رەيتينگ ءۇش فاكتوردان قۇرالادى. ونىڭ ءبىرىنشىسى – ء«بىلىم». بۇل تەحنولوگيالاردى زەرتتەۋ جانە اشۋ ءۇشىن قاجەتتى ماتەريالدىق ەمەس ينفراقۇرىلىمدى كورسەتەدى. ەكىنشىسى – «تەحنولوگيا». تسيفرلىق تەحنولوگيالاردىڭ دامۋ دەڭگەيىن سانمەن باعالايدى. ءۇشىنشىسى – «كەلەشەككە دايارلىق». بۇل ەكونوميكانىڭ تسيفرلىق ترانسفورماتسياعا دايىندىق دەڭگەيىنە باعا بەرەدى.
ء«ار فاكتور 3 سۋبفاكتور جانە 54 كورسەتكىشتەن تۇرادى. 2022 جىلدىڭ رەيتينگىنە ەكى جاڭا كورسەتكىش قوسىلدى – «ۇكىمەتتىڭ كيبەرقاۋىپسىزدىك سالاسىنداعى الەۋەتى» جانە «زاڭ بويىنشا قۇپيالىلىقتى قورعاۋ». وسى جولعى زەرتتەۋدە 63 ەلگە باعا بەرىلگەن. الەمدىك تسيفرلىق باسەكەگە قابىلەتتىلىك رەيتينگىنىڭ توپ-5 قاتارىندا دانيا, اقش, شۆەتسيا, سينگاپۋر جانە شۆەيتساريا بار», دەلىنگەن ەكونوميكالىق زەرتتەۋلەر ينستيتۋتىنىڭ حابارلاماسىندا.
بيىلعى رەيتينگ قورىتىندىسى بويىنشا قازاقستان 36-ورىن العان جانە وسى كورسەتكىشىمەن سلوۆەنيا (37-ورىن), پورتۋگاليا (38-ورىن), يتاليا (39-ورىن), پولشا (46-ورىن) جانە تۇركيا (54-ورىن) سياقتى ەلدەردەن وزىپ وتىر.
«قازاقستان بيىل 6 ساتى جوعارى كوتەرىلىپ ء«بىلىم» فاكتورى بويىنشا ءوز پوزيتسياسىن جاقسارتقان. ەڭ كۇرت جاقسارۋ «وقىتۋ جانە ءبىلىم بەرۋ» سۋبفاكتورىندا بايقالدى. مۇندا قازاقستان ەڭ باسەكەگە قابىلەتتى پوزيتسيا – 1-ورىنعا يە. بىزدەن كەيىن گونكونگ (2-ورىن) جانە كانادا (3-ورىن) ەلدەرى ورنالاسقان. «تەحنولوگيا» فاكتورى بويىنشا پوزيتسيا وزگەرىسسىز قالدى – 40-ورىن. ەكى سۋبفاكتور بويىنشا پوزيتسيا 1 ساتىعا جاقساردى», دەلىنەدى حابارلامادا.
قازاقستاننىڭ پوزيتسياسى «كەلەشەككە دايارلىق», سونىڭ ىشىندە «IT-ينتەگراتسيا» سۋبفاكتورى بويىنشا تومەندەگەن. بىلتىرمەن سالىستىرعاندا وسى سۋبفاكتور بويىنشا ەلىمىز 12 ساتىعا تومەندەپ, 56-ورىنعا تابان تىرەگەن. سونىمەن قاتار «مەملەكەتتىك جانە جەكە سەكتورداعى كاسىپورىن تەحنولوگيالىق دامۋدى قولدايدى» جانە «زاڭ بويىنشا قۇپيالىلىقتى قورعاۋ» كورسەتكىشتەرى بويىنشا دا ەلىمىزدىڭ پوزيتسياسى ءماز ەمەس. تىم تومەن.
قازاقستاننىڭ ۇلتتىق دامۋ جوسپارى بويىنشا 2025 جىلى ەلىمىز الەمدىك تسيفرلىق باسەكەگە قابىلەتتىلىك رەيتينگىندە 33-ورىنعا كوتەرىلۋگە ءتيىس.
