ول قىزىلوردادا تسيترۋس جەمىستەرىن پاتەنتتەپ, جەرسىندىرۋدى باستاعان العاشقى كاسىپكەرلەر قاتارىندا. وسىعان دەيىن ءوز تاجىريبەسىندە ليموندى جەرسىندىرۋ ماقساتىندا ەكسپەريمەنت جاساپ كورگەن.
– ەڭ الدىمەن جىلىجايدا قۇلپىناي ءوسىرىپ كوردىك. جاڭا جەمىس ءتۇرىن ەگىپ كورۋدەگى العاشقى ماقسات – جەرسىندىرۋ. ونى زەرتتەپ, قالا ىشىندە ەگىپ كوردىك تە, وسەتىنىنە كوز جەتكىزدىك. جىلىجايدا قاجەتتى تەحنولوگيانى ساقتاي وتىرىپ, ءارتۇرلى ءونىمدى وسىرۋگە بولادى. تەمپەراتۋراسىن, ىلعالدىلىعىن باقىلاپ, قاجەتتى دارۋمەندەر مەن قورەگىن ۋاقتىلى ءوز مولشەرىمەن بەرىپ, زاڭدىلىقتارىن ساقتاسا, ناتيجە بەرۋى مۇمكىن. ارينە, بۇرىن ەگىلمەگەن جاڭا جەمىس تۇرلەرىن ەككەندە, قىزىلوردا وبلىسىنىڭ توپىراعى بويىنشا تاجىريبە بولماعاندىقتان ءتۇرلى قيىندىق كەزدەستى. الايدا قيىندىقتىڭ ءبارى – تاجىريبە, ءبىلىم. بۇگىندە جىلىجايدا ليمون تۇينەك سالىپ تۇر.
ەكى جەمىستى قاتار ەگۋدى ءجون كورۋىمىزدىڭ وزىندىك سەبەبى بار. ليمون اعاشى العاشقى 2 جىلىندا ءونىم بەرمەيدى, بىردەن تۇينەكتەمەيدى. ولاردى كۇتۋ كەرەك. وسى ورايدا ماعان جەتەكشىلىك جاساعان ۋنيۆەرسيتەتتەگى عالىمداردىڭ ەڭبەگى زور. تسيترۋستىق جەمىستەر ىلعالسۇيگىش بوپ كەلەدى, شىدامدىلىقتى تالاپ ەتەدى. سوندىقتان ۋاقىتتى بوسقا جىبەرىپ الماۋ ءۇشىن قوسىمشا قۇلپىناي ەگۋدى جوسپارلادىق. قۇلپىناي ەككەننەن سوڭ 1 ايدا-اق جەمىس بەرەدى. بۇيىرسا, ليموننىڭ العاشقى ءونىمىن جيناعانعا دەيىن جەرگىلىكتى جەرگە قۇلپىناي ساتىپ, كاسىپ باستايمىز, – دەدى ستۋدەنت.
جانسايا ميرامبەكقىزى – قورقىت اتا اتىنداعى قىزىلوردا ۋنيۆەرسيتەتى, «بيولوگيا» ماماندىعىنىڭ 4-كۋرس ستۋدەنتى, «پرەزيدەنتتىك ستيپەنديا» يەگەرى. جاس كاسىپكەر كونكۋرسقا «قىزىلوردا وڭىرىندە جىلىجايدا تسيترۋستىق جەمىس اعاشتارىن جانە قۇلپىناي ءوسىرۋ» تاقىرىبىنداعى جوباسىن ۇسىنىپ, 5 ملن تەڭگەگە دەيىنگى قارجىلاي قولداۋ تاپتى. الداعى ۋاقىتتا جانسايا تسيترۋستىق جەمىس اعاشتارى مەن قۇلپىناي كوشەتتەرىن ءوسىرىپ, جىلىجاي جابدىقتارىن الۋدى جوسپارلاپ وتىر.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ حابارلاۋىنشا, قايتارىمسىز گرانت كونكۋرسىنا قىزىلوردا وبلىسى بويىنشا 700 ۇمىتكەر قاتىسىپ, ونىڭ 25-ءى جەڭىمپاز اتاندى. جانسايانىڭ اتا-اناسى دا اتالعان ۋنيۆەرسيتەتتىڭ جىلىجايىندا جۇمىس ىستەگەن اگرونومدار. بۇگىندە بۇل جوبا وتباسىلىق كاسىپتىڭ جالعاسى بولماق.
