قر پرەزيدەنتىنىڭ ءىس باسقارۋشىسى ايبەك دادەباەۆ وسى كۇنگە وراي «بۋراباي» ۇلتتىق پاركىنىڭ ۇجىمىن قۇتتىقتادى.
– حالقىمىزدا «اتادان مال قالعانشا – تال قالسىن» دەگەن دانالىق ءسوز بار. ورمان – ءبىزدىڭ باعا جەتپەس بايلىعىمىز, حالقىمىزدىڭ ەن داۋلەتى. پرەزيدەنت قاسىم-جومارت توقاەۆتىڭ ءوزى تال ەگۋ, ورماندى القاپتاردى ۇلعايتۋ ىسىنە تىكەلەي نازار اۋدارىپ وتىر. بۇل ورايدا, «بۋراباي» ۇلتتىق ساياباعىندا ەڭبەك ەتەتىن 500-دەن استام بىلىكتى دە جاۋاپتى ماماندار اسا ماڭىزدى جۇمىستى ادال اتقارىپ جۇرگەنى ءسوزسىز.
سىزدەر قىستىڭ قاقاعان ايازى مەن بۇرقاعان بورانىندا, جازدىڭ اپتاپ ىستىعىندا تابيعاتتىڭ وسىناۋ كەرەمەت سىيىن كوزدىڭ قاراشىعىنداي قورعايسىزدار. 129 مىڭ گەكتاردان استام القاپتى تابيعي جانە ادام قولىمەن جاسالاتىن اپاتتاردان امان ساقتاۋ وڭاي شارۋا ەمەس, – دەپ جازدى ول ءوزىنىڭ تەلەگرام ارناسىندا.
ا.دادەباەۆ ورمانشىلاردىڭ Smart Burabay جۇيەسىن ءتيىمدى پايدالانىپ, ورمان ءورتىنىڭ تارالۋىنا جول بەرمەگەنىن, سونىڭ ارقاسىندا كەيىنگى ەكى جىلدا ورتەنگەن جەردىڭ كولەمى 13 ەسە تومەندەگەنىن ەرەكشە اتاپ ءوتتى. سونداي-اق ەلىمىزدە ورمان القاپتارىن كەڭەيتۋگە «بۋراباي» قىزمەتكەرلەرىنىڭ قوماقتى ۇلەس قوسىپ جاتقانىنا توقتالدى. ونىڭ ايتۋىنشا, بىلتىر ۇلتتىق پاركتە 66 گەكتارعا 500 مىڭ تۇپتەن ارتىق اعاش ەگىلسە, بيىل تاعى 550 مىڭنان استام قاراعاي مەن قايىڭ كوشەتى وتىرعىزىلعان.
قۇتتىقتاۋدا ايتىلعانداي, بۇگىندە ىنتىماعى جاراسقان تاتۋ ۇجىمدا ورمانشىلىقتى اتاكاسىپكە اينالدىرعان ابدراحمانوۆتار, ابىلدينوۆتەر, دوروگوۆتار, كراسنوۋسوۆتار, ماحمەتوۆتەر, وماروۆتار, راحماتۋليندەر سىندى ەڭبەككەر اۋلەتتەر بار. سانالى عۇمىرىن وسى سالاعا ارناپ جۇرگەن قابدراشيت ماحمەتوۆ, الەكساندر ماكارەنكو, ۆلاديمير كانتسەۆ جانە باسقا دا ارداگەرلەردىڭ ەڭبەگى ءبىر توبە.
– سۇلۋ كوكشەنىڭ جايقالعان جەلەگىن, جان-جانۋارلارىن حالىق يگىلىگىنە جاراتۋ جولىندا اتقارىپ جۇرگەن ەرەن ەڭبەكتەرىڭىز ءۇشىن وزدەرىڭىزگە شىن كوڭىلدەن ريزاشىلىعىمدى بىلدىرەمىن, – دەلىنگەن قۇتتىقتاۋدا.
ايتا كەتەيىك, «بۋراباي» ۇلتتىق تابيعي پاركى رەسپۋبليكالىق ماڭىزى بار ەرەكشە قورعالاتىن تابيعي ايماق جۇيەسىنە كىرەتىن مەملەكەتتىك تابيعات قورعاۋ مەكەمەسى. ول قر پرەزيدەنتى ءىس باسقارماسىنا قارايدى.
