وڭىردەگى بىرقاتار كارتوپ ءوسىرۋشى جانە وبلىس بيلىگى جەرگىلىكتى نارىقتى كوكونىسپەن قامتۋ جونىندەگى مەموراندۋمعا قول قويدى. قۇجاتقا سايكەس, اۋىل شارۋاشىلىعى ونىمدەرىن دۇكەن سورەلەرىنە تىكەلەي جەتكىزۋ ماقساتىندا 20 مىڭ توننا كارتوپ پەن 5 مىڭ توننا ءسابىز قويمالاردا ارنايى ساقتالماق.
بيىل ايماقتا جينالعان كارتوپتىڭ كولەمى 700 مىڭ توننادان استى. ءونىم بىلتىرعىدان 20 پايىزعا كوپ. ىشكى نارىقتى تولىعىمەن قامتاماسىز ەتۋ ءۇشىن شامامەن ءجۇز مىڭ توننا تۇينەك جەتكىلىكتى. بىلتىر ادەتتەگىدەي تۇراقتاندىرۋ قورىندا كارتوپ ساقتالىپ, ول قىستا ارزان باعادا دۇكەندەرگە ۇلەستىرىلگەن ەدى. الايدا ساتىپ الۋشىلار ءونىمنىڭ كوبى ساپاسىز ەكەنىنە شاعىمدانعانى ەسىمىزدە. وبلىستا زامانعا ساي قويمالار جەتكىلىكتى. الداعى ۋاقىتتا ساقتالاتىن كارتوپ پەن ءسابىزدىڭ ساپاسى مەن باعاسىنا قاتىستى ماسەلە تۋىنداماۋى كەرەك.
– كارتوپ ءوسىرۋدى دامىتۋ ءۇشىن وبلىستا مەملەكەتتىك قولداۋدىڭ بارلىق شاراسى قولدانىلۋدا. حالىققا ەڭ ءبىرىنشى كەزەكتە قاجەت تاۋارلاردىڭ تۇراقتى باعالارى مەن جوعارى ساپاسىن قامتاماسىز ەتۋ كەرەك. بۇل ءۇشىن وبلىستا قاجەتتى كولەمدەگى قويمالار بار. قالا مەن اۋدان اكىمدەرى اۋىل شارۋاشىلىعى باسقارماسىمەن بىرلەسىپ, الەۋمەتتىك دۇكەندەردى, جارمەڭكەلەر مەن فەرمەرلىك بازاردى كارتوپ جانە ءسابىزدىڭ قاجەتتى كولەمىمەن قامتاماسىز ەتەدى. باعالاردى تۇراقتى تۇردە مونيتورينگىلەۋ قولعا الىنادى. كوكونىس قويمالارىنان ساتىپ الىناتىن كارتوپتىڭ شەكتى باعاسىن كيلوسىنا 100 تەڭگە ەتىپ بەلگىلەۋدى ۇيعاردىق, – دەيدى وبلىس اكىمى ابىلقايىر سقاقوۆ.
اۋىل شارۋاشىلىعى باسقارماسىنىڭ باسشىسى نۇربولات ماقاشەۆتىڭ سوزىنە سۇيەنسەك, مەموراندۋم اياسىندا 36 اۋىل شارۋاشىلىعى سۋبەكتىسى ارزان باعالى ءونىمدى ساقتاۋعا جاۋاپكەرشىلىك الىپ وتىر. بۇل – مەملەكەتتىك قولداۋعا يە كاسىپكەرلەر. مىسالى, 2010-2022 جىلدارى وڭىردە سۋارمالى القاپتارداعى ينجەنەرلىك-كوممۋنيكاتسيالىق ينفراقۇرىلىمدار قۇرىلىسىنا بيۋدجەتتەن 20 ملرد تەڭگە باعىتتالعان. بيىل 360 ملن تەڭگەگە 5 مىڭ توننا شاماسىنداعى كارتوپ تۇقىمىن ساتىپ الۋ سۋبسيديالاندى.
وبلىستىڭ ىشكى نارىعىن الەۋمەتتىك ماڭىزعا يە ازىق-تۇلىك تاۋارلارىمەن قامتۋ ءۇشىن وسى ايدىڭ سوڭىنا دەيىن پاۆلودار قالاسىندا فەرمەرلىك بازاردى ىسكە قوسۋ كوزدەلۋدە. جالپى, سوڭعى ەكى جارىم جىل ىشىندە وڭىردەگى اگروونەركاسىپتىك كەشەننىڭ ءونىمى 2 ەسەگە ارتتى.
پاۆلودار وبلىسى
