مىسالى, مەن تىركەۋ بويىنشا الماتى وبلىسى, قاراساي اۋدانىنىڭ تۇرعىنىمىن. ءبىزدىڭ «اسىل ارمان» تۇرعىن ءۇي كەشەنىندە 20 مىڭنىڭ ۇستىندە تۇرعىن بار. بىراق قولدانىسقا بەرىلگەنىنە 7 جىلدان اسسا دا, ءالى كۇنگە اۋماققا مەكتەپ سالىنعان جوق. ونى «انە سالادى, مىنە سالادى» دەپ سوزىپ كەلە جاتقانىنا قانشا جىل بولدى. امالسىز بالالار ىرگەدەگى ىرگەلىگە, كەمەرتوعانعا, اباي اۋىلىنا بارىپ وقيدى. وسى ساپارىندا پرەزيدەنت توقاەۆ «الماتى وبلىسىندا ءۇش اۋىسىممەن وقىتاتىن مەكتەپ ماسەلەسى ءالى شەشىمىن تاپپاي كەلەدى. ايماقتا وسىنداي 52 مەكتەپ بار. نەبارى 30 مىڭ وقۋشىعا ەسەپتەلگەن مەكتەپتەردە 90 مىڭعا جۋىق بالا وقىپ جاتىر. بۇل ماسەلەنى شۇعىل شەشۋ قاجەت», دەدى. توقاەۆ ايتىپ وتىرعانداي, ايماقتا شىنىندا مەكتەپتەردە وقۋشى سانى 3 ەسە كوپ. پرەزيدەنت «جايلى مەكتەپ» ۇلتتىق جوباسىمەن وبلىستا 39 مەكتەپ سالىناتىنىن اتاپ ءوتتى. سونىڭ بىرەۋى ءبىزدىڭ «اسىل ارمانعا» سالىنسا, قۋانار ەدىك.
«اسىل ارمان» شاعىن اۋدانىنا سۇلەيمەن دەميرەل ۋنيۆەرسيتەتى جاقىن. كەزىندە وسى وقۋ ورنىن قاسكەلەڭگە كىم سالسا دا, دۇرىس ىستەپتى. ستۋدەنتتەر قالاعا قاتىناپ شارشامايدى. قالانىڭ سىرتى, ساف اۋا, وقۋعا دا بارلىق جاعداي جاسالعان. پرەزيدەنت سوزىندە مينيستر ساياسات نۇربەككە قاراتا «قۇزىرلى مينيسترلىك قوناەۆ قالاسىندا الماتىداعى جوعارى وقۋ ورىندارى مەن كوللەدجدەردىڭ بولىمشەسىن اشۋ ماسەلەسىن قاراستىرۋى كەرەك. سونداي-اق جاڭا زاماناۋي ۋنيۆەرسيتەت اشۋ ءىسىن ويلاستىرۋى قاجەت» دەپ تاپسىردى. مينيستر قوناەۆقا سدۋ سەكىلدى مىقتى ۋنيۆەرسيتەت سالىپ, قالانى عىلىم-ءبىلىم ورتالىعىنا اينالدىرا السا, ناعىز ازامات دەر ەدىك. كولدىڭ جاعاسىندا كەلىستى ۋنيۆەرسيتەت تۇرسا, كەرەمەت ەمەس پە؟!
ايتپاقشى, پرەزيدەنتتىڭ قازاق ءتىلى جايلى ايتقان ءسوزى دە دۇرىس بولدى. وتكەندە رەسەيگە بارعاندا كوتەرگەن ۇسىنىسىنا قازاق قوعامى نارازى بولىپ ەدى. ەندى بۇگىن «ەڭ الدىمەن, جاستارىمىز انا ءتىلىن – قازاق ءتىلىن ءبىلۋى كەرەك. انا ءتىلىمىز ءبىرىنشى ورىندا بولىپ, ءبارىمىز ءۇشىن نەگىزگى باسىمدىق بولۋى قاجەت. سولاي بولادى دەپ اتاپ ايتقىم كەلەدى», دەپ سەندىردى. ءبىز دە سولاي بولادى دەپ سەنگىمىز كەلەدى. سولاي بولۋى ءتيىس نارسە عوي!
سەرىكبول حاسان,
اقىن, قازاقستان جازۋشىلار وداعىنىڭ مۇشەسى
