماۋدىڭ 542 جاعدايى تىركەلدى. تاۋلىگىنە 18 ءوتىنىش كەلىپ تۇسسە, ونىڭ 3-ەۋى اۋرۋحاناعا جاتقىزىلدى. 15 جۇكتى ايەل امبۋلاتوريالىق باقىلاۋدا.
«قازىرگى ۋاقىتتا استانادا جرۆي-مەن سىرقاتتانۋشىلىق وسۋدە, ءبىز ونى اۋرۋحاناعا جاتقىزىلعان جۇكتى ايەلدەر مەن بالالاردىڭ سانىنان بايقاپ وتىرمىز. ەگەر قىركۇيەك ايىنىڭ سوڭىندا اۋرۋحاناعا كۇنىنە 3-4 ايەل تۇسسە, قازىر ورتاشا اۋىر جاعدايى بار 14-تەن 16-عا دەيىن جۇكتى ايەل اۋرۋحاناعا جاتقىزىلادى. تىنىس الۋ جەتكىلىكسىزدىگى مەن پنەۆمونيانىڭ بەلگىلەرى بايقالمايدى. بارلىق پاتسيەنتتەر COVID-19-عا تەكسەرىلەدى جانە وڭ ناتيجە جوق», دەپ اتاپ ءوتتى باسشى ورىنباسارى.
سونداي-اق بەرىك قايكەنوۆ تۇرعىنداردى اۋرۋدىڭ العاشقى بەلگىلەرىندە ءوزىن-ءوزى ەمدەۋمەن اينالىسپاۋعا شاقىرىپ, تۇرعىلىقتى جەرى بويىنشا ەمحانانىڭ فيلتر كابينەتتەرىنە جۇگىنۋ كەرەكتىگىن اتاپ ءوتتى.
