قاسىم-جومارت توقاەۆ قازاقستان مەن قاتار اراسىندا ديپلوماتيالىق قارىم-قاتىناس ورناعان 30 جىل ىشىندە ەكى ەلدىڭ ىنتىماقتاستىعى نىعايىپ, ساۋدا-ەكونوميكالىق جانە مادەني-گۋمانيتارلىق سالالارداعى بايلانىستار, سونداي-اق جاھاندىق جانە وڭىرلىك قۇرىلىمدار اياسىنداعى ءىس-ارەكەتتەر دامىپ كەلە جاتقانىن اتاپ ءوتتى.
«جالپى, قاتار – ءبىز ءۇشىن تاياۋ شىعىستاعى وتە ماڭىزدى سەرىكتەس. سەبەبى دوحا ءبىزدىڭ الەۋمەتتىك-ەكونوميكالىق, ساياسي رەفورمالارىمىزعا العاشقىلاردىڭ ءبىرى بولىپ قولداۋ كورسەتتى. مەن مۇنى بۇگىن شەيح ءتاميمنىڭ وزىنە دە ايتتىم. ونىڭ ەكىجاقتى ىنتىماقتاستىقتى نىعايتۋعا قوسقان ۇلەسىن جوعارى باعالايمىز. حالقىمىزدىڭ اتىنان ريزاشىلىق ءبىلدىردىم», دەدى مەملەكەت باسشىسى باق وكىلدەرىنە ارنالعان بريفينگ بارىسىندا.
پرەزيدەنتتىڭ ايتۋىنشا, بۇگىنگى كەلىسسوزدەر ناتيجەسىندە تاراپتار ماڭىزدى ماسەلەلەردى تالقىلاپ, بىرقاتار كەلىسىمگە كەلگەن.
«قازاقستان مەن قاتار ەكىجاقتى قارىم-قاتىناستاعى ساۋدا-ەكونوميكالىق جانە ينۆەستيتسيالىق ىنتىماقتاستىققا باسا نازار اۋدارادى. الايدا كوروناۆيرۋس ىندەتى جانە گەوساياسي احۋال الەۋەتىمىزدى تولىق پايدالانۋعا مۇمكىندىك بەرمەدى. سول سەبەپتى سوڭعى جىلدارى ساۋدا-ساتتىعىمىز باسەڭدەپ كەتتى. ەندىگى ماقساتىمىز – ەلدەرىمىز اراسىنداعى تاۋار اينالىمىن جانداندىرۋ. بۇعان قولايلى جاعداي جاسالدى», دەپ اتاپ ءوتتى قاسىم-جومارت توقاەۆ.
قازىرگى ۋاقىتتا قاتاردىڭ بىرنەشە كومپانياسى قازاقستاننىڭ اۋىل شارۋاشىلىعى سالاسىندا تابىستى جۇمىس ىستەپ جاتىر. ولاردىڭ ءونىمى بىرقاتار مەملەكەتكە ەكسپورتتالادى. سونىمەن قاتار تاراپتار گەولوگيالىق بارلاۋ, تاۋ-كەن ونەركاسىبى, كولىك-لوگيستيكا, قارجى جانە بانك سەكتورىن دامىتۋعا ۋاعدالاستى. وسىعان وراي بۇگىن بىرقاتار ماڭىزدى قۇجاتتارعا قول قويىلدى.
مەملەكەت باسشىسى بۇل كەلىسىمدەردىڭ قازاق-قاتار قاتىناستارىنىڭ دامۋىنا تىڭ سەرپىن بەرەتىنىنە سەنىمدى ەكەنىن جەتكىزدى.
