كوميتەت توراعاسى ۆلاديمير ۆولكوۆ وتىرىستى اشا كەلىپ, زاڭنامانى جاقسارتۋ ماسەلەلەرى ەلىمىزدىڭ ازاماتتارىنىڭ كونستيتۋتسيالىق قۇقىقتارىنا تىكەلەي قاتىستى ەكەنىن اتاپ ءوتتى.
«قىلمىستىق, قىلمىستىق ءىس جۇرگىزۋ زاڭناماسىن جەتىلدىرۋ اياسىندا جەكە ادامنىڭ قۇقىقتارىن قورعاۋدى كۇشەيتۋ تۋرالى, ەسىرتكىگە بايلانىستى, جەكە ادام مەن مەنشىككە قارسى قىلمىستار جانە باسقا دا اۋىر قىلمىستار ءۇشىن جاۋاپكەرشىلىكتى قاتاڭداتۋعا باعىتتالعان زاڭدار قابىلداندى. سونداي-اق قىلمىستىق پروتسەستەگى ءۇش بۋىندى ۇلگىنىڭ تارتىمدى تۇستارى بار», دەدى ول.
ۆلاديمير ۆولكوۆ سەناتتىڭ سوت جۇيەسىن جەتىلدىرۋ جونىندەگى جۇرگىزىپ جاتقان جۇمىسى تۋرالى كەزدەسۋگە قاتىسۋشىلارعا ايتىپ بەردى, ونىڭ قورىتىندىسى بويىنشا ءتيىستى زاڭ جوبالارى ازىرلەنەدى.
وتىرىس بارىسىندا قالا اكىمى مۇرات ايتەنوۆ ءسوز الىپ, ءوز ويلارىن ورتاعا سالدى. ول كوشپەلى وتىرىستى شىمكەنتتە وتكىزۋدىڭ ماڭىزدىلىعىن اتاپ ءوتتى جانە وتكىزىلىپ جاتقان ساراپتامالىق تالقىلاۋدىڭ جانە جاعدايدى «جەرگىلىكتى جەرلەردە» زەردەلەۋدىڭ ناتيجەلى بولاتىنىنا سەنىم ءبىلدىردى.
ەلىمىزدىڭ باس پروكۋرورىنىڭ ورىنباسارى اسەت چينداليەۆ ءوز كەزەگىندە باس پروكۋراتۋرانىڭ قىلمىستىق زاڭنامانى وڭتايلاندىرۋ جونىندە جۇرگىزگەن جۇمىسىنىڭ قورىتىندىسى مەن قىلمىستىق-پروتسەستىك جانە قىلمىستىق-اتقارۋ كودەكستەرىن ءبىر مەزگىلدە تۇزەتە وتىرىپ, قىلمىستىق زاڭنامانى وڭتايلاندىرۋ ماسەلەلەرى بويىنشا ازىرلەنگەن زاڭ جوباسى تۋرالى دەپۋتاتتارعا ايتىپ بەردى.
شارا بارىسىندا ىشكى ىستەر مينيسترلىگىنىڭ, سىبايلاس جەمقورلىققا قارسى ءىس-قيمىل اگەنتتىگىنىڭ, شىمكەنت قالاسى سوتىنىڭ قىلمىستىق ىستەر جونىندەگى سوت القاسىنىڭ وكىلدەرى دە بايانداما جاسادى.
سەناتورلار سونىمەن قاتار قالالىق ءماسليحات دەپۋتاتتارىمەن, جەرگىلىكتى پوليتسيا دەپارتامەنتىنىڭ قىزمەتكەرلەرىمەن كەزدەسۋ وتكىزدى جانە قالالىق سوتتا بولدى, مەدياتسيا ورتالىعىنىڭ قىزمەتىمەن, سونداي-اق باس بوستاندىعىنان ايىرۋ ورىندارىنداعى سوتتالعانداردى ۇستاۋ شارتتارىمەن تانىستى.
