جاقىندا كلۋب جەتەكشىسى باقىتجان پەرىمبەت وڭىرلىك كوممۋنيكاتسيالار قىزمەتىنىڭ ءباسپاسوز ورتالىعىندا جاس پاتريوتتاردى تاربيەلەۋدىڭ قىر-سىرىمەن ءبولىستى. ونىڭ ايتۋىنشا, اسكەري كلۋبتارعا بالالار تەگىن قاتىسا الادى. اسكەري-پاتريوتتىق كلۋبتا 150-دەن استام تاربيەلەنۋشى بولسا, ونىڭ كوپشىلىگى تولىق ەمەس وتباسىنان شىققان, قاتاردا جەتىم بالالار دا بار.
كلۋب 2014 جىلدان بەرى جۇمىس ىستەپ كەلەدى. تەڭىز دەڭگەيىنەن 4 مىڭ مەتر بيىكتىكتەگى شىڭداردى باعىندىرىپ, اسكەري دايىندىقتى «جاس سارباز» شاتىرلى لاگەرى اياسىندا جۇزەگە اسىرىپ وتىرعان كلۋب مۇشەلەرى قىراعى كۇزەتكە قاي كەزدە دە دايىن بولۋ كەرەكتىگىن ايتادى.
كلۋبتا دەسانتشىلار, جاس شەكاراشىلار, تەڭىزشىلەر جاساعى بار. ۇيىرمەگە 7-18 جاس ارالىعىنداعى بالالار قابىلدانادى.
جاس ساربازدار جەتەكشىسىنىڭ ايتۋىنشا, تۇلەكتەردىڭ 20 پايىزى 9-سىنىپتان كەيىن «ارىستان», ب.مومىش ۇلى اتىنداعى «جاس ۇلان» مەكتەبىنە, ال 11-سىنىپتان كەيىن ۇقك شەكارا اكادەمياسىنا نەمەسە اسكەري بايلانىس ينستيتۋتىنا نەمەسە قۇرلىق اسكەرلەرىنىڭ اسكەري ينستيتۋتىنا تۇسەدى. بيىل بولاشاعىن ەلىمىزدىڭ قارۋلى كۇشتەرىمەن بايلانىستىرعىسى كەلەتىن 25 تۇلەك دايىندىعىن اياقتاۋعا جاقىن.
«كيروۆ» اسكەري-پاتريوتتىق كلۋبىندا تاۋ ءتۋريزمى مەن الپينيزم سەكتسيالارى جۇمىس ىستەيدى. جاس پاتريوتتار قازاقستان مەن قىرعىزستان شەكاراسىنداعى شىڭداردى باتىرلاردىڭ ەسىمىمەن اتاۋدى ماقسات ەتكەن. مىسالى, وتكەن جىلى جاس ساربازدار وزدەرى باعىندىرعان شىڭدى ءاليا مولداعۇلوۆانىڭ ەسىمىمەن اتاسا, كەلەسى ءبىر شىڭعا قارا مايور بوريس كەرىمباەۆتىڭ ەسىمى بەرىلدى. بۇل تىزىمدە قاسىم قايسەنوۆ اتىنداعى شىڭ دا بار. بيىل جاس ساربازدار 4 مىڭ مەتردەن اساتىن شىڭعا شىعىپ, وعان راقىمجان قوشقارباەۆ پەن گريگوري بۋلاتوۆ ەسىمىن بەردى. سونىمەن قاتار بۇل تىزىمدە «قازاقستان رەسپۋبليكاسى قارۋلى كۇشتەرىنە – 30 جىل» دەگەن شىڭ دا بار. بۇگىندە جاس ساربازدار اسكەري قىزمەت سالاسى ارداگەرلەرىنەن العان العاشقى مەدالدارىن ماقتان ەتەدى.
«جاس ساربازداردىڭ دەنە تاربيەسىندە تاۋ ءتۋريزمىنىڭ ءرولى زور. «شىعىس» شەكارا قىزمەتى مەن ۇلتتىق قاۋىپسىزدىك كوميتەتىنىڭ شەكارا اكادەمياسىمەن جاسالعان مەموراندۋم اياسىندا ۇلكەن الماتى كولى ماڭىنداعى وزەرنوە شەكارا زاستاۆاسىندا اكادەميانىڭ وقىتۋشىلارى جازعى دەمالىستا جاس ساربازداردى تاۋ دايىندىعىنان وتكىزىپ, قاۋىپتى ايماقتاردى ەڭسەرۋگە, راديوبايلانىس, زارداپ شەككەندەردى باعدارلاۋ جانە ەۆاكۋاتسيالاۋدى ۇيرەتەدى. جاس ساربازدار, سونىمەن بىرگە قۇتقارۋ قىزمەتىنىڭ جاتتىعۋلارىنا دا ماشىقتانۋدا. تاۋدا سەرۋەنگە شىققاندار ىشىندە قيىن جاعدايعا تاپ بولاتىندار كوپ كەزدەسەدى», دەيدى كلۋب جەتەكشىسى.
ادەتتە, جاس ساربازدار ءۇشىن تاۋ ەكسپەديتسيالارى جەتى كۇنگە سوزىلادى. بالالاردىڭ اراسىندا 9 جاستاعى مەكتەپ وقۋشىلارى دا بار. ولار تۋعان جەردىڭ تاۋ-تاسىمەن تانىسىپ قانا قويماي, كوپتەگەن قيىندىقتى ەڭسەرۋگە ماشىقتانادى. سونىمەن قاتار تۋعان ەلىنە دەگەن سۇيىسپەنشىلىگى ارتادى. «سوندىقتان 5-11 سىنىپتار اراسىندا «جاس ساربازدىڭ» اسكەري-پاتريوتتىق ساباقتارىن بارلىق ءبىلىم مەكەمەسىندە ۇيىمداستىرۋ قاجەت. اسكەري-پاتريوتتىق تاربيە ساباعىن دا ءجيى وتكىزگەن ابزال. جاپون ەلىندە جوعارى ناتيجەسىن بەرىپ وتىرعان مۇنداي داعدىنى ەلىمىزدەگى جاستار مەن جاسوسپىرىمدەر اراسىندا ناسيحاتتاۋ ماڭىزدى», دەيدى كلۋب جەتەكشىسى.
جاس ساربازدار ءوز كەزەگىندە اسكەري-پاتريوتتىق كلۋبتاعى جاتتىعۋ تارتىپتەرىمەن تانىستىرىپ, دومبىرادا قازاقتىڭ كۇيى مەن «كاتيۋشا» كومپوزيتسياسىن ورىندادى.
الماتى
