دوپينگ داۋىنا بايلانىستى الەمدىك ارەنادا بەدەلىن جوعالتىپ العان قازاقستان قۇراماسىنىڭ اۋىر اتلەتتەرى بىرتە-بىرتە ەڭسە تىكتەپ كەلەدى. ماسەلەن, بىلتىر وزبەكستاندا وتكەن ازيا چەمپيوناتىندا 1 التىن, 3 كۇمىس جانە 3 قولا مەدال جەڭىپ العان قازاقستان قۇراماسىنىڭ سپورتشىلارى مانامادا 3 التىن, 2 كۇمىس, 3 قولاعا قول جەتكىزىپ, جالپىكوماندالىق ەسەپتە ەكىنشى ورىنعا يە بولدى.
بيىلعى دودادا ەرلەر اراسىندا باق سىناعان جاس دارىندى اۋىر اتلەت اسىلجان بەكتاي (89 كگ), توكيو وليمپياداسىنىڭ قولا جۇلدەگەرى ءزۇلفيا چينشانلو (55 كگ) مەن جاستار اراسىنداعى 2017 جىلعى ازيا بىرىنشىلىگىنىڭ كۇمىس جۇلدەگەرى ايزادا ءمۇپتىلدا (سۋرەتتە) ەرەكشە ونەرىمەن دارالانىپ, التىننان القا تاقتى. سونداي-اق ءزۇلفيا چينشانلو بيىلعى ازيا چەمپيوناتىنىڭ ۇزدىك سپورتشىسى دەگەن اتاققا يە بولدى.
تالاي ءدۇبىرلى دودادا ەل قورجىنىنا جۇلدە سالىپ جۇرگەن ءزۇلفيا چينشانلو بيىل سپورتتىق كارەراسىندا تۇڭعىش رەت ازيا چەمپيوناتىندا جەڭىس تۇعىرىنان كورىندى. بۇعان دەيىن ازيا ويىندارىندا ەكى رەت كۇمىس جۇلدەگە يە بولعان قازاقستاندىق زىلتەمىرشى مانامادا 220 كيلونى ىرقىنا كوندىرىپ, باس جۇلدەنى ولجالادى. توكيو وليمپياداسىندا 226 (95+125) كيلومەن ءۇشىنشى ورىنعا تابان تىرەگەن جەرلەسىمىزگە قۇرلىق دوداسىندا چەمپيون اتانۋعا 220 كيلونىڭ ءوزى جەتكىلىكتى بولدى. ءزۇلفيادان باقانداي 10 كيلوعا قالىپ قويعان قىتايلىق يۋ لينگلونگ (210 كگ) ەكىنشى ورىنعا تابان تىرەسە, قولانى وزبەكستاندىق نيگورا ابدۋلاەۆا (193 كگ) جەڭىپ الدى.
ەرەسەكتەر اراسىنداعى دوداعا العاش رەت قاتىسقان 22 جاستاعى قىزىلوردالىق اسىلجان بەكتاي 89 كيلودا ازيانىڭ ۇزدىگى اتاندى. 2017 جىلى بانگكوكتە (تايلاند) وتكەن 17 جاسقا دەيىنگى جاسوسپىرىمدەر اراسىنداعى الەم چەمپيوناتىنىڭ قولا جۇلدەسىنە يە بولعان جەرلەسىمىز بيىل ەرەسەكتەر اراسىنداعى العاشقى ءىرى جەتىستىگىنە قول جەتكىزدى. جەرلەسىمىز جالپى ەسەپتە 362 (165+197) كيلونى ەڭسەرىپ, ەل قۇراماسىنىڭ قورجىنىنا ەكىنشى التىندى سالدى. بۇل سالماقتاعى ازيا چەمپيوناتىنىڭ كۇمىس جۇلدەسىن اسىلجاننان ءبىر كيلو قالىپ قويعان قىرعىز سپورتشىسى ەميل مولدودوسوۆ (361 كگ) موينىنا ىلسە, قولا مەدال يراندىق ماسۋد شاترايگە بۇيىردى (358 كگ).
