تەگەران قالاسىندا وتكەن كەزدەسۋ بارىسىندا وڭىرلەر اراسىنداعى كولىك-ترانزيتتىك ىنتىماقتاستىقتى دامىتۋ ماسەلەلەرى تالقىلاندى.
جيىنعا قاتىسۋشى ەلدەر ينفراقۇرىلىمداعى «كەدەرگىلەردى», اتاپ ايتقاندا اكىمشىلىك كەدەرگىلەردى جويۋ جانە تاسىمالداۋشىلار ءۇشىن قولايلى جاعدايلار جاساۋ ارقىلى «سولتۇستىك – وڭتۇستىك» ءدالىزىن دامىتۋ جونىندەگى باستامانى قولدادى.
ء«بىز «سولتۇستىك – وڭتۇستىك» حالىقارالىق كولىك ءدالىزى بويىنشا ەلدەر اراسىنداعى ترانزيتتىك الەۋەتتى ارتتىرۋعا مۇددەلىمىز. بۇگىنگى تاڭدا اقتاۋ پورتتارى جانە يراننىڭ سولتۇستىك پورتتارى, سونىمەن بىرگە انزالي مەن اميرابادتىڭ اراسىندا تۇراقتى كولىك قاتىناسى ورناتىلدى. كونتەينەرلىك تاسىمالداردى دامىتۋ ءۇشىن اقتاۋ پورتى ءوز قىزمەتتەرىنە جەڭىلدىكتەر ۇسىنىپ, 40 فۋتتىق كونتەينەردى اۋىستىرىپ تيەۋ تاريفتەرى تومەندەتىلدى. سونداي-اق قازاقستان – تۇركىمەنستان – يران قۇرلىقتىق تەمىرجول باعىتى بويىنشا كونتەينەرلىك قاتىناس ورناتىلىپ جاتىر», دەپ اتاپ ءوتتى مينيستر.
كەزدەسۋگە قاتىسۋشىلار ورتالىق ازيا ەلدەرىن پارسى شىعاناعى مەن وڭتۇستىك ازيا وڭىرلەرىمەن بايلانىستىراتىن دالىزدەر جانە كولىك وبەكتىلەرىنىڭ ينفراقۇرىلىمدىق مۇمكىندىكتەرىنە قاتىستى ماسەلەنى دە كۇن تارتىبىنە سايكەس تالقىلادى.
«قازاقستان ترانزيتتىك تاسىمالداردىڭ جىلدامدىعى مەن ساپاسىن ارتتىرۋعا مۇمكىندىك بەرەتىن بارلىق قاجەتتى جاعداي جاساپ, ءتيىستى ينفراقۇرىلىممەن قامتىپ وتىر. اتالعان الاڭ ەلدەرىمىزدىڭ مۇددەلەرىن جاقىنداستىرا تۇسەتىنىنە, سونداي-اق ءوزارا ءتيىمدى ىنتىماقتاستىقتى قۇرۋ ءۇشىن وڭتايلى مىندەتتەردى شەشۋگە ىقپال ەتەتىنىنە سەنىمدىمىن», دەپ تۇيىندەدى قايىربەك وسكەنباەۆ.
كەزدەسۋ قورىتىندىسى بويىنشا كولىك مينيسترلەرىنىڭ ىنتىماقتاستىقتى ودان ءارى دامىتۋ تۋرالى بىرلەسكەن مالىمدەمەسىنە قول قويىلدى.
