ءوزىمىز قونعان ءۇيدىڭ اۋلاسىنا شىعا بەرە جاڭاعى بايلامىمىزدىڭ اسىعىس جاسالعاندىعىن ۇقتىق. بۇرىنعى مەن بۇگىنگى اقباستىنىڭ اراسىندا ايتارلىقتاي ايىرماشىلىق بار ەكەن. اۋەلگى جاڭالىق – ۇيالى بايلانىس بۇل اۋىلعا دا جەتىپتى. بۇرىن قۇم اراسىنداعى الاقانداي اقباستىعا جولى تۇسكەندەر بايلانىسى بار جەرگە جەتكەنشە قالتاسىنداعى تەلەفونىن ۇمىتا تۇراتىن. قازىر ونداي ەمەس, قالاعان جەرىڭمەن حابارلاسا بەرەسىڭ.
قالالىقتارعا بۇل اسا ءبىر تاڭسىق جاڭالىق بولماۋى مۇمكىن. ال قىزىلوردادان 750, اۋدان ورتالىعى ارالدان 250 شاقىرىم جەردە جاتقان اقباستىلىقتار ءۇشىن ۇلكەن وزگەرىس.
اۋىلداعى تاعى ءبىر جاڭالىق – ەلدى مەكەنگە اۋىز سۋ تارتىلا باستاپتى. اياداي عانا اۋىلداعى جالعىز كوشەنى بويلاي قازىپ, قۇبىر تاستاپ بارادى. ىرگەسى قالانعان 60 جىلدان بەرى سۋدى سىرتتان تاسىپ, شەگەن قۇدىققا قۇيىپ ءىشىپ وتىرعان اقباستى جۇرتى ءۇشىن بۇل الاقايلايتىن قۋانىش, الداعى كۇنگە امان جەتكىزەر دەگەن ءۇمىت ساۋلەسى.
نەبىر الاعاي, بۇلاعايدى باستان كەشسە دە تۋعان توپىراعىنان تابان اجىراتپاي وتىرعان جۇرت تا, ولاردىڭ ماڭداي تەر, تابان اقىسىمەن جيعان اق ادال مالى دا بىلتىرعى قۋاڭشىلىقتان قينالىپ شىقتى. ارال تارتىلعالى بەرگى تورىعۋدى كىشى تەڭىزدىڭ ايدىنى ۇمىتتىرعان جۇرتتىڭ ءبىرازى بىلتىردان بەرى وزگە وڭىرلەردەن قونىس ىزدەي باستاپتى. باستاعان قۇرىلىسىن توقتاتىپ, «الدەقالاي كۇن بولادى» دەپ ەكىۇداي كۇي كەشىپ وتىرعاندار دا جوق ەمەس. وسىنىڭ بارىنە قاراماستان, اياداي اۋىلدا تىرشىلىكتىڭ قازانى بۇلك-بۇلك قايناپ جاتىر.
تاڭعى تىنىشتىقتى دىرىلداعان موتوتسيكل داۋسى بۇزدى. جالپى, اۋىلدا كولىكتىڭ وسى ءتۇرى وتە كوپ. جولسىزدا جاي كولىكپەن 250 شاقىرىمداعى اۋدان ورتالىعىنا جەتۋ ءۇشىن 4-5 ساعات قينالساڭىز, موتوتسيكلىڭىز دەمدە جەتكىزەدى. قۇم اراسىنان مال قاراۋعا دا قولايلىسى وسى. ودان قالدى ءار ءۇيدىڭ الدىندا جول تالعامايتىن كولىكتىڭ نەشە ءتۇرى قاڭتارىلىپ تۇر.
– قازىر اۋىلدا 70-تەن استام ءۇي, 422 تۇرعىن بار, – دەيدى قۇلاندى اۋىلدىق وكرۋگىنىڭ اكىمى زامانبەك ەردىقالىقوۆ.– الەۋمەتتىك كومەك, جاردەماقى الۋشىلار جوق. بىلتىر باستالعان 116 شاقىرىمدىق اۋىز سۋ قۇبىرى قۇرىلىسى كەلەر جىلى اياقتالادى.
