كەزدەسۋگە 20-عا جۋىق ادام قاتىستى. ءىس-شارا بارىسىندا پاتسيەنتتەر پاركينسون اۋرۋىن ەمدەۋ جانە وڭالتۋ تۋرالى اقپاراتپەن, تۇرمىس, تاماقتانۋ, ديەتانى ۇيىمداستىرۋ ماسەلەلەرىمەن جانە باسقا دا ماڭىزدى ۇسىنىستارمەن تانىستى.
«پاركينسون مەكتەبى پاتسيەنتتەرىمىزدىڭ ءوتىنىشى بويىنشا ۇيىمداستىرىلدى. ءبىزدىڭ مىندەتىمىز – پاتسيەنتتەر مەن وتباسى مۇشەلەرىن ەمنىڭ قىر-سىرىمەن تانىستىرۋ. ماماندار ولارعا ءدارى-دارمەكتەردىڭ اسەرى تۋرالى, ونى قابىلداۋ ەرەكشەلىكتەرى تۋرالى اقپارات بەرە وتىرىپ, سالاماتتى ءومىر سالتى نەگىزدەرىنە, اسقىنۋ, ءورشۋدىڭ الدىن الۋعا ۇيرەتەدى», دەيدى ءپىب مەديتسينالىق ورتالىعى اۋرۋحاناسىنىڭ نەۆرولوگ-پاركينسونولوگى راۋشان تاۋتانوۆا.
پاركينسون مەكتەبىن ۇيىمداستىرۋ – پاركينسون اۋرۋى بار ءار پاتسيەنتتىڭ ءومىر ساپاسىن جاقسارتا تۇسۋگە ءبىر قادام. بۇل نەۆرولوگ, نەيروحيرۋرگ, رەابيليتولوگ, لوگوپەد جانە باسقا دا ماماندار بىرلەسكەن ۇلكەن كوماندانىڭ جۇمىسى. وسىنداي مەكتەپتەر كوپتەگەن ەلدە بار جانە ولاردىڭ كلينيكالىق جانە پسيحولوگيالىق تۇرعىدان جاقسى كومەگى تيەدى.
«مەديتسينالىق ورتالىق اۋرۋحاناسى ءاردايىم وسىنداي ءىس-شارالاردى قولدايدى جانە بىزدە پاركينسون اۋرۋى بار پاتسيەنتتەرگە كومەك كورسەتۋ ءۇشىن رەسۋرس جەتكىلىكتى. ءبىز پاتسيەنتتەرگە عىلىمي دۇرىس نەگىزدەلگەن اقپارات بەرەمىز. وسىلايشا, ولاردىڭ كۇماندى ەكسپەريمەنتتەرگە, قالاي دا ەمدەلۋ ماقساتىندا قاتەلىكتەرگە بوي الدىرماۋعا شاقىرامىز», دەدى نەۆرولوگ-پاركينسونولوگ راۋشان تاۋتانوۆا.
ۇيىمداستىرۋشىلار پاركينسون مەكتەبىنىڭ جۇمىسىن تۇراقتى ءىس-شاراعا اينالدىرۋدى جوسپارلاپ وتىر. ءپىب مەديتسينالىق ورتالىعى اۋرۋحاناسىنىڭ نەۆرولوگتەرى جىل سايىن 100-گە جۋىق ادامعا قوزعالىس بۇزىلىستارى بويىنشا كونسۋلتاتسيا بەرىپ ەمدەيدى. ولاردىڭ كەيبىرى وپەراتسيالىق ەم الىپ جاتىر.
پاركينسون اۋرۋى – ميدىڭ جۇيكەلىك جاسۋشالارىنىڭ بىرتىندەپ سەمۋى سالدارىنان پايدا بولاتىن اۋرۋ. مۇندايدا ادامدا دىرىلدەۋ, جالپى قيمىلدىڭ ناشارلاۋى, قيمىل-قوزعالىستىڭ قيىنداۋى, ۇيلەسىمسىزدىگى, تەپە-تەڭدىكتىڭ بۇزىلۋى بايقالادى.
