كەگەن اۋدانىنىڭ تۇرعىندارىن قازىر جەر ماسەلەسى تولعاندىرىپ وتىر. ءتورت ت ۇلىك مالعا ارقا سۇيەگەن, ەگىن ەگىپ جەر ەمگەن اعايىنعا قاجەتى – جەر عانا. وسى ماسەلەنى اۋدان تۇرعىندارى اۋدان, وبلىس بيلىگىنىڭ الدىنا كولدەنەڭىنەن قويىپ كەلگەن ەدى. بۇگىن قوناەۆ قالاسىنداعى كەزدەسۋىندە پرەزيدەنت وبلىستاعى وسى جەر ماسەلەسىنە توقتالدى. «ايماقتا تاعى ءبىر وزەكتى ماسەلە بار. بۇل – تۇرعىنداردىڭ مالىن جاياتىن جەردىڭ تاپشىلىعى. بيىل وبلىستا بوس جاتقان 300 مىڭ گەكتار جەر انىقتالعان. ونىڭ باسىم بولىگى – جايىلىم. جەر يەلەرى 100 مىڭ گەكتار جەردى ءوز ەركىمەن مەملەكەت مەنشىگىنە قايتاردى. ونىڭ 50 مىڭ گەكتارى قازىردىڭ وزىندە حالىقتىڭ يگىلىگىنە بەرىلدى», دەدى قاسىم-جومارت توقاەۆ. وسى يگىلىككە كەگەن اۋدانىنداعى شارۋالاردىڭ دا قولى جەتتى.
سونداي-اق مەملەكەت باسشىسى قاسىم-جومارت توقاەۆ ءوڭىردىڭ تۋريستىك الەۋەتى زور ەكەنىن ايتتى. وسىعان وراي ءبىزدىڭ اۋدانىمىزدىڭ تۋريستىك الەۋەتى تۋرالى ماقتانىشپەن ايتۋعا بولادى. كەگەن اۋدانى وبلىسىمىزداعى ءتۋريزمنىڭ ءبىر وتانى عوي. بيىل كورىكتى كولسايعا دەيىنگى رەسپۋبليكالىق ماڭىزى بار جول اسفالتتالىپ, جاسالعالى وڭىرگە كەلۋشىلەردىڭ سانى ەكى ەسەلەپ ارتتى. اۋداندا 3 قوناقۇي, 61 قوناقتاردى قابىلدايتىن ۇيلەر بار. ۇستىمىزدەگى جىلدىڭ 8 ايىندا 175 778 تۋريست كەلىپ, اۋداننىڭ بيۋدجەتىنە 54 809 مىڭ تەڭگە سالىق قۇيىلدى. اۋدان مەملەكەتتىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىنىڭ باسىم اۋماقتارىنىڭ وندىعىنا كىرەتىن الماتى تاۋ كلاستەرىنە ەنگىزىلگەن. ەكولوگيالىق تۋريزم اۋداننىڭ نەگىزگى تۋريستىك ءونىمى بولىپ تابىلادى. ونىڭ دامۋى اۋدان اۋماعىندا ورنالاسقان «كولساي كولدەرى» ۇلتتىق تابيعي مەملەكەتتىك پاركىنىڭ الەۋەتىنە نەگىزدەلگەن. وتكەن جىلى «كولساي گراند» جانە «كولساي نوماد» قوناقۇيلەرى پايدالانۋعا بەرىلىپ, 143 ميلليون تەڭگەنىڭ ينۆەستيتسياسى تارتىلدى.
الداعى ۋاقىتتا قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار مينيسترلىگىمەن بىرلەسىپ, «كولساي كولدەرى» پاركىنىڭ اۋماعىندا ەكولوگيالىق ءتۋريزمدى دامىتۋ ءۇشىن ۇلتتىق پارككە 5 ميلليارد تەڭگەگە ينۆەستيتسيالىق جوبالاردى ىسكە اسىرۋ جوسپارلانىپ وتىر. ۇلتتىق پارك اۋماعىنا جول جانە ينجەنەرلىك ينفراقۇرىلىم جۇرگىزۋ ماقساتىندا بيىل 2,1 ميلليارد تەڭگە ءبولىندى. وسىلايشا 19 شاقىرىم جول جوندەۋدەن وتكىزىلىپ, 17,2 شاقىرىم ەلەكتر جەلىلەرى قايتا جاڭعىرتىلادى. بۇل ءوز كەزەگىندە ءتۋريزمنىڭ, شاعىن جانە ورتا بيزنەستىڭ دامۋىنا جارقىن جول اشادى.
قانات ءبىرجانسال,
اقىن, جۋرناليست,
قازاقستان جازۋشىلار جانە جۋرناليستەر وداعىنىڭ مۇشەسى
الماتى وبلىسى