اۋىل تاريحىن قاتتاعان جالعىز ورىن – مەكتەپ مۇراجايى. جالپى, بۇل ءبىلىم وشاعى ءوز باستاۋىن 1935 جىلى اۆان اۋىلىندا اشىلعان 7 جىلدىق ارالاس مەكتەپتەن الادى. «اۆان» اتاۋى تۋرالى دا بولجام جەتەرلىك. بىرەۋلەر ونى كەمەلەر ايالدايتىن «گاۆان» سوزىنەن تۋىنداتادى. وتكەن عاسىردىڭ جيىرماسىنشى جىلدارىندا وسى وڭىرلەرگە سىرتتان جەر اۋدارىلعاندارعا بايلانىستى «اۋعان» دەگەن اتاۋدان كەلىپ شىقتى دەيتىندەر دە بار. كەيىن وسى ماڭداعى كوكارال, اۆان, شومىشكول ەلدى مەكەندەرى ورتالىقتاندىرىلىپ, اقباستىعا كوشىرىلەدى. الپىسىنشى جىلدارى اقباستىلىقتار اسارلاتىپ ۇلكەن مەكتەپ سالىپ, ونى 1977 جىلعا دەيىن پايدالانادى. سول جىلى قۇلاندى جىلقى زاۋىتىنىڭ ءبىر فەرماسىنا اينالعان اقباستىدا جاڭا ءبىلىم وشاعى بوي كوتەرىپتى. ۋاقىتى كەلگەندە تاس تا مۇجىلەدى, تەمىر دە توزادى. 2011 جىلى سول تۇستاعى وبلىس اكىمى بولاتبەك قۋاندىقوۆ اقباستىعا ساپارمەن كەلىپ, قابىرعاسى تىرەۋمەن تۇرعان مەكتەپتە وقىپ جاتقان بالالاردى كورەدى. اۋىل حالقىنا ۋادە بەرگەن اكىم سوزىندە تۇرىپ, 2012 جىلى شاعىن جيناقتى مەكتەپ سالىندى.
قازىر 50 ورىندىق ءبىلىم وشاعىندا 85 بالا ەكى اۋىسىمدا وقىپ جاتىر. قاتارىنان 2 جىل 11-سىنىپتا بالا بولماعان ەكەن. مەكتەپ ديرەكتورىنىڭ ورىنباسارى جولداسبەك ماحانبەتوۆتىڭ ايتۋىنشا, بيىلعى وقۋ جىلىندا ءبىتىرۋشى تۇلەكتەر بار. «شۇكىر, باستاۋىش سىنىپتا دا بالا كوبەيىپ كەلەدى» دەيدى ول قۋانىپ. مەكتەپ جانىندا بالاباقشا ەسەبىندەگى شاعىن ورتالىق تا جۇمىس ىستەيدى.
جالپى, باياعىدان بۇل اۋىلعا ات ءىزىن سالاتىن اتقامىنەر سيرەك. اسىرەسە ءىستىڭ بار تەتىگى قولدارىندا تۇرعان استاناداعى دوكەيلەر كەلە قويمايدى. كەلگەن كۇندە دە تىكۇشاقپەن قاتىناپ, اۋىلدىڭ توبەسىنەن توپ ەتە قالادى. «سولار كولىككە ءمىنىپ, جولسىزبەن ءجۇرىپ كورسە, ءبىز الپىس جىلدان بەرى شەگىپ كەلە جاتقان ازاپ-مەحناتتىڭ شەت-شەبىرىن سەزىنەر ەدى» دەسەدى اۋىلداعىلار.
بۇل اراداعى اۋىلدارعا جەتپىسىنشى جىلدارعا دەيىن تەك سۋ جولى ارقىلى كەلەتىن. «ايدىنعا شىققاندا كوكجيەگى كوز تالدىراتىن تەلەگەي سۋ ءبىر كۇندەرى تاۋسىلادى دەگەن ەشكىمنىڭ ويىنا كەلگەن ەمەس» دەيدى جاعالاۋىنان شەگىنگەن تەڭىزدى كوزبەن ۇزاتىپ سالعان قاريالار. جىراقتان كەلىپ قونىس تەپكەن وزگەنىڭ دە وزەگىن تالدىرماعان قايران تەڭىز ەلۋىنشى جىلداردىڭ اياعىندا ەلەۋسىز عانا تارتىلا باستاپ, ون شاقتى جىلدىڭ مۇعدارىندا ميداي دالاعا اينالىپ شىعا كەلدى.