جارىستىڭ العاشقى كۇنىندە التىن الىپ, چەمپيوناتتى ءساتتى باستاپ بەرگەن چينشانلونىڭ جەڭىستى جولىن ايزادا ءمۇپتىلدا باس جۇلدەمەن تۇيىندەدى. ايەلدەر اراسىندا 87 كيلودان جوعارى سالماقتا باق سىناعان ايزادا ەكى باعدارلامادا 277 كيلونى ەڭسەرىپ, ءوز سالماعىندا ازيانىڭ الدى بولدى. سونداي-اق وسى سالماق دارەجەسىندە ونەر كورسەتكەن تاعى ءبىر جەرلەسىمىز ليۋبوۆ كوۆالچۋك قولا جۇلدەگە قول جەتكىزدى (266 كگ).
وكىنىشكە قاراي, وسىدان ءبىر جىل بۇرىن عانا تاشكەنتتەگى تولاعايلار باسەكەسىندە توپ جارعان چونتەي بۇل جولى كۇمىستى قاناعات تۇتتى. توكيو وليمپياداسىنىڭ قولا جۇلدەگەرى باحرەيندەگى دودانىڭ قوسسايىس باعدارماسىندا 260 كيلو (116+144) زىلتەمىردى باسىنان اسىرا كوتەرىپ, ەكىنشى ورىنعا تابان تىرەدى. جەرلەسىمىز باس جۇلدەنى جەڭىپ العان ۆەتنامدىق لا تحان دجيادان نەبارى ەكى كيلوعا (262 كگ) قالىپ قويدى. قولا جۇلدە ساۋد ارابياسىنىڭ وكىلى مانسۇر ءال-سالەمگە (259 كگ) بۇيىردى.
قىزدار اراسىندا 76 كيلوعا دەيىنگى باسەكەدە سىنعا تۇسكەن اراي نۇرلىبەكوۆا التىن جۇلدەگە سىنىق سۇيەم قالعاندا ءسۇرىنىپ, ازيا چەمپيوناتىندا كۇمىسپەن كۇپتەلدى. ول قوسسايىستا 221 (97+124) كيلونى ىرقىنا باعىندىرىپ, ەكىنشى ورىنعا يە بولادى. التىن مەدالدى 243 كيلو زىلتەمىردى كوتەرگەن قىتايلىق كۋيتين پەن جەڭىپ السا, قولا جۇلدە تايلاندتىق دۋانگكامون كحونگتونگتىڭ (221 كگ) ەنشىسىندە كەتتى.
سونىمەن قاتار باحرەيندەگى اۋىر اتلەتتەردىڭ باستى جارىسىندا 2017 جىلعى جاسوسپىرىمدەر اراسىنداعى الەم چەمپيونى, 2019 جىلعى جاستار اراسىنداعى الەم بىرىنشىلىگىنىڭ قولا جۇلدەگەرى ارتەم انتروپوۆ پەن ايشا وماروۆا ازيا چەمپيوناتىنىڭ قولا جۇلدەگەرلەرى اتاندى. 96 كيلودا باق سىناعان انتروپوۆ قوسسايىستا 337 كيلو ەڭسەرسە, قىزدار باسەكەسىندە 81 كيلوعا دەيىنگى سالماقتا سىنعا تۇسكەن وماروۆا 217 كيلومەن ۇزدىك ۇشتىكتەن تابىلدى.
جالپىكوماندالىق ەسەپتە قىتاي زىلتەمىرشىلەرى 8 جۇلدەمەن (6 التىن, 2 كۇمىس) توپ جارسا, قازاقستان قۇراماسى ەكىنشى ورىنعا يە بولدى. ال ۇزدىك ۇشتىكتى ۆەتنام (3 التىن, 2 كۇمىس) سپورتشىلارى تۇيىندەدى.
