جارىستىڭ اشىلۋ سالتاناتىندا استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ ءسابيت ۇلى, استانا قالاسىنىڭ سەمسەرلەسۋ فەدەراتسياسىنىڭ باسشىسى نۇسىپبەكوۆ ەرجان ەستەۋ ۇلى ءسوز سويلەپ, جارىس قاتىسۋشىلارىنا ساتتىلىك تىلەدى.
«بۇگىندە داستۇرگە اينالعان رەسپۋبليكالىق تۋرنير بيىل ءون بىرىنشى رەت وتكىزىلىپ جاتىر. تۋرنيرگە قاتىساتىن جاستاردىڭ سانى جىل سايىن ارتىپ كەلە جاتقانى قۋانتادى. مەملەكەت باسشىسىنىڭ تاپسىرماسى بويىنشا بۇقارالىق سپورتقا ەرەكشە كوڭىل بولۋدەمىز. بۇگىنگى جارىس الدىمىزداعى ۇلتتىق مەرەكە رەسپۋبليكا كۇنىنە ورايلاستىرىپ ۇيىمداستىرىلىپ وتىر. وسى ورايدا, بۇگىنگى جارىستى ۇيىمداستىرعان بارشا ازاماتتارعا ەلىمىزدىڭ سپورت سالاسىن دامىتۋعا قوسقان ۇلەستەرى ءۇشىن زور العىسىمدى بىلدىرەمىن. سپورتشىلارعا جەڭىس تىلەيمىن. ەڭ مىقتىلارى توپ جارسىن. سەمسەرلەسۋدەن «استانا قىلىشى» رەسپۋبليكالىق ءتۋرنيرىن اشىق دەپ جاريالاۋعا رۇقسات ەتىڭىزدەر», دەدى استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ.
تۋرنيردە جەكە جانە كوماندالىق ەسەپتە جۇزگە جۋىق قاتىسۋشى كۇش سىناسادى. جارىس قارۋدىڭ قىلىش, قانجار جانە نايزا سەكىلدى ءۇش ءتۇرى بويىنشا وتەدى.
«استانا قىلىشى» ءتۋرنيرى ەلىمىزدە سەمسەرلەسۋدى كەڭىنەن ناسيحاتتاۋ جانە قازاقستاندىقتاردىڭ وسكەلەڭ ۇرپاعىن زياتكەرلىك كۇرەستىڭ وسى تۇرىنە تارتۋ, سونداي-اق تۋرنيرگە قاتىساتىن ەلىمىزدىڭ جاس سپورتشىلارىنىڭ سپورتتىق شەبەرلىك دەڭگەيىن ارتتىرۋ جانە دە قازاقستان رەسپۋبليكاسىنىڭ سپورتتىق قاتىناستارىن نىعايتۋ جانە جاستار اراسىندا سالاۋاتتى ءومىر سالتىن ناسيحاتتاۋ ماقساتىندا وتكىزىلىپ وتىر. سونداي-اق «استانا قىلىشى» ءتۋرنيرى - 2022 جىلدىڭ قاراشا ايىنىڭ باسىندا شىمكەنتتە وتەتىن كادەتتەر مەن جاسوسپىرىمدەر اراسىنداعى قازاقستان چەمپيوناتى الدىنداعى دايىندىق جارىسى بولىپ سانالادى», دەيدى ۇيىمداستىرۋشىلار.
تۋرنير جەڭىمپازدارى مەن جۇلدەگەرلەرى مەدالدارمەن, ءتيىستى دارەجەدەگى ديپلومدارمەن, كۋبوكتارمەن جانە باعالى سىيلىقتارمەن ماراپاتتالادى.
رەسپۋبليكا كۇنىنە وراي ۇيىمداستىرىلعان تۋرنير 16 قازانعا دەيىن جالعاساتىنىن اتاپ ءوتۋ كەرەك.
