«Amanat» پارتياسىنىڭ اتقارۋشى حاتشىسى اسحات ورالوۆ اتاپ وتكەندەي, كۇنى كەشە ساياسي پارتيالار مەن رەسپۋبليكالىق ۇيىمداردىڭ وكىلدەرى قاسىم-جومارت توقاەۆتى قولداۋ جونىندەگى حالىقتىق كواليتسيا قۇردى.
«بۇل ءۇردىس پارتيانىڭ جاڭا ساياسي تۇعىرناماسىنداعى يدەولوگياعا سايكەس كەلەدى. سونىمەن قاتار بۇل ء«تۇرلى كوزقاراس – ءبىرتۇتاس ۇلت» دەگەن قاعيدانىڭ ايقىن كورىنىسى. كواليتسيا بولىپ بىرىگىپ پرەزيدەنتتى ۇسىنۋىمىز ساياسي مادەنيەتىمىز بەن ساياسي جۇيەمىزدىڭ جوعارى دەڭگەيىن كورسەتەدى. حالىقتىق كواليتسيانىڭ فورۋمىندا پرەزيدەنت ءبىزدىڭ ۇسىنىسىمىزدى قابىل الدى. سوندىقتان كواليتسيا مۇشەلەرى بىرلەسىپ, قاسىم-جومارت كەمەل ۇلىن كانديدات رەتىندە تىركەۋ قۇجاتتارىن ورتالىق سايلاۋ كوميسسياسىنا تاپسىردىق», دەدى اسحات ورالوۆ.
«قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆتىڭ ايتۋىنشا, حالىقتىق كواليتسيا – قوعامدىق توپتاسۋدىڭ جاڭا دەڭگەيىنىڭ كورسەتكىشى, ىنتىماقتاستىقتىڭ جارقىن ۇلگىسى.
«رەفەرەندۋم بارىسىندا دا قوعامدىق شتاب ق.توقاەۆتىڭ ساياسي رەفورمالارىنىڭ بارلىق جاقتاسىن بىرىكتىردى. سول كەزدەگىدەي, ءبىز قازىر ءبىرتۇتاس كوماندا رەتىندە ارەكەت ەتەمىز. ءبىز قاسىم-جومارت كەمەل ۇلىنىڭ كانديداتۋراسىن كورنەكتى ساياسي مەملەكەت قايراتكەرى رەتىندە ۇسىندىق, بۇل جالپىحالىقتىق تاڭداۋ», دەدى ول.
ءوز كەزەگىندە Qazaqstan team رەسپۋبليكالىق قوعامدىق جاستار بىرلەستىگىنىڭ توراعاسى ولجاس سۇلەيمەنوۆ ورتالىق سايلاۋ كوميسسياسىنا قۇجاتتاردى تاپسىرۋ بولاشاق سايلاۋ ناۋقانىن باستايتىن ماڭىزدى قادام ەكەنىن اتاپ ءوتتى.
«مەن ءۇشىن بۇل وتە ماڭىزدى وقيعا. ويتكەنى كواليتسيا بىرىگىپ ارەكەت ەتەدى. ىنتىماقتاستىق ارقاشان وزەكتى. ءبىز ءبىر-ءبىرىمىزدىڭ تاجىريبەمىزدى قابىلداپ, ورتاق ماقساتقا جەتە الامىز», دەدى ول.
تىركەۋگە قاجەتتى قۇجاتتار توپتاماسىن «Amanat» پارتياسى, قازاقستان حالىق پارتياسى, «اق جول» قازاقستان دەموكراتيالىق پارتياسى, «ارداگەرلەر ۇيىمى», Qazaqstan team, «قازاقستان ءماسليحاتتارى دەپۋتاتتارىنىڭ بىرلەستىگى», «گەنەرالدار كەڭەسى», «قازاقستاندىق سپورتشىلار وداعى» ۇسىندى.