بۇل اۋىلدىڭ حالقى اتامەكەنىنەن تابانىن اجىراتپاۋ ءۇشىن نە ىستەمەدى دەيسىز... سول جەتپىسىنشى جىلداردىڭ سوڭىن الا مۇندا جىلقى زاۋىتىنىڭ فەرماسى قۇرىلىپ, كەشە ۇيدەي تولقىنمەن الىسقان بالىقشىلار قولىنا قۇرىق ۇستاعان جىلقىشىعا اينالىپ شىعا كەلدى. ارينە, ەل ادامى ءۇشىن كاسىپتىڭ قايسىسى دا بوتەن ەمەس. بىراق كۇنكورىسكە جاراعان بۇل تىرلىك تە اسا ءبىر باياندى بولا قويعان جوق.
اقساقالدارمەن سويلەسە قالساڭ, اۋىل تۋرالى اڭىزداردى ساباقتاي جونەلەدى. سونىڭ ءبىر پاراسى ىرگەدەگى ماناباي باز توڭىرەگىندە ءوربىپ جاتىر. وسى ماڭدا ماناباي اتتى اتاقتى باي بولىپتى. ءورىسى ءتورت ت ۇلىككە تولعان داۋلەتتى ازاماتتىڭ مالى اراسىندا قىلقۇيرىقتىنىڭ قاتارى قالىڭ بولسا كەرەك. بىردە مىڭداعان جىلقىسىنا سۋ ىزدەگەن باي قۇدىق قازدىرادى. كەيىننەن ءوزىنىڭ جيعان-تەرگەن التىن, كۇمىسىن, قولداعى بار قازىنا بايلىعىن الگى قۇدىققا كومدىرگەن دەسەدى.
ماناباي بازدىڭ باسىنداعى بيىكتىگى 3-4 مەتردەي بولاتىن ۇلكەن كۇمبەزدى كەسەنە ءبىزدىڭ كەزىمىزگە دە امان جەتكەن ەكەن. قازىر ورنى توبەشىك بولىپ جاتىر. قازدىرعان قۇدىعى دا كومىلىپ قالعان. جەتپىسىنشى جىلدارى اۋىلداعىلار ول جەردى قازىپ تا كورگەن ەكەن. بىراق نايزانىڭ ۇشى, كىسەن سەكىلدى توت باسقان تەمىرلەردەن وزگە ەشتەڭە شىعا قويماپتى. كەيىننەن اۋىلداعىلار قازىنا كومىلدى دەگەن جەرگە قايتا كۇرەك سالىپ كورىپتى. بۇل جولى دا ىزدەگەندەرى تابىلماسا كەرەك.
وسىدان ءبىراز بۇرىن اقباستىعا مانابايدىڭ ۇرپاعىمىز دەگەن بىرنەشە ازامات اقتوبەدەن كەلىپتى. بابالارىنىڭ قۇمعا كومىلگەن قازىناسى جايلى حابار قۇلاعىنا تيگەندەر ارنايى تەحنيكامەن سول ارانى تاعى ءبىر قازىپ كورىپ, قۇرقول قايتىپتى. ماناباي بازدان تابىلعان جادىگەرلەر قازىر مەكتەپ مۇراجايىندا تۇر.
اقباستىنىڭ برەندى – اۋىل ورتاسىنان شىعىپ جاتقان ىستىق قاينار. راس قازىرگى قىزۋى العاش اشىلعان 70-جىلدارداعىداي قاتتى سەزىلمەيدى. بىلتىرعى قۋاڭشىلىق كەزىندە ەكىنشى ۇڭعىما قازىلىپ, 650 مەتردەن شىققان اششى سۋ ويسىلقارا تۇقىمىن «الداۋعا» ابدەن جاراپ تۇر. قازىر اۋىلداعى وسى ت ۇلىك بىتكەن شاعىن كولشىكتىڭ اينالاسىندا.
اۋىلدا جۇمىسسىز جاستار جوق. ءبارى مال مەن بالىق شارۋاشىلىعىنىڭ اينالاسىندا. التى شارۋا قوجالىعى جۇمىس ىستەيدى. اقباستى ازاماتتارىنىڭ اۋىلداعى ورتاق شارۋالاردان شەتتەپ قالعان جەرى جوق. جىراقتاعى جۇرتشىلىق وسىلايشا ءبىر-بىرىنە قارايلاسىپ, تىرشىلىك كوشىنە ىلەسىپ كەلەدى.
