ورتالىق سايلاۋ كوميسسياسىنىڭ توراعاسى نۇرلان ءابدىروۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن بايقاۋ جونىندەگى ەقىۇ/دياقب ميسسياسىنىڭ باسشىسى ۋرشۋلا گاتسەكپەن كەزدەسىپ, اتالعان ۇيىمنىڭ كەزەكتەن تىس سايلاۋدى باقىلاۋ ءۇشىن 30 ۇزاق مەرزىمدى جانە 300 قىسقا مەرزىمدى بايقاۋشىلاردان تۇراتىن دەلەگاتسيانى جىبەرۋ تۋرالى شەشىم قابىلداعانى ءۇشىن العىسىن ءبىلدىردى.
ن.ءابدىروۆ ميسسيا مۇشەلەرىن سايلاۋ ناۋقانىنىڭ نەگىزگى كەزەڭدەرىنىڭ ەرەكشەلىكتەرىمەن جانە ۇزاقتىعىمەن, پرەزيدەنتتىككە كانديداتتاردى ۇسىنۋ قورىتىندىلارمەن تانىستىردى, سونداي-اق قازىرگى ۋاقىتتا پرەزيدەنتتىككە كانديداتتاردى تىركەۋ كەزەڭى اياقتالىپ جاتقانىن اتاپ ءوتتى. ول سايلاۋ ۇدەرىسىنە قاتىسۋشىلاردى وقىتۋ جانە مۇگەدەكتىگى بار ازاماتتاردىڭ سايلاۋ قۇقىعىن قامتاماسىز ەتۋ ماسەلەسىنە ءداستۇرلى تۇردە كوپ كوڭىل بولىنەتىنىن ايتتى. ساياسي پارتيالار, جاستار, باق جانە ۇەۇ وكىلدەرى ءۇشىن سەمينارلار وتكىزىلىپ جاتقانىن جەتكىزدى. سونىمەن قاتار جاستاردىڭ نازارىن سايلاۋ ۇدەرىسىنىڭ وزەكتى ماسەلەلەرىنە اۋدارۋ, ولاردىڭ سايلاۋ بەلسەندىلىگى مەن قۇقىقتىق مادەنيەتىن ارتتىرۋ ماقساتىندا ورتالىق سايلاۋ كوميسسياسى جانىنان «جاس سايلاۋشىلار كلۋبى» قۇرىلعانىن اتاپ ءوتتى. ساراپشى كەڭەستىڭ قۇرامى جاڭارتىلىپ, ونىڭ ماقساتى سايلاۋ جۇيەسىن دامىتۋ جونىندە ۇسىنىستار ازىرلەۋ بولىپ تابىلاتىنىن جەتكىزدى.
كەزدەسۋ بارىسىندا نۇرلان ءابدىروۆ ميسسيا مۇشەلەرىن ورتالىق سايلاۋ كوميسسياسىنىڭ وتىرىستارى مەن وقىتۋ ءىس-شارالارىنا قاتىسۋعا شاقىردى, سونداي-اق ميسسيا وكىلدەرىنىڭ ورتالىق سايلاۋ كوميسسياسىنىڭ مۇشەلەرىمەن جانە اپپاراتىمەن ميسسيانى قىزىقتىراتىن كەز كەلگەن ماسەلەلەر بويىنشا كەزدەسۋلەرىن وتكىزۋگە دايىن ەكەنىن ءبىلدىردى.
كەزدەسۋ اياسىندا ەقىۇ/دياقب ميسسياسىنىڭ مۇشەلەرى ورتالىق سايلاۋ كوميسسياسىنىڭ مۇشەلەرىنە ءوز سۇراقتارىن قويدى.
«ورتالىق سايلاۋ كوميسسياسى سايلاۋ ناۋقانىن زاڭناماعا سايكەس قاتاڭ جۇرگىزۋدى قامتاماسىز ەتەدى جانە ادال جانە ءادىل باسەكەلەستىك ءۇشىن بارلىق جاعداي جاسايدى. ءبىز بيۋرومەن, ونىڭ ىشىندە سايلاۋ ناۋقاندارى اراسىنداعى تىعىز ىنتىماقتاستىق پەن سىندارلى ديالوگتى جالعاستىرۋعا ۇلكەن ءمان بەرەمىز», دەپ ن.ءابدىروۆ.
