سىن ساعاتتا ءمۇدىرىپ قالماي شۇعىل ارەكەت ەتە بىلگەن جاننىڭ ءبىرى – توقتامىس اۋىلدىق وكرۋگىنىڭ تۇرعىنى ەربول راحين. دالا ءورتىن سوندىرۋدە اباي اۋدانىنىڭ ازاماتى قايتپاس قايسارلىعىمەن تانىلدى.
اباي وبلىسىنىڭ اكىمى نۇرلان ۇرانحاەۆ دالا ءورتىن سوندىرۋدە كورسەتكەن ەرلىگى ءۇشىن ەربول راحينگە «ەرلىگى ءۇشىن» مەدالىن تاپسىردى. «تۇتقيىلدان كەلگەن اپاتقا تايسالماي قارسى تۇرىپ, سىن ساعاتتا ەرەن ەرلىك جاسايتىن ەربول سىندى ازاماتتار باردا قانداي دا بولسىن قاتەرگە توتەپ بەرەتىنىمىزگە سەنىمدىمىز. سوندىقتان ءسىزدىڭ ەرلىگىڭىز بەن وتانشىلدىق ۇستانىمىڭىزعا مىڭ العىس», دەدى ن.ۇرانحاەۆ.
بيىل قىركۇيەك ايىندا اباي اۋدانىنىڭ توقتامىس اۋىلدىق وكرۋگىنىڭ القاپتارىندا دالا ءورتى بولىپ, مىڭ گەكتارعا جۋىق اۋماقتى جالىن شارپىعان ەدى. ءورتتى سوندىرۋگە 168 ادام مەن 27 تەحنيكا جۇمىلدىرىلدى. ءتىلسىز جاۋمەن كۇرەستە توقتامىس اۋىلىنىڭ تۇرعىندارى دا بەلسەندى اتسالىسقان-دى.
ەربول راحين ورتپەن ارپالىسىپ جۇرگەن كەزدە لاۋلاعان وت جان-جاعىن شارپىپ, جالىننىڭ ورتاسىندا قالىپ قويادى. جىلدام ارەكەت ەتۋ ارقىلى ول توتەنشە وقيعا ورنىنان امان شىعادى. الايدا ونىڭ ەكى قولى مەن تىزەسىن كۇيىك شالعان ەدى.
اباي وبلىسى