– وسىنىڭ ءبارى ۇزىلۋگە اينالعان ءۇمىتىمىزدى جاقسىلىققا جالعاعان كىشى ارالدىڭ ارقاسى, – دەيدى اۋىل تۇرعىنى وكتيابر قالاباەۆ. – بىراق سوڭعى 3-4 جىلدا تەڭىز ايدىنىنا داريادان تامشى سۋ تۇسپەۋى الاڭىمىزدى كۇشەيتىپ وتىر. بىلتىرعى قۋاڭشىلىق تا وسى كۇدىگىمىزدى قويۋلاتىپ كەتتى. كوپشىلىگى تىسىنە ىلىنەر تۇك تاپپاي قينالعان ت ۇلىگىنىڭ ءتولىن ساتتى. اۋىلعا سىرتتان كەلگەن كولىك قاپتاپ, بار ءتولدى ارزان باعاعا الدى دا كەتتى. ءتىپتى ۇيىنەن وزىنە كەرەگىن عانا الىپ, شاڭىراعىن تاستاپ كەتكەندەر دە بار. ءبىز دە الدا كوشتىڭ بەتىن اقتوبەگە بۇرامىز-اۋ. اتامەكەندى قيماساق تا وسىدان باسقا امال قالمادى.
جالپى, مۇنداعى تىرشىلىك جامان ەمەس. تەڭىزدىڭ تابانى كەپكەن اناۋ ءبىر جىلدارمەن سالىستىرعاندا حانعا سالەم بەرمەستەي جاعدايدا. قوراسىندا مالى, تەڭىزىندە بالىعى باردا ەل بىرەۋگە قول جايۋدان اۋلاق. ءتىپتى مۇنداعىلاردىڭ اۋدان ورتالىعىمەن بايلانىستىرىپ جاتقان جولدىڭ ازابىنا دا ەتى ۇيرەنگەن. بار تىلەكتەرى – كىشى ارالدىڭ الىستاپ كەتپەۋى. كەشەگى ۇلكەن تەڭىز قايتقانداعى قاسىرەتتى كورگەندەر ەندى مىنا ايدىننان ايىرىلىپ قالامىز با دەپ قورقادى. باياعىدا وسى ماڭايداعى بەرەكەسى تاسىعان بىرنەشە اۋىل تارتىلعان تەڭىزبەن بىرگە جەر بەتىنەن جويىلعان. اۋىلداعىلار سولاردىڭ كەبىن ءبىز دە كيەمىز بە دەپ الاڭداۋلى.
اقباستى – باياعى قالپىن ساقتاپ قالعان بايىرعى جۇرتتىڭ ءبىرى. بىرەۋدىڭ ۇيىندە قۋانىش بولسا, شاقىرتۋسىز-اق جەتىپ كەلىپ, تىرشىلىگىنە ارالاسا كەتەتىن اڭقىلداق اعايىندى وسى جەردەن كەزىكتىردىك. جالعىز كوشەسىندە كەزدەسە قالساڭ, سەنى تانىماسا دا اڭقىلداپ الدىڭا ءتۇسىپ, شاڭىراعىنا قاراي جول باستاي جونەلەدى. اۋىلدىڭ كەيبىر ۇيلەرىندە قورشاۋ دا جوق.
«سىرتقا شىقساق, ءۇيدىڭ ەسىگىنە ق ۇلىپ سالماي كەتەمىز. ۇرلىق-قارلىق دەگەن اتىمەن جوق ەلدى مەكەننىڭ ءبىرىمىز» دەيدى اۋىل اكىمى زامانبەك ەردىقالىقوۆ. اقساقالدار شەشىمىمەن مۇنداعى دۇكەندەردە اراق-شاراپ ساتۋعا تىيىم سالىنعان. سودان بولار, اۋىلدا وقىس وقيعا جوقتىڭ قاسى. ەل ازاماتتارى اقىلداسىپ, شاعىن تويحانا سالىپ قويىپتى. مۇنداعىلاردىڭ قىزىق-قۋانىشى, قادە-قاۋمەتىنىڭ ءبارى سوندا وتەدى. اۋىل كلۋبىنداعى كىتاپحانادا 9441 كىتاپ بار. ءبىر مەدبەكەت اقباستىلىقتارعا جىل ون ەكى اي قىزمەت كورسەتىپ تۇر.
