جيىن بارىسىندا قر سيم ساۋدا كوميتەتىنىڭ توراعاسى ەرجان قازانباەۆ جىل باسىنان بەرى ءامات باعاسىنىڭ 19,6%-عا, ونىڭ ىشىندە وتكەن اپتادا 0,1%-عا كوتەرىلگەنىن ايتتى. وڭىرلەر بويىنشا ەڭ جوعارى كورسەتكىشتەر ۇلىتاۋ, ماڭعىستاۋ جانە باتىس قازاقستان وبلىستارىندا تىركەلدى. الايدا سوڭعى ۋاقىتتا ەلىمىزدە بىرقاتار تاۋار پوزيتسيالارىنىڭ, سونىڭ ىشىندە پياز بەن قانت باعاسى تومەندەپ كەلەدى.
سونداي-اق ول بۇگىنگى تاڭدا قاراقۇمىق, كۇرىش, كارتوپ, ءسابىز, كۇنباعىس مايى, الەۋمەتتىك نان, ۇن, كەسپە جانە ءسۇت ونىمدەرىنىڭ باعاسىن تۇراقتاندىرۋ بويىنشا كەشەندى جۇمىس جالعاسىپ جاتقانىن اتاپ ءوتتى.
اۋىل شارۋاشىلىعى ءمينيسترى ەربول قاراشوكەەۆتىڭ ايتۋىنشا, باعانى تۇراقتاندىرۋ ءۇشىن 186,1 مىڭ تونناعا جۋىق ءامات قورى بار. سونىمەن قاتار وڭىرلەردە كوكونىستەردى جيناۋ جۇمىستارى جالعاسىپ جاتىر, بۇل تۇراقتاندىرۋ قورلارىنىڭ ازىق-ت ۇلىك بازاسىن ودان ءارى ۇلعايتۋعا مۇمكىندىك بەرەدى.
پرەمەر-مينيستر قازىرگى ۋاقىتتا بيىلعى ەگىننەن جينالعان كوكونىس ونىمدەرىنىڭ باعاسى تومەن ەكەنىن اتاپ ءوتتى. وسىعان بايلانىستى وڭىرلەردىڭ اكىمدەرى تۇراقتاندىرۋ قورلارىن بەلسەندى تۇردە تولىقتىرۋى قاجەت.
«ناۋرىز ايىنان ماۋسىم ايىنا دەيىن جالعاساتىن ماۋسىمارالىق كەزەڭدە تاپشىلىقتى بولدىرماۋ جانە قىمبات كوكونىستەردى سىرتتان تاسىماۋ ءۇشىن قويمالاردى قازىردەن باستاپ پياز, كارتوپ, ءسابىز, قىرىققاباتپەن تولتىرۋ قاجەت. ماۋسىمدىق كەزەڭدە باعانى ينتەرۆەنتسيالاۋ جانە كوكونىس باعاسىنىڭ شارىقتاپ كەتۋىنە جول بەرمەۋ ءۇشىن ولاردى ەڭ تومەن باعامەن ساتىپ الاتىن مۇمكىندىكتى قازىردەن ءتيىمدى پايدالانۋ قاجەت», دەدى ءاليحان سمايىلوۆ.
سونىمەن قاتار تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسىنىڭ باسشىسى جاندوس شايماردانوۆ, قارجى ۆيتسە-ءمينيسترى ەرجان ءبىرجانوۆ, ماڭعىستاۋ وبلىسىنىڭ اكىمى نۇرلان نوعاەۆ جانە جامبىل وبلىسىنىڭ اكىمى نۇرجان نۇرجىگىتوۆ بايانداما جاسادى.
بايانداماشىلاردى تىڭداي كەلە پرەمەر-مينيستر باعانى تۇراقتاندىرۋدىڭ جاڭا تاسىلدەرىن ىسكە اسىرۋ اياسىندا الەۋمەتتىك-كاسىپكەرلىك كورپوراتسيالاردىڭ شوتتارىنداعى قاراجاتتى رەزەرۆكە قويىپ, ولاردى وندىرۋشىلەردى قارجىلاندىرۋعا جىبەرۋ قاجەتتىگىن اتاپ ءوتتى.
