ۆەدومستۆو اتاپ وتكەندەي, ەسكيزدىك جوبانىڭ اۆتورى - تالدىقورعان قورعانىس ىستەرى باسقارماسى باستىعىنىڭ اسكەري-پاتريوتتىق جۇمىس جانە قارۋلى كۇشتەر ارداگەرلەرىمەن جۇمىس جونىندەگى كومەكشىسى, ۆيتسە-پرەزيدەنت, سۋرەتشىلەر وداعىنىڭ مۇشەسى, ونەر اكادەمياسىنىڭ كوررەسپوندەنت-مۇشەسى ەسەت داۋرەنباەۆ.
«جەتىسۋ وبلىسىنىڭ زاماناۋي, ەرەكشە, وڭاي تانىلاتىن وڭىرلىك گەربى كونكۋرس ناتيجەسىندە ىرىكتەلىنىپ, انىقتالدى. بايقاۋعا سۋرەتشىلەر, فوتوگرافتار, ديزاينەرلەر, ارحيتەكتورلار جانە قالا تۇرعىندارى دا قاتىستى. جالپى 17 ۇمىتكەردەن 55 ەسكيز ءتۇستى», دەلىنگەن اكىمدىك حابارلاماسىندا.
جەتىسۋ وبلىسىنىڭ قوعامدىق دامۋ باسقارماسىنىڭ مالىمەتىنشە, ەسەت جەڭىس ۇلىنىڭ ەسكيزدىك جوباسى كونكۋرستىق كوميسسيا مۇشەلەرىنىڭ شەشىمىمەن ءبىراۋىزدان تاڭدالدى. ولكەنىڭ تاريحي-مادەني جانە گەوگرافيالىق ەرەكشەلىكتەرىن كورسەتۋ, جوعارى كوركەمدىك دەڭگەيى, بىرەگەي ديزاين شەشىمى, تۇستەردىڭ ۇيلەسىمدىلىگى جانە گەرالديكا تالاپتارىن ساقتاۋ باعالاندى.
«جەتىسۋ وبلىسىنىڭ گەربى شەڭبەر ىشىندە ورنالاسقان, مەملەكەتتىك تۋدىڭ كوك جانە التىن تۇسىنە نەگىزدەلىپ قۇرىلدى. نەگiزگى نىشانداردىڭ ءبىرى – شاڭىراق, جەتىسۋ جەرىنىڭ اسقارلى, بيىك تاۋلارى, تالدىقورعان قالاسىنىڭ سيمۆولى «جەتىسۋ مونۋمەنتى», ۇلى جىبەك جولىنىڭ نىشانى – كەرۋەن كوشى, جەتى وزەن, بالقاش, الاكول كولدەرىنىڭ ايدىنى بەينەلەنگەن», دەپ قوستى ۆەدومستۆو.
ءوڭىردىڭ جاڭا نىشانى مادەنيەت جانە سپورت مينيسترلىگىنىڭ مەملەكەتتىك رامىزدەر مەن گەرالديكالىق بەلگىلەر ماسەلەلەرى جونىندەگى ساراپتامالىق كەڭەستە وڭ ساراپتاما قورىتىندىسىن الدى.