ءار اۋىلدىڭ ءسوزىن ۇستار ساليقالى ۇلكەندەرى بولادى. اقباستىداعى سونداي قاريالاردىڭ ءبىرى توقسانعا تاياعان ساۋەلحان سماعۇلوۆ. جەتپىسىنشى جىلداردىڭ وراسىندا تەڭىز ءتۇبى كورىنىپ, ەل داعدارىپ قالعان تۇستا ءتيىستى ورىندارعا ولەڭدەتىپ حات جازىپ, اۋىلدا كوشپەلى بالىق بريگاداسىنىڭ قۇرىلۋىنا سەبەپكەر بولعان دا وسى كىسى. بريگادانى ءوزى باسقارىپ, سۋ جاعالاپ بالىق ءسۇزىپ, ەل وزەگىن تالدىرماعان ساۋەلحان اقساقال ءالى دە اتتان تۇسە قويعان جوق. بىلتىرعى قۋاڭشىلىقتىڭ كەزىندە دە تۇرعىنداردىڭ باسىن قوسىپ, ورتاق ىسكە جۇمىلدىرعان قاريا ەل ىرگەسى ءبۇتىن بولسا دەگەن تىلەكتىڭ ۇستىندە.
– باياعى جىلدارى مۇندا 500-گە جۋىق شاڭىراق بار ەدى. جەتپىسىنشى جىلدارى ءبىرازى جالاعاش اۋدانىنا قونىس اۋداردى. تىرشىلىكتىڭ اۋانىمەن اركىم جايلى مەكەن ىزدەگەن كەزدى دە كوردىك. قالعان ەلدىڭ تىلەۋىن تىلەپ وتىر ەدىك, بىلتىرعى قۋاڭشىلىق قيناپ جىبەردى جۇرتتى. ەلدىڭ نەسىبەسىنە 40 شاقىرىم جەردەگى تالپاقتان سۋ شىعىپ, ءتورت ت ۇلىكتى ءبىرشاما ساقتاپ قالدىق. كىشى ارال – وسىنداعى اينالا قونعان ەلدىڭ يگىلىگى. ەندىگى تىلەگىمىز سول ورتاق قازان ورتايماسا ەكەن. وسى قىستا قار, كوكتەمدە جاۋىن-شاشىن دا مول بولدى. اماندىق بولسا, كەلەر جىلى اۋىز سۋ دا جەتەدى, – دەيدى قاريا.
جالپى, الاقانداي عانا اقباستىدان بەلگىلى ازاماتتار كوپ شىققان. سولاردىڭ ءبىرى ايدوس قۇلمانوۆ جەتپىسىنشى جىلداردىڭ ورتاسىندا قازاقستان كومپارتياسى ورتالىق كوميتەتىنە حات جازىپ, سونىڭ ىزىمەن اۋىلدا حالىققا ناپاقا بولار جۇمىس تابىلىپ, جۇدەگەن جۇرت ءبىر سەرپىلگەن ەدى. بالا كەزىندە وقىس جاعدايعا ۇشىراپ, بار ءومىرى بويىنداعى دەرتپەن ارپالىسۋمەن وتكەن اۋداندىق گازەتتىڭ شتاتتان تىس ءتىلشىسى اۋدان مەن وبلىستان اسپاعان شاعىمدى الماتىداعى پوشتا ارقىلى ءتيىستى جەرگە جەتكىزىپ, جۇرتقا سەبىن تيگىزگەن ەكەن. «اقباستىنىڭ زەينوللا شۇكىروۆى» اتانعان قۇلمانوۆ ومىردەن جاستاي ءوتىپ كەتىپتى.
تاعى ءبىر قىزىعى, بۇل اۋىل كەشەگى توقسانىنشى جىلدارعا دەيىن ەلەكتر جەلىسى دەگەندى تەك سىرتتان عانا كورەتىن. ەل قازىناسىن مولايتۋعا باسقالاردان كەم ۇلەس قوسىپ كورمەسە دە بالىقشى اۋىل تالاي جىل موتوردى الدانىش قىلىپ كەلىپتى. ونىڭ ءوزى دە كۇنىنە 4 ساعات قوسىلىپ, قالعان مەزگىل قاراڭعىلىق قۇشاعىندا قالا بەرگەن. تەك 1991 جىلى عانا اۋداندىق ەلەكتر جەلىسىن باسقارىپ وتىرعان وسى اۋىلدىڭ تۋماسى اراپحان سۇلتانوۆ جارىق تارتقىزىپ, جەرلەستەرىنىڭ العىسىن الدى.