سونىمەن قاتار پرەمەر-مينيستر ۇلتتىق ستاتيستيكا بيۋروسى ۇسىنعان فيسكالدىق دەرەكتەر وپەراتورلارى ارقىلى ينفلياتسيا مونيتورينگى بويىنشا جاڭا تاسىلدەردى قولدادى. ونىڭ ايتۋىنشا, 2023 جىلدىڭ باسىنان باستاپ باستاپ جاڭا فورماتقا كوشۋ جانە وسى پروتسەسكە تەحنيكالىق قولداۋ كورسەتۋ ءۇشىن جۇمىس جۇرگىزۋ قاجەت.
وعان قوسا, ءاليحان سمايىلوۆ باعا بەلگىلەۋ تىزبەگىن تەكسەرۋ جونىندەگى ايماقتىق كوميسسيالاردى قايتا فورماتتاۋدى جەدەلدەتىپ, استانا قالاسىنىڭ, جامبىل, الماتى جانە قىزىلوردا وبلىستارىنىڭ اكىمدەرىنە ساۋدا ۇستەمەسىن 15-تەن 10%-عا دەيىن تومەندەتۋ جونىندەگى مەموراندۋمدارعا قول قويۋدى جەكە باقىلاۋعا الۋدى تاپسىردى.
كۇن تارتىبىندەگى ەكىنشى ماسەلە بويىنشا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بايانداما جاسادى. ول ەڭبەك نارىعىنىڭ بارلىق نەگىزگى كورسەتكىشتەرى بۇگىنگى تاڭدا تۇراقتى ەكەنىن حابارلادى. بۇل رەتتە مەملەكەت سۋبسيديالايتىن جۇمىس ورىندارىن قوسقاندا, جاڭا تۇراقتى جۇمىس ورىندارىن اشۋ, بوس پوزيتسيالاردى جابۋ, ەڭبەك رەسۋرستارىنىڭ ۇتقىرلىعىن ارتتىرۋ جانە ت.ب. جونىندەگى شارالاردى ىسكە اسىرۋ جالعاسىپ جاتىر.
پرەمەر-مينيستر حالىقتىڭ تابىسى مەن ەكونوميكانىڭ وسۋىنە ىقپال ەتەتىن ەڭ ماڭىزدى فاكتور ول – تۇراقتى جۇمىس ورىندارىن قۇرۋ ەكەنىن اتاپ ءوتتى.
«مەملەكەت باسشىسى بارلىق اۋداندار مەن قالالاردىڭ اكىمدەرىنە جىل سايىن ءاربىر 10 مىڭ تۇرعىنعا كەمىندە 100 جۇمىس ورنىن قۇرۋدى تاپسىردى. الايدا قازىر سولتۇستىك قازاقستان, پاۆلودار, اقمولا جانە قوستاناي وبلىستارىندا جۇمىس ءتيىمسىز جۇرگىزىلىپ جاتىر», دەدى ءاليحان سمايىلوۆ.
ونىڭ ايتۋىنشا, بىرقاتار وبلىستاردا مىندەتتى زەينەتاقى جارنالارى بويىنشا تومەن كورسەتكىشتەر بايقالادى جانە جالعان جۇمىسقا ورنالاسۋ فاكتىلەرى انىقتالىپ جاتىر.
كەڭەستى قورىتىندىلاي كەلە, پرەمەر-مينيستر اكىمدەرگە جۇمىسپەن قامتۋ ماسەلەلەرىن جانە جاستار اراسىنداعى جۇمىسسىزدىقتى تومەندەتۋ جونىندەگى شارالاردى باقىلاۋدى كۇشەيتۋدى تاپسىردى.