بىلتىرعى قۋاڭشىلىق كەزىندە دە وسى اۋىلدان تۇلەپ ۇشقان تالايلار اقباستىنىڭ ازابىن داۋسى جەتكەن جەرگە دەيىن ايتىپ-اق جاتتى. وسى اۋىلدىڭ پەرزەنتى عالىم, بەلگىلى جىرشى بەرىك ءجۇسىپوۆ باۋىرىمىز ەلدىڭ جانايقايىن الەۋمەتتىك جەلى, ءباسپاسوز ارقىلى ءبىراز جەرگە دەيىن جەتكىزدى. بيلىكتىڭ قيىندىقتى ەڭسەرۋگە جاساعان جوبا-جوسپارىنىڭ جۇزەگە اسۋىنا وسىنداي ازاماتتاردىڭ سەبى كوپ ءتيدى.
جوعارىدا ايتتىق قوي, اۋىلدا تىرشىلىك بار. مۇنداعىلار الەۋمەتتىك كومەك, جاردەماقى دەگەنگە الاقان جايمايدى. وزىنىكى وزىنە جەتىپ جاتقاسىن ورتاق نەسىبەگە قول سوزىپ قايتسىن. ءبىز كەلگەندە اقتوبە وڭىرىنەن كەلگەن ازاماتتار XVIII عاسىردا ەل شەتىن جاۋدان قورعاعان ايتۋلى ەر تۇعىر باتىرعا اس بەرىپ, بايگە ۇيىمداستىرىپ جاتىر ەكەن. وسى شاراعا اۋىلدىڭ ازاماتى, بەلگىلى جىراۋ دەمەۋباي جولىمبەتوۆ تە كەلىپتى.
– وسى مەكەندە تۋىپ, ەرجەتتىك. قىزمەت ىستەپ, كەيىننەن اقتوبەگە قونىس اۋدارعانىمىزعا دا 25 جىلعا قاراپتى. قازىر ەلدىڭ بۇرىنعى قالپىن ساعىنعاندا سوعىپ, ماۋقىمىزدى باسىپ قايتامىز. جەتپىسىنشى جىلداردىڭ ورتاسىندا اۋىلداعىلارمەن كەزدەسۋگە كەلگەندەردىڭ ءبىرىنىڭ كوپكە ساۋساعىن بەزەپ تۇرىپ: «كەلەشەكتە مۇندا قارا مىسىق قانا قالادى» دەگەنىن دە كوزىمىز كورىپ, قۇلاعىمىز ەستىگەن. سول تۇستاعى قانداي ساياساتتىڭ سالقىنى ەكەنىن بىلمەيمىن, ەشكىمنەن ەشتەڭە سۇراماي, ەڭبەگىنە جالىنعان جۇرتتى ءتۇپ قوپارا كوشىرىپ جىبەرۋگە قۇمارلار كوپ-تۇعىن. شۇكىر, ولاردىڭ دەگەنى بولمادى. ازىرگە ەل دە, جەر دە ورنىندا. ءبىرازى كوشكەنى بولماسا ەل سول بايىرعى جۇرتتا وتىر. تەك مىنا مەكتەپتىڭ جايى الاڭداتادى. باس قۇراعان جاستار ورتالىققا ورىن تەۋىپ, اۋىلدا بويداقتار قاتارىنىڭ قالىڭداعانى, تابيعي ءوسىمنىڭ كىدىرىستەگەنى كوڭىلگە كىربىڭ ءتۇسىرىپ تۇر, – دەيدى بەلگىلى جىراۋ.
وسى كۇنى كەرى قايتتىق. كەشە 250 شاقىرىمدى 6 ساعات ءجۇرىپ وتكەنىمىزدى ويلاپ, كولىككە قينالا وتىردىق. ارتتا الاقانداي اقباستىنىڭ الدان ءۇمىتتى جۇرتى قالىپ بارادى.
سول ءۇمىت سەنىمگە جالعاسسا ەكەن.
قىزىلوردا
